E Koaua ae te Baibara Ana Taeka te Atua?
“E kairaki korean te Koroboki ae Tabu ni kabane iroun te Atua ao e manena ibukin te angareirei, ao ibukini boaan te aomata, ibukini kaetani bwaai, ao ibukin te reirei ni kaetieti ae boraoi ma ana kaetitaeka te Atua, bwa e aonga n taubobonga iai ana aomata te Atua, ma n tauraoi raoi nakoni mwakuri aika raraoi ni kabane.”—2 TIMOTEO 3:16, 17.
Ai maoara ana taeka te abotoro Bauro ngke e taekina rianakoni kakawakin te Baibara! Ni koauana, e bon nanona iteran te Baibara are iai irouna n te tai arei, ae taiani koroboki are a a aranna aomata n tabetai bwa te O Tetemanti. Ma n te boto n reirei, e kaineti raoi matoan ana taeka nakoni booki n te Baibara ni kabane aika 66, ao i buakon akanne bon ake a koreaki irouia taan rimwin Iesu ake a kakaonimaki n te moan tienture C.E.
Ko rangi ni karinea te Baibara n aroni Bauro? N am iango a boni kairaki iroun te Atua taani korea te Baibara? Anne aia iango Kristian ake n te moan tienture. Aei aia koaua n taai nako Kristian ni koaua. N te katoto, n te ka-14 n tienture ao e iangoa te Baibara mataniwin te Aro teuana ae kaain Engiran ae John Wycliffe bwa “te tua ibukin te koaua ae aki kona ni kairua.” E taekinaki n te New Bible Dictionary, ni kaineti ma ana taeka Bauro akana mwaneweaki mai moa riki, bwa “e kamatoai raoi koaua nako aika taekinaki n te Baibara ni kairan koreana rinanon taamnein te Atua.”
Bibitakin Iango ni Kaineti ma te Baibara
Ma e a kekerikaaki onimakinani mwaakan te Baibara irouia angia aomata n taai aika tibwa nako. E taekinaki ae kangai n te boki ae The World’s Religions: “N aia iango, a bane Kristian n [teimatoa] ni butimwaea mwaakan te Baibara bwa e na kairiia n aia mwakuri ao aan aia koaua.” Ma bon akea koauan anne n aia mwakuri. A a bati aomata ngkai aika a iangoa te Baibara bwa bon tii “te boki ae kanoana boni katei aika aki kona n onimakinaki.” E ngae ngke a kakoauaaki bwa taani korea te Baibara boni mwaane aika korakora aia onimaki, ma a taraaki irouia te koraki akanne bwa bon tii mwaane aika aki kororaoi ake a kakorakoraia ni kabwarabwarai ana koaua te Atua aika nano, ma akea aia atatai ao otaia n te onimaki n arora ni boong aikai.
Ni koauana, a rangi ni karako aomata ni boong aikai aika boni kariaia te Baibara bwa e na kairi aia iango ao aia mwakuri. N te katoto, mwaitira am tai n ongongo aia taeka aomata ae a taku bwa a a bane tain ana kaetieti te Baibara ibukin te aroaro ni maiu ae riai, ao a aikoa manena? A taku aomata aika bati bwa a inaomata ni kamangori tuua aika n te Baibara ao booto n reirei ke ni boni kakeai bonganaia ni kabane ngkana e bebete riki karaoana. Tabeman aomata ake a taku bwa Kristian ngaiia, a kainikatonga n aki kubara te bae taekinaki n te Baibara ibukin te wene ni bure, te wene ni kimoa, bwainan te eti ao te mamanging.—1 I-Korinto 6:9, 10.
E aera ngkai e riki aei? E kaotaki bukina teuana ni moan te ka–20 n tienture iroun te tia rabakau i aoni bwaai mangkoa ae Sir Charles Marston n ana boki ae The Bible Is True. E taku teuaei bwa a rangi ni waekoa aomata ni “butimwaei ao n aki ngurengure n aia katautau aika bati taani kororongorongo ni boong aikai,” ake a rangi ni kaitaraa etin raoi te Baibara. E kona n teimatoa kakoauaan anne ni boong aikai? Tera arom ae riai ni kaineti ma aia iango taan rabakau ake a urua onimakinan te Baibara? Nora ae e na taekinaki n te kaongora ae imwina i aon aei.