E Kainnanoa Kaotani Buure te Atua?

E teimatoa te katei ae kaotan ana bure te aomata nakon te tama ke mataniwin te Aro bwa kanoan aia taromauri Aaro aika bati. Ma e teimatoa ni manena ke ni kainnanoaki kaotani buure iroun te botannaomata ae kariaia aeka n aroaro nako ni boong aikai?

A KAUNTABA iango i aon aei. N te katoto, e ribootinaki n te National Post of Canada temanna te aomata are e taekinna bwa e ngae ngkai e kangaanga tuangan temanna te bae ko a tia ni karaoia ae bure, ma “e kabebetea nanom temanna ae e kakoauako, e tataro ma ngkoe ao e tuangko te bae ko riai ni karaoia.” N te itera teuana, e mwaneweaki ana taeka temanna te mwaane n te boki ae Bless Me, Father, for I Have Sinned ae kangai: “Kaotan te bure bon teuana mai buakoni baika kakaraoaki n te Aro ae rangi n rotakibuaka iai ana namakin temanna. A a kairaki iai aomata bwa a na raraoma n taai nako.” Tera ae taekinaki n te Baibara ibukin te reirei aei?

Baika Taekinaki n te Baibara

Ti karekei kaetieti aika okoro ibukini baika riai ni karaoaki ngkana iai ae bure n te Tua, are e anga te Atua nakon te natannaomata ae I-Iteraera. N te katoto, ngkana e bure te aomata nakon raona ke n urua teuana mai buakon ana tua te Atua, e riai ni kaota ana bure nakon te ibonga are e mwiokoaki man te baronga are Rewi, ibukini karekeani kabwaraan ana bure te aomata anne n anga te karea nakon te Atua ibukini kabwaraan te bure.​—Nakoaia Ibonga 5:1-6.

Tera aron te Uea are Tawita ngke e boaaki ibukin ana bure iroun te burabeti are Natan n tienture ake imwina? E waekoa ni kangai: “I bure nakon Iehova.” (2 Tamuera 12:13, BG) E tataro naba ni bubutii akoana mairoun te Atua. Tera mwina? E korea ae kangai Tawita rimwi riki: “I kaota au bure nako Im, ao I aki karaba au buakaka: I taku, N na tuanga Iehova au bure; Ao Ko kabara buakakan au bure.”​—Taian Areru 32:5, BG; 51:1-4.

E teimatoa ni kainnanoaki iroun te Atua kaotani buure n te ekaretia ni Kristian n te moan tienture, n aia tai Kristian. E kaumakiia raona ni Kristian Iakobo ae ai tarin Iesu, are temanna mai buakoia mwaane ake taani kairiri n te ekaretia i Ierutarem ni kangai: “Kaotiotii ami bure i marenami ao tataro ibukia raomi n tatabemaningkami nako bwa kam aonga ni kamarurungaki.” (Iakobo 5:16) Tera ngkanne te bure ae a riai ni kaotia Kristian, ao nakon antai?

Tera te Bure ae Riai ni Kaotaki?

Ti kakai kakeai bongaia aomata ke ni kamanenai newera n te aro ae aki riai ni katoabong ngaira aika ti aki kororaoi, ai ngaia are ti a bure iai i marenara. (I-Rom 3:23) E nanonaki n aei bwa ti riai ni kaotii ara bure ni kabane nakoia ake iai mwaakaia ni kairiri ke te aomata ae mwiokoaki?

E ngae ngkai a kamatauningaa te Atua buure nako, ma e nanoangaira n tabeakini kabwakara ibukin rikiara ae te aki kororaoi. E boni kakoauaa aei te tia areru ngke e kangai: “Iehova, ngkana tao Ko mutiakini buure, Ao ai antai ae na tei, te Uea? Ma bon iai kabarani buure i Roum, Ba Ko aonga ni makaki.” (Taian Areru 130:3, 4, BG) Ngaia are tera ae ti riai ni karaoia ngkana ti kairua ao ni bure n tiaki oin nanora nakoia aomata? Uringa te tataro ni katoto are e reireinia taan rimwina Iesu bwa a na tataroia, bwa iai naba te bubutii ae kangai iai: “Kabwarai ara bure, bwa ti kabwarai naba aia bure akana bure nakoira.” (Ruka 11:4) Eng, e na kabwarai ara bure te Atua ngkana ti tataro nakoina ao ni butiia n aran Iesu.​—Ioane 14:13, 14.

