Te Kanimaua ni Bwai ae Raba
Karekei Baika Ko na Rauaki Iai Ibukini Kainnanoan te Atua
TERA ANA REIREI TE BAIBARA? “A a kukurei akana ataia bwa a kainnanoa te Atua.”—Mataio 5:3.
TERA TE KANGAANGA IAI? Iai nga ma nga Aaro aika kakaokoro, ao a mwaiti mai buakoia ake a kauntaba aia reirei ibukini karekeani baika ko na rauaki iai ibukini kainnanoan te Atua. Ko na kanga n ataia bwa te Aro raa ae e reirei taekan te koaua ao e boni kakukureia te Atua? A kamatoaa n taekinna taani kororongorongo aika kakannato bwa kakoauaan te Atua ao taromauriana bon te iango ae aki riai ao e karuanikai naba. E kakimototoaki ni kabwarabwaraaki n te maekatin ae te Maclean’s ana iango temanna ae rangi ni kinaaki are e aki kakoauaa te Atua ni kangai: “E reiakinaki n te aroaro ni Kristian bwa iai te bae bongana riki n te maiu nakon are a kona n noria aomata, n ongo ao n namakinna ma ni kakoauaa man te rabakau n aonnaba . . . bwa e tara n aki kakawaki te maiu aei ao a kairiia aomata koaua aikai nakoni karaoani mwakuri n iowawa aika tiritiri.”
TERA AE KO KONA NI KARAOIA? Neneri bwaai ni kakoaua ibukin ae bon iai te Atua. (I-Rom 1:20; I-Ebera 3:4) Tai kariaia temanna bwa e na kabwaraa nanom n ukeri kaekaan titiraki aika kakawaki n aron aikai: Tera bukini menara ikai? Iai riki te maiu teuana imwin te mate? E aera ngkai e rangi ni bati te rawawata? Tera ae e tangiria mairou te Atua? E kakawaki karekeani kaekaan titiraki aikai ibukini karekean te raunnano ae teimaan.
E ngae n anne, tai kakoauai ao n aki iangoi moa baika a taekinaki irouia tabemwaang. Ko kaungaaki n Ana Taeka te Atua bwa ko na kabongana ‘wanawanam’ ni kakoauaa raoi bwa tera ae boraoi ma nanon te Atua. (I-Rom 12:1, 2) Ko na boni kakabwaiaaki n am kakorakora. Ngkana ko karekea am tai n ukeuke n reirei n te Baibara ao ni maiuakin reirei ni kairiri aika manena iai, ko na boni katanaki mani kangaanga, e na kauarerekea raraomam ao ni kabatiaaki kukureim ni maium. Ti kona n onimakina te berita anne. A a tia mirion ma mirion aomata aika kakaokoro rikiaia ni kakabwaiaaki man reiakinan te koaua ibukin te Atua ao ana kantaninga.
Ko na karikirakea riki tangiran te Atua ngkai ko a kakabwaiaaki ni maiuakinan ana reirei ni kairiri te Baibara aika a na kawanawanako. E aera ngkai ko aki butimwaea te kakao ibukin te reirei n te Baibara ma Ana Tia Kakoaua Iehova? Ngkana ko kariaia, ko na bae n inanoi ma ae e koreia te abotoro Bauro ae kangai: “E boni korakora reken aron te aomata n tangiran te Atua n ikotaki ma te raunnano.”—1 Timoteo 6:6.
[Taamnei n iteraniba 8]
Kakoauaa raoi bwa tera ae e boraoi ma nanon te Atua