Te Baibara Bon Ana Taeka te Atua ae E Kaira Koreana

Tera raoi are e nanonna te abotoro Bauro ngke e taku bwa e “kairaki korean te Koroboki ae Tabu ni kabane iroun te Atua”? (2 Timoteo 3:16) E koroboki Bauro n te taetae ni Kuriiti ao e kabongana te taeka ae nanona raoi “ikeraken te Atua.” E nanonna raoi iai Bauro bwa e kabongana taamneina ae raoiroi te Atua ibukini kairaia taani korea te Baibara bwa a na tii korei baike E tangiri.

E taku te abotoro Betero: A “taetae [taani korea te Baibara aikai] mairoun te Atua ngke a kairaki n te taamnei ae raoiroi.” (2 Betero 1:21) E a kona ngkanne te abotoro Bauro ni kabwarabwarai booki n te Baibara bwa taiani ‘koroboki aika tabu . . . bwa a kona ni kawanawanako bwa a aonga ni kamaiuko rinanon onimakinani Kristo Iesu.’​—2 Timoteo 3:15.

A bati aika matoa nanoia ni kakewea ae te Atua bon te tia korea te Baibara. A a tia taan tiribure ni kabuakakaa n te aro ae kamatauninga etin raoi te Baibara, n angiin te tai n ikotaki ma “te nano ae akea te karinerine iai ae kakeaani bongan taeka aika n te Baibara,” n aron ae e taekinna te tia rabakau i aoni bwaai ma ngkoa ae Sir Charles Marston. Tabeman, a kakeaa bongana bwa bon tii “otokaraki nikawai ao karaki ni kewe.”

Rinanoi Raoi Bwaai ni Kakoaua

Ma e kona ngkanne ni kakoauaaki te Baibara? E kakawaki etin raoi am iango i aon aei. Bukin tera? Bwa ngkana iai n te Baibara te rongorongo mairoun te Atua, ti na bon nanobaba ngkana ti kakeaa bongana ke ti kona naba ni kabuanibwai iai. E na rangi ni kerikaaki korakoran nanom ni kariaia kairam raoi n am mwakuri ao n atongnga bwa aan am koaua, ngkana ko iaiangoia bwa bon tii aia taeka aomata ao tiaki Ana Taeka te Atua.​—1 I-Tetaronike 2:13.

Ko na kanga ni motinnanoia bwa ko na kakoauaa te Baibara? Iangoia: Ko na kanga ni motinnanoia bwa ko na onimakinia aomata aika ko kaitiboo ma ngaiia? Ti kona ni kakoauaa te bwai teuana. Moan te kangaanga bwa ko na onimakina raoi te aomata ae ko aki bati ni kinaa. Tii ngkana ko a kinaia raoi aomata i nanon te tai ae maan ao n atai aroaroia, ao ngkanne ko a tibwa ataia bwa tao a bwabwaina te eti ke a kona n onimakinaki. Anne te aro naba ae ko kona n ataa raoi iai te Baibara. Tai kariaia n akea am titiraki te katautau ke iango aika tabeitera aika kamamaraa onimakinan te Baibara. Karekea am tai n iaiangoi bwaai ni kakoaua aika boutokaa te Baibara bwa e ‘kairaki koreana iroun te Atua.’

Taani Kanakorongorongo Ake Aongkoa A Boutokaa te Baibara ni Boong Aikai

Tai kariaia kabwaraan nanom n te koaua ae iai naba tabeman ake a taku bwa aongkoa a boutokaa te Baibara ake a a manga kabuakakaa koauana ao onimakinana. E taekinaki n te New Dictionary of Theology bwa angia taani kanakorongorongo i aon te Baibara ni boong aikai, a taku bwa Kristian ngaiia, ma a “na bon tii taekina te Baibara bwa aia rongorongo aomata.”

A bati taan rabakau n Aaro aika kauntaekaia bwa antai raoi te tia korei bokin te Baibara. N te katoto, a taku tabeman bwa te boki ae Itaia e aki koreaki iroun te burabeti are Itaia. A taku bwa e koreaki bokin te Baibara aei n te tai ae maan imwin ana bong ni maiu Itaia. E taekinaki n ana boki Lowther Clarke ae te Concise Bible Commentary bwa e “karaoaki irouia aomata aika mwaiti rinanon rooro aika bati.” Ma aeka n taeka akanne, a bon tarariaoa okiokin Iesu Kristo ma taan rimwina n atonga Itaia ibukini korean te boki aei.​—Mataio 3:3; 15:7; Ruka 4:17; Ioane 12:38-41; I-Rom 9:27, 29.

Ma ae rangi ni buakaka riki, bon tiriburean te Baibara n aron ana taeka te tia kanakorongorongo ae J. R. Dummelow, ngke e taku bwa taetae ni burabeti aika n te boki ae Taniera “bon tii rongorongoni baike a a tia n riki ma e a manga taekin te tia korea te Baibara bwa aongkoa taetae ni burabeti.” Ngaia are, a a manga kakeaa naba iai bongan te bwai ni kakoaua are e bon taekinna Iesu Kristo. E kauring Iesu bwa te baere taekinna bon te “te bwai ae koro n ribaaki ae kauekea te urubwai, are e taekinaki rinanon Taniera are te burabeti bwa e tei n te tabo ae tabu.” (Mataio 24:15) E riai ngkanne bwa e na kakoauaa te Kristian ae e a tia Iesu Kristo n uataboa keweaia aomata, n aron are e a boutokaa rongorongon rimoa are aongkoa te taetae ni burabeti? E bon aki.

