Te Katenua ni Bwai ae Raba

Kateimatoa te Nano ni Kakaitau

TERA ANA REIREI TE BAIBARA? “Katituaraoi ibukini bwaai ni kabane.”​—1 I-Tetaronike 5:18.

TERA TE KANGAANGA IAI? Ti otabwaniniaki irouia aomata aika a kainikatonga ma aika aki kakaitau ao ti kona ni kakairi irouia. (2 Timoteo 3:1, 2) Irarikin anne, ti kona n namakina kaumakara bwa ti na kabatiai riki baika ti na karaoi ni maiura are e a kamani bati katabetabeara iai. Ti kona n rangi n taonakinako ni kangaanga ke ni kabanei maiura ibukini karekeani baika ti tangiri, ao ai akea ara tai ni kakaitau ni baika a kaman reke iroura ke ni kaotiota ara kakaitau ibukin te bae a karaoia tabemwaang ibukira.

TERA AE KO KONA NI KARAOIA? Karekea am tai ni kananoa am iango ni baika raraoi aika iai iroum ngkai. Ni koauana ko kona n namakina ae ko a taonakinako ni kangaanga. Ma iangoa ana katoto te Uea are Tawita. N tabetai e namakinna bwa e karawawataaki ao e maroaa nanona ni kataakina. E ngae n anne, e tataro nakon te Atua ni kangai: “I iangoi am makuri ni kabane: I taekina aia makuri baim i nanou.” (Taian Areru 143:3-5, BG) E kateimatoa te nano ni kakaitau Tawita n aki ongei kataakina ao e teimatoa n rau nanona.

Iangoi baika a tia ni karaoi tabemwaang ibukini buokam ao kaotiota am kakaitau ibukini baika a karaoi. E katea te katoto ae rianako Iesu ni kaineti ma aio. N te katoto, ngke e kabwaroa te bwaa ae bobuaka Maria are raoraona i aon atuna ao waena, ao a a titiraki tabeman ni kangai: “E aera ngkai e bakataeaki te bwaa ae boiarara aei?”a A iangoia taan tiribure akekei bwa e riai ni kabooakinako te bwaa, ao mwanena a na anganaki aika kainnano. E kaeka Iesu ni kangai: “Katuka neiei ma arona. E aera ngkai kam waeia?” Ao e manga taku riki: “E karaoa ae e kona neiei.” (Mareko 14:3-8; Ioane 12:3) N oneani mwin are e na kaatuua iangoan te baere e aki karaoia Maria, e a kaotiota ana kakaitau Iesu n te baere e a tia ni karaoia neiei.

A ataa kakawakin te utu tabeman ao raoraoia ke kakabwaia riki tabeua ake a a tia ni karekei imwini buani baikai ao ni maten temanna. Ko na bon aki rinanoni kananokawaki akanne ni kaatuuan iangoani baika iai iroum ngkai! E aera ko aki iangoi katoto ke ni korei mwini baika ko a tia ni kakaitau iai?

Ti riai ni kaotiota ara karabwarabwa nakon te Atua n ara tataro ngkai a bane n roko “bwaai n tituaraoi aika raraoi” mairouna. (Iakobo 1:17) Ngkana ti okioki ni karaoa aei, ti a kona ni buokaki iai ni kateimatoa nanora ni kakaitau ao ni karikirakea te raunnano.​—I-Biribi 4:6, 7.

[Kabwarabwara ae nano]

[Taamnei n iteraniba]

Ko kaotiota am kakaitau ni baika a karaoi tabemwaang ibukim?