Kamwawaa Am Tai Ibukin te Atua

E na nakoraoi riki maium ngkana ko kamwawaa am tai ibukin te Atua, bwa ko kaota iai ataakin ae ko kainnanoia. Iangoa ana angareirei Iesu ibukin aei.

Te bwai ae e taekinna Iesu

“A a kukurei akana ataia bwa a kainnanoa te Atua.”—Mataio 5:3.

• Ti bane ni kan atai kaekaan titiraki aikai: Tera te kantaninga ibukin te maiu? E aera ngkai e a rangi ni bati te rawawata? Tera ae riki ngkana e mate te aomata? E boto kukureira i aoni kaekaan titiraki akanne.

“E aki riai ni maiu te aomata n tii te amwarake, ma e na maiu naba n taeka nako aika otinako mai win Iehova.”a—Mataio 4:4.

• Ngkai ti kainnanoa te amwarake ibukini marurungin rabwatara, ti kainnanoa naba te rongorongo ae ti na kaaniaki iai ma te Atua. E katerea Iesu bwa ti riai n onimakina te Atua n taai nako ibukini kaaniakira ma ngaia.

“Bon te koaua am taeka.”—Ioane 17:17.

• E angareirei Iesu ni katerea bwa te anga ae moan te kakawaki ibukini kaaniakira ma te Atua, bon rinanon Ana Taeka ae te Baibara.

Ti kaungako bwa ko na karekea te kukurei ae akea tokina mani kamwawaan am tai ibukin te Atua ao ni kaaniko ma ngaia. Aikai tabeua baika a kona ni buokiko:

• Wareka te Baibara n aki kabooaki.

• Bubutii te reirei n te Baibara ae aki kabooaki ma temanna ae e na reirei ma ngkoe.