E Kakawaki Ataakin Aei ke E Aki?

Tao ane ko na titiraki ni kangai: “E kakawaki ataakin ae antai ae korei bokin te Baibara?” Eng, e rangi ni kakawaki. Ko na kakoauaa te beeba ae taekinaki bwa bon ana kabanea ni moti raoraom ibukini matena ao ana kaburebwai nako, ngkana arona bwa e a oti koauana bwa e bon aki koreia? Iangoia bwa tao a tuangko taan rabakau bwa bon tii te katoto ni kewe te beeba anne, bwa a a tia ni korei baika a kakoauai bwa ana iango raoraom raoraona ake tabemwaang riki. E aki ngkanne kamangoraki iai kakawakin te beeba anne? Ko kona ngkanne n onimakinna raoi bwa bon anne ana kabanea ni moti raoraom?

Titeboo naba anne ma ae e riki nakon te Baibara. Ti na aki mimi ngkai a a rangi ni bati aomata, n ikotaki naba ma te koraki ake a taku bwa Kristian ngaiia, aika a taku bwa a inaomata n tarariaoi reirei ibukini bwainan te eti, te aroaro ni maiu ae riai ni kaineti ma te wene n taanga ao a a bati riki. Mwaitira te tai ae ko a tia n ongongo iai bwa a kamangora te Baibara aomata n aia taeka ae kangai, “Aa, ma anne ngkoe e mena n te O Tetemanti!” ae titeboo ma a nanonna bwa e a aki rangi ni manena. Ao a taekina aei n aki ongea te koaua are e kabwarabwaraa te abotoro Bauro bwa te O Tetemanti bon “te koroboki ae tabu” ae ‘kairaki koreana iroun te Atua.’

Tao ko kona ni ngurengure ni kangai: “Ko bon aki kona n tii kakeai bongan aia bwai ni kakoaua taan reirei ni kabane i aon te Baibara.” Eng, ko bon aki kona! N te katoto, ti bon riai n rangi ni kakaitau n te atatai ae boto i aon te ukeuke ae eti raoi ae buokira ni kinaa te moan taetae n te Baibara. E teretere bwa a rin i nanon te moan taetae n te Baibara kairua aika uarereke ao e a kaeweaki ao ni manga kaeweweaki i nanon tienture aika bati. Ma e ngae n anne, uringnga bwa e rangi ni kaokoro ataakini kairua aika uarereke ake a rin i nanoni katotoni moani koroboki ibukin te Baibara ae bwanin, ma kakeaani bongan te Baibara bwa aia ototo aomata.

Kateimatoa Onimakinan “te Koroboki ae Tabu”

Imwain raoi taekinan ae e kairaki korean te Baibara iroun te Atua, e tuangaki Timoteo irouni Bauro bukini kakawakin te rongorongo ae kairaki koreana n te taamnei. E taku: “Ni kabaneani boong . . . ane a na ririkirake riki ni buakaka aomata aika buakaka ma taani mwamwanaa te aba, ni bureburea te aba ao ni burebureaki.” (2 Timoteo 3:1, 13) N ana bong Bauro, a taraa ni kamani kamanenai “taeka n anainano” ‘mwaane aika wanawana ao n rabakau’ ni burebureia iai aomata ao ni kamamaraa onimakinan Iesu Kristo irouia. (1 I-Korinto 1:18, 19; I-Korote 2:4, 8) E riki bwa te bwai ni kamanomano man aia kariri, kaumakan Timoteo iroun te abotoro Bauro are e na ‘teimatoa ni kakairi ni baike e reiakin mangke te merimeri ngaia rinanon te koroboki ae tabu’ ake mairoun te Atua.​—2 Timoteo 3:14, 15.

Titeboo kakawakini karaoan anne iroum ni “kabaneani boong” aikai. Tai kamangora te taeka ibukin te karuanikai ae kona n riki mani burebuream n “taeka n anainano” aika a rangi n ringa te nano mairouia aomata aika rangi ni wanawana. Ma n oneani mwin anne, kakairi irouia Kristian ake n te moan tienture ni kamanoko n arom n onimakini raoi baika ko a tia n reiakin n te Baibara, ae bon Ana Taeka te Atua are e kaira koreana.

A kukurei Ana Tia Kakoaua Iehova ni buokiko ni karikirakea onimakinan te Baibara iroum. N te katoto, a kona ni kaotii nakoim aroni booto n reirei n te Baibara ni kona n onimakinaki raoi mangkekei ni karokoa ngkai, boraoin te Baibara ma rabakaun aonnaba ngkana e maroroakini baika a karikaki, aroni boraoini kanoana mai moana ni karokoa tokina, koauan ae akea kairuan taetae ni burabeti ake iai ao a a bati riki. Ngkana ko kan atatai, tai tabwara ni koroboki nakoia taani boreetia te maekatin aei ibukin te rongorongo ae e a tia ni buokiia mirion ma mirion aika raraoi nanoia n ataia ae te Baibara bon Ana Taeka te Atua.