E Kakoauaaki Bwa Iai Tokini Mwakuri Aika Bubuaka!

EA TIA te Atua n anganira ana Taeka ae e kaira koreana, are e kabwarabwaraaki iai bukini karaoani mwakuri aika bubuaka irouia aomata. E a tia naba n anganira te inaomata ni karaoa ae ti tangiria ao te konabwai ni kaotiota te taotaonakinnano, n te aro are ti a kona ni motinnanoia bwa ti na aki karaoi mwakuri aika bubuaka. (Te Tua-Kaua 30:15, 16, 19) N iangoan aei, ti kona n atai anua nako aika bubuaka aika iroura ao ni karaoi aanga aika riai ibukini kaetakia. N tokina, ti na boni kukurei ma kaain rarikira ngkana ti rarawa ni karaoi mwakuri aika bubuaka.​—Taian Areru 1:1.

Ma e ngae n anne, n aki ongea kangaangan arora ni kataia n rarawa ni karaoi baika bubuaka, ma ti bon teimatoa ni karawawataaki n te aonnaba ni mwakuri aika bubuaka mairouia raora nako. E anga te kauring te Baibara ni kangai: “Ko na ataia bwa a na roko taai aika okoro aika karuanikai, ni kabaneani boong.” Ni kaotani baika karikii boong aikai bwa a na ‘okoro ma ni karuanikai’ e a manga reitia ni kangai: “Ane a nang riki aomata bwa taan tangiriia i bon irouia, taani bakimwane, taani kamoamoa, taan nanorieta, taan taetae ni kabuakaka, taan aki ongeaba irouia aia karo, taani bangaomata, taan aki kakaonimaki nakoia raoia, taan aki tatangira, taani kakanneti, taan uarao, taan aki taubaang, taan iowawa, taan riribaa te raoiroi, taani kamwamwane, taan aki kani bwerengaki, taani kainikatonga, taan tangira riki kakukurein te rabwata nakon tangiran te Atua, ao a baka n tangira te Atua ma a kabwaka ni maiuakina tangirana. Kam na tannako mairouia naakai.”​—2 Timoteo 3:1-5.

Tao ko bae n nora te taeka ae “kabaneani boong” n te taetae ni burabeti ane mwaneweaki i eta. Tera nanon anne iroum? A na ota angiia aomata n te taeka ae “kabaneani boong” bwa e nanonaki ae iai te bae e nang roko n tokina. Tao tera anne? Nori baike e beritan te Atua n ana Taeka.

A na bane ni kamaunaaki aomata aika buakaka.

“Ai ti teutana riki, ao akea naba te aomata ae buakaka: Eng, ko na tarataraa raoi ana tabo, ao akea naba. Ma a na abana te aba akana nimamanei; ao a na kukurei ni kabatian te raoi.”​—TAIAN ARERU 37:10, 11, BG.

“E kawakinia Iehova akana tangiria ni kabaneia; Ma E na kamaunaia akana buakaka ni kabaneia.”​—TAIAN ARERU 145:20, BG.

A na akea riki te rawawata.

“E na kamaiua ane e kai nanona ngkana e bubuti; Ma ane akea ana bwai, ane akea te tia buokia. E na kamaiu tamneiia man te babakanikawai ma te tiritiri.”​—TAIAN ARERU 72:12, 14, BG.

“A na manga kainaomataaki baika karikaki man te tautoronaki i aan te mka, ma ni karekea te inaomata ae rianako arona ae reke irouia natin te Atua.”​—I-ROM 8:21.

A na rauaki nanoia aomata ni baika a kainnanoi ibukini maiuia.

“A na tekateka, temanna i aan ana kurebe ma ana biku, ao temanna i aan ana kurebe ma ana biku; ao akea ae na kamakuia.”​—MIKA 4:4, BG.

