Te Kauoua ni Bwai ae Raba

Rarawa Nakon te Nano ni Kabotauko ma Tabemwaang

TERA ANA REIREI TE BAIBARA? “Ke e tuoa oin ana mwakuri temanna ma temanna, ao e na karekea iai bukini kamoamoaana i bon irouna, ma tiaki n te kabotaua ma temanna.”​—I-Karatia 6:4.

TERA TE KANGAANGA IAI? Ti kani kabotauira ma tabemwaang, n tabetai ma te koraki ake a karako aia bwai nakoira ao n angiin te tai ma ake a korakora, a kaubwai ke a rabakau riki nakoira. Bon akea raoiroini kabotauara ma tabemwaang. E kairua ara iango ae e ataaki raoiroin te aomata mani mwaitin ana bwai ke n te bae e kona ni karaoia. E kona n ueke i nanora namakinan te bakantang ao te nano ni kaiangatoa.​—Te Minita 4:4.

TERA AE KO KONA NI KARAOIA? Kataia n iangoiko n aron iangoakim iroun te Atua. Kariaia ana taratara bwa e na kateimatoa raoiroin am iango ni kaineti ma manenam. “Ba e tarataraa tinanikun te aba te aomata, ma E tarataraa te nano Iehovaa.” (1 Tamuera 16:7, BG) E tuoa raoiroim Iehova tiaki n te kabotauko ma temanna, ma n noran nanom, tuoan am iango, am namakin ao am kantaninga. (I-Ebera 4:12, 13) E nora tian am kona Iehova ao e kaumakiko bwa ko riai naba n atai. Ko na boni kainikatonga ao ni karekea te aki raunnano n taai nako ngkana ko kabotaua raoiroim ma tabemwaang. Ngaia are butimwaea ma te nanorinano are a aki kona n nakoraoi am kakorakora ni bwaai nako ake ko karaoi n angiin te tai, ma a kona n taai tabetai.​—Taeka N Rabakau 11:2.

Tera te bwai ae kakawaki ae ko riai ni karaoia bwa ko aonga ni karekea raoiroim i matan te Atua? E kaira te burabeti are Mika bwa e na korea ae kangai: “Te aomata, E a tia ni kaota ae raoiroi nako im; ao tera ae E ukoukoria Iehova mai roum, ba ti te karaoa ae eti, ma te tangira te nanoanga, ma te nako n nanorinano ma Atuam?” (Mika 6:8, BG) E na mutiakiniko te Atua ngkana ko ira nanon te taeka n reirei anne. (1 Betero 5:6, 7) Aio bukina ae rangi ni kakawaki iai karekean te raunnano aei.

[Kabwarabwara ae nano]

[Taamnei n iteraniba 5]

E tuoa raoiroim Iehova ma n noran nanom