“Teimatoa n Taua Au Taeka”
“Ngkana kam teimatoa n taua au taeka, ao bon taan rimwiu ngkami, ao ane kam na ataa te koaua, ao e na kainaomataingkami te koaua.”—IOANE 8:31, 32.
Nanon Taeka Akanne: E nanonaki n ana “taeka” Iesu bwa a roko ana reirei mairoun nibwana ae rietata riki. E taku Iesu: “E tuangai au taeka ae N na taekin ao N na atong, te Tama are e kanakomaiai.” (Ioane 12:49) E tataro Iesu nakon Tamana ae Iehova ae te Atua i karawa ni kangai: “Bon te koaua am taeka.” E okioki ni mwanewea Ana Taeka te Atua ni boutokai ana reirei iai. (Ioane 17:17; Mataio 4:4, 7, 10) Ngaia are a ‘teimatoa n taua ana taeka’ Kristian ni koaua ae nanona a butimwaea Ana Taeka te Atua ae te Baibara, bwa te “koaua” ao te bwai ni kairiri ae moan te korakora ibukin aia onimaki ao aia mwakuri.
Aroia Kristian Rimoa ni Kakororaoa ae Taekinaki: N aron Iesu, e karinea naba Ana Taeka te Atua te tia korea te Baibara ae te abotoro Bauro are a rangi ni mwaiti bokin te Baibara ake e korei. E korea ae kangai: “E kairaki korean te Koroboki ae Tabu ni kabane iroun te Atua ao e manena.” (2 Timoteo 3:16) A riai mwaane ake a rineaki bwa a na reireinia raoia ni Kristian n “taua ni kamatoaa Ana Taeka te Atua are koaua ao n onimakinaki.” (Tito 1:7, 9, The Amplified Bible) A kaumakaki Kristian ake rimoa bwa a na rarawa nakoni “wanawanan aon te aba ao n te mwamwanaa te aba ae akea uaana, ae boto i aon aia katei nikawai aomata ao i aoni baike a boboto iai aia waaki kaain te aonnaba, ma tiaki ni kaineti ma Kristo.”—I-Korote 2:8.
Antai Aika Iai Irouia te Kanikina Aei ni Boong Aikai?: Ni kaineti ma ae taekinaki n ana boki te Vatican ae te Dogmatic Constitution on Divine Revelation, are katauraoaki n 1965 ao ni mwaneweaki n te Catechism of the Catholic Church ae kangai: “E aki tii anai ana koaua te Aro [ni Katorika] ibukini bwaai ni kabane aika kaotaraeaki man te Baibara ae Tabu. Ibukin anne, a a katitebooa iai kakawakin aia katei ma te Baibara ae Tabu bwa a aonga ni kona ni butimwaeaki, ao ni karineaki bwa koaua aika riai n onimakinaki ao n taromauriaki.” E mwaneweaki n te kaongora ae n te maekatin ae te Maclean ana titiraki te mitinare temanna i Toronto i aoni Kanata ae kangai: “E aera ngkai ti kainnanoa kairakira n te iango ae ‘kaokoro’ man ririki aika uoua tenga n nako? Iai oin ara iango aika rangi n tamaroa ake a teimatoa ni kamamaraaki, ngkana a kairekerekeaki ma Iesu ao te Baibara.”
E taekinaki ae kangai n te New Catholic Encyclopedia ibukia Ana Tia Kakoaua Iehova: “A onimakina te Baibara bwa tii ngaia nibwan aia koaua ao tuan aroaroni maiuia.” N taai aika tibwa nako, e katokaki temanna Ana Tia Kakoaua Iehova iroun te mwaane mai Kanata ngke e tabe ni kabwarabwaraa. E kotea ana Baibara neiei ao e taku: “I boni kinako man am boki anne.”