Te Kaaua ni Bwai ae Raba
Bwaina te Wanawana n Rineaia Raoraom
TERA ANA REIREI TE BAIBARA? “Ko na nakonako ma aomata aika rabakau, ao ko na rabakau iai.”—Taeka N Rabakau 13:20, BG.
TERA TE KANGAANGA IAI? A na kakorakoraa ke a na kamamaraa te raunnano raoraora. E kona n rotakibuaka ara iango ibukin te maiu n aroaroia ao n aia taetaenikawai.—1 I-Korinto 15:33.
N te katoto, iangoa rongorongoia mwaane aika 12 n te Baibara ake a oki n tuoa Kanaan. Angiia mai buakoia a “uota te rongorongo ae buakaka ae rongorongon te aba are a tuoa nakoia tibun Iteraera.” Ma uoman mai buakoia a taekina raoi taekani Kanaan bwa “bon te aba ae moan te raoiroi.” Ma a aki raoiroi baike a taekin taan tutuo ake tengaun ao a rotakibuaka aomata iai. “E a bane te botaki n aomata ni kanene bwanaia” n aron rongorongona ae taekinaki, “ao a bane tibun Iteraera ni ngurengure.”—Warekaia I-Iteraera 13:30–14:9, BG.
Ai arona naba ni boong aikai bwa a bati ‘aomata aika taani ngurengure ake a ngureakina aroni maiuia.’ (Iuta 16) E kangaanga teimatoan raun nanom i buakoia raoraom aika aki kona n rau nanoia.
TERA AE KO KONA NI KARAOIA? Neneri am taetaenikawai ma raoraom. A kamoamoa raoraom n angiin te tai ibukini baika iai irouia, ke a aki toki ni ngurengure ibukini baika akea irouia? Ao tera aron am iraorao ma ngaiia? Ko kakorakorako bwa a na bakantang iroum raoraom ke ko kaungaia bwa a na rau nanoia ni baika iai irouia?
Iangoa ana katoto Tawita are e na riki bwa te Uea ao Ionatan are natin te Uea are Tauro. E mamaeka ni karabarabaa Tawita n te rereua. E namakinna Tauro bwa e na ruanikai ueana iroun Tawita ao e kan tiringnga. E ngae ngke e riai n riki Ionatan bwa te tia ruamwin tamana, ma e riki bwa raoraon Tawita ae rangi ni kaan ma ngaia. E ataia Ionatan bwa e a tia te Atua n rinea Tawita bwa e na uea imwin Tauro, ao e rau nanona ni boutokaa raoraona.—1 Tamuera 19:1, 2; 20:30-33; 23:14-18.
Ko kainnanoia raoraom aika a kakaraoa anne aika a kakorakoraia ni karekea te raunnano, ao a tangira ae raoiroi ibukim. (Taeka N Rabakau 17:17) Ni koauana, ko riai ni kaotiotii aeka n aroaro akanne bwa a aonga n anaaki nanoia raoraom aika a kakaraoa naba aron anne.—I-Biribi 2:3, 4.
[Taamnei n iteraniba 7]
A kakorakoraa raun nanom raoraom ke a kamamaraa?