Noria bwa Iesu e karina te reirei ae ti riai naba ni kabwarai aia bure akana “bure nakoira.” E kauringia raona n te onimaki te abotoro Bauro ni kangai: “Kam na iakoakoi i marenami, n atataiaomata ao n tauraoi n ikabwarabure n aron naba te Atua ngke e tauraoi ni kabwarai ami bure rinanoni Kristo.” (I-Ebeto 4:32) Ngkana ti kabwarai aia bure aomata nako, ti bon tau ngkanne ni kantaningaa te Atua bwa e na kabwarai ara bure naba.

Ti kona naba ni kantaningaa te Atua bwa e na kabwarai buure aika kakaiaki n aron te iraa, te kewe n oin nanora, te wene ni bure, te koro ni manging, ao a a bati riki? E urui ana tua te Atua ao ni bure nakoina, ane e karaoi buure aikai. E riai kaotani buure aikai iroun ane e karaoi?

Antai ae E Riai ni Kaotaki Buure Nakoina?

E aki mwiokoia mwaane te Atua bwa a na kabwarai buure ake a karaoaki nakoina bwa bon tii ngaia ae e kona ni kabwarai. E katereaki nakoira n te Baibara ni kangai: “E kakaonimaki te Atua ao e raoiroi, mangaia ae ngkana ti kaotii ara bure, ao e na kabwarai ao e na kaitiakira man te buakaka ni kabane.” (1 Ioane 1:9) Ma antai ngkanne ae e riai ni kaotaki buure nakoina?

Ngkai bon tii te Atua ae kona ni kabwarai buure, a riai ngkanne ni kaotaki buure nakoina. Anne are e karaoia Tawita, n aron ae ti a tia n ataia. E boto i aon tera kabwaraani buure? Ti tuangaki n te Baibara ae kangai: “Mangaia ae rairi nanomi ao bitii aromi bwa a aonga ni kamaunaaki ami bure, ao a na roko taai ni kakamaiu mai matan Iehova.” (Mwakuri 3:19) Eng, e aki boto kabwaraani buure tii i aon ataakin ae ko bure ao kaotan am bure ma bon i aon naba te nano ae kani katoka te bure anne. E kangaanga karaoan te mwaneka aei n angiin te tai. Ma bon iai te ibuobuoki.

Uringa ana taeka te tia rimwini Kristo ae Iakobo are ti taekinna mai moa ae kangai: “Kaotiotii ami bure i marenami ao tataro ibukia raomi n tatabemaningkami nako bwa kam aonga ni kamarurungaki.” E reitia riki Iakobo ni kangai: “E rangi ni mwaaka ana tataro ni kakorakora ni bubutii te aomata ae raoiroi, ibukina bwa e butimwaeaki.” (Iakobo 5:16) E kona n ae te “aomata ae raoiroi” bon temanna mai buakoia “unimwaanen te ekaretia” ake e taekinia Iakobo n te kibu 14. N te ekaretia ni Kristian, iai ‘unimwaane’ aika ikawai n te onimaki ke unimwaane n te ekaretia, ake a mwiokoaki bwa a na buokiia te koraki ake a kani karekea kabwaraan aia bure mairoun te Atua. Bon akea ‘unimwaane’ aika kona ni kakeaa ana bure temanna, bwa akea te aomata ae mwiokoaki ni kabwarai aia bure raona n aomata ake a karaoi nakon te Atua.a Ma e ngae n anne, a bon tau n te aro n taamnei ni boaa ao ni kaeta ane e karaoa te bure ae kakaiaki, ni buokia bwa e na ataa rawawatan ana bure ao riaina n raira nanona.​—I-Karatia 6:1.

