E Koaua Bwa Aomata ni Kabane Ake A Taku Bwa Kristian Ngaiia Boni Kristian?

TERA aroni mwaitiia Kristian ngkai? E kaania 2.3 te birion mwaitiia ni katobibia te aonnaba, n aron ae taekinaki n te Atlas of Global Christianity n 2010. Ma e kaotaki naba iai bwa Kristian akanne, a kaaini Aaro aika 41,000 ake iai oin aia reirei ao aia tua ibukini kateia. Ngkai a rangi ni mwaiti Aaro ake aongkoa Kristian ngaiia, ti a ota iai bwa te koraki ake a nori botaki akanne, a mangaongao otaia ke ni bwara nanoia iai. A kona n iango ni kangai, ‘E koaua bwa aomata ni kabane ake a taku bwa Kristian ngaiia boni Kristian ni koaua?’

Ti na iangoa aei n te itera teuana. N angiin te tai, e riai te tia mwamwananga ni kaota abana nakon te immigration. E riai naba n iai bwaai ni kakoaua n aron ana bwatiboti ibukini kaotan rongorongona riki tabeua. Ai tii te arona naba ma anne, bwa e riai te Kristian ni koaua ni karaoa ae bati riki nakon ae tii taekinani kakoauaani Kristo. E kainnanoi bwaai riki tabeua ibukini kinaakina ae bon te Kristian ngaia. Tera te bwai anne?

E moani kamanenaaki te taeka ae “Kristian” tao tabeua te tai imwin 44 C.E. E ribootinna te tia korea rongorongon te Baibara rimoa ae Ruka ni kangai: “A moan atongaki taan rimwin Iesu bwa Kristian, i Antioka man ana babaire te Atua.” (Mwakuri 11:26) Bon taan rimwini Kristo te koraki ake a moan atongaki bwa Kristian. E na kanga n riki temanna bwa te tia rimwin Iesu Kristo? E kabwarabwaraaki n The New International Dictionary of New Testament Theology ni kangai: “Ngkana e na kakairi temanna iroun Iesu ao n riki bwa te tia rimwina, e nanonaki iai bwa e na anga [ngaia] ma nanona ni koaua . . . ni maiuna ni kabane.” Ngaia are te Kristian ni koaua, bon te aomata ae e kakairi n ana reirei ao ana kaetieti Iesu are te tia Katea te Aro ni Kristian, ni maiuna ni kabane ma nanona ni koaua.

A kona n reke aeka n aomata akanne i buakoia aika bati, ake a taku bwa aongkoa Kristian ngaiia ni boong aikai? Tera are e taekinna Iesu ibukini kanikinaeaia taan rimwina ni koaua? Ti kaungako bwa ko na iaiangoi kaekaan titiraki aikai n te Baibara. Ni kaongora aika imwina, ti na neneri ana taeka Iesu aika nimaua ake a na buokira ibukini kanikinaeaia taan rimwina ni koaua. Ti na rinanon aroia Kristian ake n te moan tienture ake a kaotiotii aroaro aikai. Ao ti a kona n noria bwa antai i buakoia aika bati ake a taku bwa aongkoa Kristian ngaiia ni boong aikai, aika iai irouia kanikina aikai.