“Ane a na katei auti, ao a na maeka i nanoia; ao a na uniki kurebe, ao a na kang uaaia. A na aki katea ae e na maeka i nanona temanna; a na aki unika ae e na kana uaana temanna: ba ai aron ana bong te kai aia bong au aomata, ao au koraki aika rineaki a na kamaania ni bwain aia makuri baiia.”​—ITAIA 65:21, 22, BG.

E na taabangaki te kaetitaeka raoi.

“Tiaki e na boni karaoa te kaetitaeka raoi te Atua nakoia ana koraki aika rineaki ake a tang nakoina ni ngaina ao ni bong? . . .  I tuangingkami, Bwa e na boni kawaekoaa karekean te kaetitaeka raoi nakoia.”​—RUKA 18:7, 8.

“E tangira te kaeti-taeka Iehova, Ao E aki kitania ana aomata aika itiaki. A kakawakinaki n aki toki.”​—TAIAN ARERU 37:28, BG.

E na oneaki mwin te bangaomata n te raoiroi.

“A reireiia n te raoiroi akana maeka i aonaba.”​—ITAIA 26:9, BG.

“Ni kaineti ma ana berita, ti kariariaa karawa ae boou ao te aonnaba ae boou, ae e na mena iai te raoiroi.”​—2 BETERO 3:13.

A a Bitaki Aomata​—Ngkai Naba

Akea te nanououa, bwa ti na bane ni kimwareirei ni berita akanne. Ma tera te karaunano ibukini kakoroani bukia? Ni koauana, iai iroura ngkai te bwai ni kakoaua ibukini kakoroani bukin ana berita nako te Atua. Tera te bwai ni kakoaua anne? Bon te koaua ibukia mirion ma mirion aomata ni katobibia te aonnaba ake a kamani kimwareirei, ngkai a tokanikai ni kaakian aroaroia n aron te bangaomata, te kammaira, ke te tiritiri, ao n tia naba n reiakina bwainan te koaua, te rau, ao te akoi irouia n tatabemania nako. Ni boong aikai, a a tia n tokanikai i aoni kangaanga ni kaineti ma te reeti, te katei, te nanonnaba, te waaki n tautaeka ao te kaubwai ae karekea te iraraure i marenaia aomata ake a tia ni karika te kairiribai ae korakora, te tiritiri, ao te katuturaraa mangkekei ni karokoa ngkai, Ana Tia Kakoaua Iehova ae te botaki n itaritari ae katobibia te aonnaba ae raka mwaitiia i aon itua te mirion.a A riki aeka ni bitaki aikai n taai aikai ao e a tauraoi iai aani kakoauaan ae a na boni koro bukin ana berita nako te Atua n te aro ae rangi ni korakora.

Ma tera ae kariki bitaki aikai? E reke kaekaan aei n te berita riki teuana n te Baibara are e koreia te burabeti ae Itaia ni kangai:

“E na maeka te kameanti i rarikin te tiibutetei, ao e na wene te rebari i rarikin te koti te tei; ao te kao te tei ao te raian te tei ao te kao ae kamarikaki, ni botaki; ao e na kaiririia te tei ae uarereke. . . . ao te raian e na katotonga te kao ni kaakang uteute aika mau. Ao e na takakaro te merimeri i aoni bangan te atibi, ao e na arora baina te tei ae toki ni mamma nako aoni bangan te baiba. Ane e na aki tabare te aba ma n ururu n au maunga ae tabu ni kabuta: ba a na buta aonaba n atakin Iehova, n ai aron taari ngkae e kabuta marawa.”​—Itaia 11:6-9, BG.

E koaua bwa e a kaman taekinaki n te taetae ni burabeti aei tii te tai are a nangi maeka iai ma te rau maan ma aomata? E aki, bwa e bati riki ae nanonaki nakon anne. Noria bwa e kaotaki ni kabanean te kibu anne te baere karika te bitaki: “A na buta aonaba n atakin Iehova.” E koaua bwa e bitaki aroaroia maan n ataakin te Atua? Bon tiaki ngaia anne. Ma e kona ao e boni bitii aroaroia aomata! E a kaman taekinaki n te taetae ni burabeti aei bwa te koraki ake a tangiri baika bubuaka, a na kitan aroaroia akanne ao ni karikirakei aroaroni Kristo ibukina bwa a reiakina ao ni maiuakina ana reirei te Baibara.