E Aera Ngkai E Riai ni Kaotii Ana Bure te Aomata?

E a tia n urua ana iraorao ma raona n aomata ao te Atua te aomata ae karaoa te bure ae tao e kakaiaki ke e aki. Ibukin anne, e a kona n tabeaianga ke n raraoma. E riki aei imwin ana mwakuri mataniwin nanora are e a tia n anganira ara tia Karikiriki. (I-Rom 2:14, 15) Tera ae kona ni karaoaki?

Ngkana ti a manga okira te boki ae Iakobo, ti wareki iai taeka ni kaungaunga aikai: “Iai ae aoraki i buakomi? Ke e weteiia unimwaanen te ekaretia, ao a na tataro ibukina ao ni kabiria n te bwaa n aran Iehova. Ao e na marurung te aomata ae aoraki n te tataro ae nako man te onimaki, ao e na kateirakeaki iroun Iehova. Ao ngkana e a tia ni karaoa ae bure ao e na kabwaraaki ana bure.”​—Iakobo 5:14, 15.

A a manga onimakinaki mwaane aika ikawai riki ke unimwaane n te ekaretia bwa a na tabeakina kainnanon te nanai. N te aro raa? Tiaki tii man ongoraeakinani buure ake a kaotaki. Kioina ngkai e irekereke aei ma mamaaran te onimaki, e riai ni karaoaki te bwai teuana bwa e aonga ni “marurung te aomata ae aoraki.” Iai uoua baika kona ni karaoaki ake e taekin Iakobo.

Te moan, e taekina ‘kabirana n te bwaa.’ E nanonaki n aei kamarurungana ni mwaakan Ana Taeka te Atua. E kaotia te abotoro Bauro bwa “e maiu ana taeka te Atua ao e mwaaka . . . ao e kona n atai baike e iangoi te nano ma baike e kantaningai,” ao e rota raoi ana iango ma nanon temanna. (I-Ebera 4:12) Ngkana a mwaatai ni kamanena te Baibara mwaane ake a a ikawai riki, a a kona iai ni buoka ae mamaara ana onimaki bwa e na ataa bukin rikin te kangaanga ao ni karaoi mwaneka aika riai ni kaetii bwaai i matan te Atua.

Te kauoua, bon “te tataro ae nako man te onimaki.” E ngae ngke a aki kona ni bita waakin ana kaetitaeka ae riai te Atua aia tataro mwaane aika ikawai riki aikai, ma a boni kakawaki tataro aikai nakon te Atua, are e ingainga ni kani kabwaraa te bure ae boto i aon ana karea ni kaboomwi Kristo. (1 Ioane 2:2) E tauraoi te Atua ni buoka te tia bure ae raira nanona ni koaua ao ae e kaotiotii “mwakuri aika boraoi ma te rairannano.”​—Mwakuri 26:20.

Iai bukina ae moan te kakawaki ni kaotan ara bure ae ti karaoia nakon raora n aomata ke nakon te Atua, bwa e reke iai akoara irouna. E kaotia Iesu Kristo bwa ti riai n raoiakina te kangaanga ma aomata imwain ae ti na taromauria te Atua ma mataniwin te nano ae itiaki. (Mataio 5:23, 24) E taekinaki ae kangai n Taeka N Rabakau 28:13 (BG): “Ane karaba ana bure nako ao e na aki kabaia: Ma ane kaotioti ma ni kitan ao e na nanoangaki.” Ngkana ti kananorinanoira i matan Iehova ae te Atua ao ni butiia kabwaraan ara bure, ti na akoaki iai irouna ao ni karietataaki n te tai ae riai.​—1 Betero 5:6.

[Kabwarabwara ae nano]

[Kabwarabwaraan n iteraniba 20]

E na mwanuokin ara bure te Atua ao ni kabwarai ngkana ti tataro nakoina ao ni butiia n aran Iesu

[Taamnei n iteraniba 21]

Iai bukina ae moan te kakawaki ngkai ti kaota ara bure bwa e reke iai akoara iroun te Atua