Aia Titiraki Taani Wareware . . .
E kona n titeboo aia tai aomata nako ni kinaa ao n tangira te Atua?
▪ Ngke e titirakinaki Iesu bwa te tua raa ae te kabanea ni kakannato, e kaeka ni kangai: “Ko riai n tangira Iehova ae Atuam ma nanom ni kabanea, maium ni kabanea ao am iango ni kabanea.” (Mataio 22:37) Ma e ngae n anne, a riai aomata ni karekea te atatai ae eti ibukin te Atua, imwain ae a na kona n tangiria. (Ioane 17:3) E koaua bwa titeboo aia tai aomata ni kabane ni karekea te atatai aei?
Te Baibara bon nibwan te atatai ibukin te Atua. (2 Timoteo 3:16) A mwaiti aomata aika maeka n taabo aika e tauraoi iai te Baibara. Tao a okioki ni kaoaki te koraki akanne ibukini karekean te atatai ae eti i aon taekan te Atua, rinanon te reirei n te Baibara ma ngaiia. (Mataio 28:19) A kaikawaaki tabeman irouia aia karo aika Kristian aika tatangira ake a katoabong ni karekei aia tai ma ngaiia n reireinia taekan te Atua.—Te Tua-Kaua 6:6, 7; I-Ebeto 6:4.
Ma e kangaanga aroni maiuia tabeman. Tabeman a bon nako man utu aika kairimatoa n te aro ae riao ike a aikoa kaotiota iai te tangira kaaro nakoia natiia. (2 Timoteo 3:1-5) E kona ni kangaanga irouia te koraki ake a kaikawaaki n te aeka ni mwenga anne, iangoan te Atua bwa te Tama are i karawa ae tatangira. A bati aika a aki tau aia reirei, ike akea iai aia konabwai ni wareware n te Baibara. Ma iai tabeman ake a kamatakiaki aia iango rinanon aia reirei Aaro aika kewe, ke a maeka ma aia utu, taabo, ke aaba ake e aki butimwaeaki iai reiakinan ana koaua te Baibara. (2 I-Korinto 4:4) Te koaua bwa a tukaki aomata aika a kaaitara ma kangaanga aikai man reiakinan taekan te Atua ao ni karikirakea tangirana irouia?
E ataia Iesu bwa ibukini kangaanga aika a kaaitara ma ngaai tabemwaang, e na bon aki bebete iai irouia tangiran te Atua ao te ongeaba irouna. (Mataio 19:23, 24) Ma e kauringia taan rimwina Iesu bwa e ngae ngke e taraa ni kangaanga te tokanikai i aoni bwaai n tutuki nakoia aomata, ma “e konai bwaai ni kabane te Atua.”—Mataio 19:25, 26.
Iangoi koaua aikai: E a tia Iehova ae te Atua ni karaoa te mwakuri ni kakoauaa raoi bwa ana Taeka ae te Baibara bon te boki ae akea n ai arona ae rangi ni butanako n te aonnaba. E a kaman taekinaki n te Baibara bwa e na tataekinaki “n te aonnaba ni kabutaa,” te rongorongo ae raoiroi ibukin te Atua ao ana kantaninga ibukin te aonnaba. (Mataio 24:14) Ni boong aikai, a tataekina te rongorongo ae raoiroi anne Ana Tia Kakoaua Iehova n aaba aika a raka i aon 230 ao ni katauraoi booki aika aanaki man te Baibara n taetae aika 500 tabuni mwaitiia. Ma te koraki ake a aki kona ni wareka te Baibara, a boni kona naba n reiakina ae bati ibukin te Atua ae koaua rinanon matakuakinani baika karikaki.—I-Rom 1:20.
Irarikin anne, e taekinaki n Ana Taeka te Atua ae kangai: “E ukeuke n naano ni kabane Iehova, ao E atai reken naano ni kabane: ngkana tao ko ukoukoria, ao E na reke i roum.” (1 Rongorongo 28:9, BG)
Ngaia are e ngae ngke e aki berita Iehova bwa a na reke aia tai aomata nako ae titeboo, ma e kakoauaa raoi bwa a na reke aia tai aomata aika raraoi nanoia. E na kakoauaa raoi bwa te koraki ake a tuai n reke aia tai n reiakina taekana, e na reke naba aia tai rinanon te mangauti n te waaki ae boou i aon te aba ae raoiroi.—Mwakuri 24:15.