“A Aki Arona Aroia Kaain te Aonnaba”
“A ribaaki irouia kaain te aonnaba ibukina bwa a aki arona aroia kaain te aonnaba.”—IOANE 17:14.
Nanon Taeka Akanne: E aki arona aroia kaain te aonnaba Iesu, n arona n tei i nuka ni kaineti ma aia kauntaeka botannaomata ao aia kauntaeka tautaeka ni boong akanne. E kabwarabwaraa ni kangai: “Ngke arona bwa ana bwai te aba au tautaeka n uea, ao a na buaka au aomata bwa N na aki kabureaki nakoia I-Iutaia. Ma bon tiaki mai aon te aba au tautaeka n uea.” (Ioane 18:36) E kaumakia naba taan rimwina bwa a na kitan aroaroia, aia taetaenikawai ao kateia aika ribaaki n Ana Taeka te Atua.—Mataio 20:25-27.
Aroia Kristian Rimoa ni Kakororaoa ae Taekinaki: E taekinia Kristian rimoa te tia kororongorongo ibukin te Aro ae Jonathan Dymond bwa “a rawa n ira [te buaka], e ngae ngke tera rekenikaia iai bwa tao a na kabuakakaaki ke ni kabureaki ke ni kamateaki.” A motinnanoia bwa a na karawawataaki bwa a aonga n aki kakeaa bongan teia i nuka. A kaokoro ma te aba ibukin aia kaetieti ni kaineti ma te aroaro ni maiu ae riai. A tuangaki ni kangai Kristian: “Kioina ngkai kam a aikoa manga raonia ni mwaairiri kaanga n te bokaboka ae kamwara ae te kaibwabwaru, ao a a mimi iai ao a a taetae ni kabuakakaingkami.” (1 Betero 4:4) E korea ae kangai te tia korea rongorongon rimoa ae Will Durant ibukia Kristian: “A tabareaki mataniwin nanoia beekan ake a kabanei nanoia ni kakukurein te maiu aei, ibukina bwa a waakina te raoiroi ao te aroaro ni maiu ae riai.”
Antai Aika Iai Irouia te Kanikina Aei ni Boong Aikai? E katuruturuaki ae kangai n te New Catholic Encyclopedia ni kaineti ma aroia Kristian n tei i nuka: “Moan te kangaanga irouia bwa a na urua kakaonimakia aei.” E taekinaki n te kaongora man te Reformierte Presse bwa e ribootinaki man te African Rights ae te botaki ibukin inaomataia aomata, aron tiringaia kaain te reeti teuana n 1994 i Rwanda ao a boutokaaki irouia Aaro ni kabane “ma tiaki aroia anne Ana Tia Kakoaua Iehova.”
Ni maroroakinan te Nazi Holocaust ae aia buaka taian Nazi ae korakora iai te tiritiri, e bwaebwaeti temanna te tia reirei n te reirei ae rietata bwa “akea te kurubu ke te botaki man te aba anne, ae ninikoria ni kabuakakaa aroia ni bwaina te kewe ae rangi ni bati, te ribuaka ao ai karaoani mwakuri n tiritiri.” E korea ae kangai imwin titirakinan te United States Holocaust Memorial Museum: “E a reke kaekaan au titiraki.” E a ataia teuaei bwa a tei n nene n aia koaua Ana Tia Kakoaua Iehova, n aki ongei aaro n iowawa nakoia.
Tera aron aia kaetieti ibukin te aroaro ni maiu ae riai? E taekinaki ae kangai n te maekatin ae te U.S. Catholic: “A bobuaka aia iango angiia rorobuaka ni boong aikai aika Katorika, ma reirein aia Aro ni bwaai tabeua n aron te wene ni bure [ao] te tekateka n taanga imwain te mare.” E mwaneweaki iai ana taeka te riikan n te Aro teuana ae kangai: “A rangi ni bati ake I noriia ao au katautau bwa e raka i aon 50 te katebubua ake a a kaman tekateka n taanga ngke a roko bwa N na mareia.” E taekinaki n The New Encyclopædia Britannica bwa a “kateimatoa te aroaro ni maiu ae moan te tamaroa n aroaroia nako,” Ana Tia Kakoaua Iehova.