Tera ae Nanonaki n te Riki Bwa te Kristian?—Tera ae E Taekinna te Baibara?

A bati aomata ni boong aikai aika kamoamoa n taekinna bwa Kristian ngaiia, ma a karaoi mwakuri n iowawa nakoia tabemwaang. A nanonrang tabeman, a bwabwaina te kewe, ke a karaoi mwakuri n akiako. A aki kakaonimaki nakoia buuia ni mare ake tabemwaang. Aikai aroaro ake a a kairaki iai tabeman bwa a na iangoa ae kangai: ‘Tera raoi ae nanonaki n te riki bwa te Kristian?’

Nanon raoi te riki bwa te Kristian

E bebete iroun te aomata atongan ae te Kristian ngaia. Ma e bati riki ae kainnanoaki irarikin anne. Te Kristian bon te tia rimwin Iesu Kristo n aron ae e taekinna te Baibara. (Mwakuri 11:26) E taku Iesu: “Ngkana kam teimatoa n taua au taeka, ao bon taan rimwiu ngkami.” (Ioane 8:31) Bon akea ae e kona n taua ana taeka Iesu ma te kororaoi. Ma e riai te Kristian ni maiuakina nanon ana reirei Iesu, ao ni kaota anne ni baike e karaoi ao ni baike e iangoi ni katoabong. Iangoi katoto tabeua.

A kaotiota te tangira ae aki mwamwanaa te aba Kristian

Te bae e taekinna Iesu: “I anganingkami te tua ae boou, bwa kam na itangitangiri i marenami, n arou ae I tangiringkami, ao kam na itangitangiri naba. Ao ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.”—Ioane 13:34, 35.

Te bae e karaoia Iesu: E kaota te tangira ae aki mwamwanaa te aba Iesu nakoia aomata nako, n aki ongeia bwa a kaubwai ke a mangori, ke te reeti n aomata raa ngaiia. E kamarurungia aoraki, e kaamwarakeia aika baki, ao e anga naba maiuna ibukira ni kabane.—Mataio 14:14-21; 20:28.

Aroaroia Kristian: A kaotiota te tangira ae aki mwamwanaa te aba Kristian n aroia n tituaraoi, n aki inanonano, ao ni kakabwarabure. A buokiia aomata aika rinanon te kangaanga, ao a kukurei ni katinanikui oin nanoia ibukini buokaia tabemwaang.—1 Ioane 3:16.

A bwabwaina te koaua Kristian

Te bae e taekinna Iesu: “Boni ngai . . . te koaua.”—Ioane 14:6.

Te bae e karaoia Iesu: E bwabwaina te koaua Iesu n ana taeka nako ao n ana mwakuri. E aki mwamwanaia aomata bwa a na karaoi baike e tangiriia bwa a na karaoi, ke a na kakoauai baika aki koaua. E ataaki ibukin arona ni bwabwaina te koaua, e ngae naba ngke e kaaitara iai ma kangaanga.—Mataio 22:16; 26:63-67.

Aroaroia Kristian: A aki bwaina te kewe Kristian. A kabwakai aia taekiti nakon te tautaeka, a aki iraa, ao a mwakuri korakora ni kaineti ma mwaitin te tai are a kabooaki iai. (I-Rom 13:5-7; I-Ebeto 4:28) A aki babakanikawaiia tabemwaang, a aki tatarabwai n tain te ukeuke, ke n taekini baika kewe n aia booma ibukin te mwakuri teuana, ke booma riki tabeua.—Ebera 13:18.

A bwaina te akoi Kristian ni baike a karaoi

Te bae e taekinna Iesu: “Nakomai nakoiu ngkami akana kam korakai ma n rawawata, ao N na motiki rawami. Amoa amou i aomi ao reirei irou bwa I nimamannei ao I nanorinano, ao e na kabebeteaki nanomi iai. Bwa e kamaiu amou ao e bebete uotau.”—Mataio 11:28-30.

Te bae e karaoia Iesu: E akoi Iesu n aroarona ao e bebete irouia aomata bwa a na kawaria. E butimwaeiia ataei, e kabebeteia aika rawawata, ao e kakarineia aomata.—Mareko 10:13-15; Ruka 9:11.

Aroaroia Kristian: A kaota te akoi Kristian n aroia n taetae nakoia aomata, a ataa te riai ao a aki ioiowawa. (I-Ebeto 4:29, 31, 32) A mwamwannanoia aomata ao n ukeri aanga ake a na kona ni buokiia iai.—I-Karatia 6:10.

A teimatoa Kristian ni kakaonimaki nakoia buuia

Te bae e taekinna Iesu: “Ane e botiia te Atua ao ke a tai karaureia, aomata.”—Mareko 10:9.

Te bae e karaoia Iesu: E ngae ngke e aki iein Iesu ma e kaungaia buu nako bwa a na kakaonimaki i marenaia. (Mataio 19:9) E anga ana kauring ni kaineti ma mwakuri ake a na kona n urua te tekateka n taanga.—Mataio 5:28.

Aroaroia Kristian: A aki karaoa te anua Kristian ae e kona n urua te tekateka n taanga. (Ebera 13:4) A kaotiota te tangira ao te karinerine i marenaia, taanga aika mareaki.—I-Ebeto 5:28, 33.