Iangoa ana katoto Pedro.b E kakoauaa teuaei bwa e buaka ibukin te kaetitaeka ae riai, ngke e ira buakon aia botaki taani kakeru aika tiritiri. E a tuangaki imwin ana kataneiai bwa e na karebwetaua aia auti ni maeka bureitiman. E a katikaki ni kabureaki ngke e tabe ni katauraoi ibukin anne. E kabureaki Pedro i nanon 18 te namwakaina, ao e teimatoa ni kekeiaki n urua te waaki n tautaeka. N te tai naba anne, ao e a moana ana reirei n te Baibara buuni Pedro ma Ana Tia Kakoaua Iehova. Ngke e a kainaomataaki Pedro, ao e a moana ana reirei n te Baibara, ike e a kaungaaki iai ni baike e reiakin ibukin Iehova ae te Atua, bwa e na karaoi bitaki aika korakora n aroarona ao n ana iango ni kaineti ma te maiu. E taku Pedro: “I kaitaua Iehova bwa akea ae I a tia n tiringnga n taai ake I kaaina iai te botaki ni kakeru ao n tiritiri. I a kabongana ngkai ana kabaang te taamnei ae te Baibara n taekina taekan te rau ni koaua ao te kaetitaeka ae riai nakoia aomata, ae reke n te rongorongo ae raoiroi ibukin Ana Tautaeka n Uea te Atua.” E bon roko naba Pedro n aia tabo ni maeka bureitiman are e iangoa ngkoa uruakana, bwa e aonga n tibwaa ana rongorongo ibukin te rau ao te aonnaba naba ae akea iai te tiritiri.

A kona n rangi n rotaki aomata n Ana Taeka te Atua are boni ngaia riki bukin onimakinan ana berita iroura, are e a kakoauaaki iai tokini mwakuri nako aika bubuaka. Eng, a na aki karaoi baika bubuaka aomata n aki toki ma a nang riki bwa aomata aika raraoi aroaroia. E na waekoa Iehova ni kamauna teuare nibwani mwakuri aika bubuaka are Tatan te Riaboro, are ti aki kona n noria ae e tabe ni kunemwaania waakin te aonnaba. E taekinaki ae kangai n te Baibara: “A bane kaain te aonnaba ni mena i aani mwaakan teuare buakaka.” (1 Ioane 5:19) E na maunanako n te tai ae waekoa. A na mauna naba te koraki ake a imanono n rawa ni katoki aroia aika bubuaka. Ai kakukureira te maiu n te tai ni kakabwaia anne!

Tera ae e riai ni karaoia temanna bwa e aonga ni kakoauai taai aika a na roko? Uringnga bwa e na karekei bitakini maiuia aomata ni boong aikai “atakin Iehova” ao e na karokoi naba bitaki ni katobibia te aonnaba n te tai ae e a kaan roko. Ko kona naba ngkoe ni kantaningaa te maiu n te aonnaba ae “e na mena iai te raoiroi,” n reken te atatai ae eti man te Baibara ao ni maiuakinna n aroni Pedro. (2 Betero 3:13) Ai ngaia are ti kaumakiko bwa ko na kamanena am tai ae reke ibukin ataakin te Atua ao Iesu Kristo, bwa e kona n reke iai iroum te maiu are aki toki.​—Ioane 17:3.

[Kabwarabwara ae nano]

[Kabwarabwaraan n iteraniba 9]

Ko kona naba ngkoe ni kantaningaa te maiu n te aonnaba ae “e na mena iai te raoiroi.”​—2 BETERO 3:13