E Koaua ae A Raoiroi Aaro Nako?

TI MAEKA ngkai n te aonnaba ae a bati iai Aaro aika kakaokoro. E kaotaki n te kakaae teuana ae e a tibwa tia ni karaoaki bwa ni katobibia te aonnaba, iai 19 Aaro aika rangi ni bubura ao tao 10,000 Aaro aika uarereke. Man te kakaokoro aei, a kariaia aomata bwa a na karaoi aia rinerine aika tuai man nonoraki ma rimoa. Ma e koaua ngkanne ae e rangi ni kakawaki bwa te Aro raa ae ko rineia?

A taku tabeman bwa Aaro aika kakaokoro aikai, titeboo ma kawai aika kakaokoro aika kairirarake nakon te maunga. E aki kakawaki irouia bwa te kawai raa ae a na toua, kioina ngkai bon titeboo te tabo ae a na kairaki nako iai. N aia iango ao a taku bwa bon tii temanna te Atua ae Moan te Mwaaka ao a bane Aaro ni kona ni kairiri nakon te Atua.

A Kairiri Kawai Nako Nakon te Atua?

Tera are taekinaki ibukin te reirei aei iroun Iesu Kristo, are te tia reirei n te Aro ae rangi ni karineaki n rongorongo nikawai? E taku nakoia taan rimwina: “Rin n te mataroa are wariki.” Bukin tera? “Bwa e warebwe te mataroa, ao e raababa te kawai are nakon te kamaunanakoaki, ao a uanao akana rin iai. Bwa e wariki te mataroa, ao e irariki te kawai are nakon te maiu, ao a karako akana kunea.”​—Mataio 7:13, 14, The Holy Bible​—New International Version.

E nanonna ngkanne Iesu bwa a kairiri Aaro tabeua nakon te “kamaunanakoaki”? Ke tao e angareirei bwa tii aomata aika a aki kakoauaa te Atua aika a na toua te kawai ae warebwe, ma ake a kakoauaa te Atua a na toua te kawai ae irariki n aki ongeia bwa tera aia Aaro?

Bon tibwa imwin taekinani kawai aika tii uaai aikai ao e a manga kangai Iesu: “Kam na kawakiningkami nakoia burabeti ni kewe, akana nako imi ni baka n tiibu, ma boni kameanti aika kaakang uakekei i nanoia.” (Mataio 7:15) E manga taku riki: “A aki bane n rin n uean te Atua akana kangai nako Iu, Te Uea, Te Uea; ma e na rin iai ane taua ana taeka [ma ni karaoa te bwai ae tangiria] Tamau are i karawa.” (Mataio 7:21) Ngkana iai te aomata ae aranaki bwa te burabeti ke tao e arana Iesu bwa ana “Uea,” e riai ngkanne bwa ti na aranna bwa te aomata ae taua te Aro ao e kakoauaa te Atua. E teretere raoi ngkanne ngke e a kauring Iesu bwa a aki raoiroi Aaro nako ao a na aki riai n onimakinaki taan reirei n Aaro ni kabane.

Ko Kona ni Kinaa te Kawai ae Wariki?

Ko na kanga ngkanne ni kunea te kawai ae wariki ae koaua are e tiki nakon te maiu, mai buakoni kawai aika nga ma nga mwaitiia ngkai a bon aki kairiri kawai ni kabane nakon te Atua? Iaiangoa te kaikonaki aei: Iangoia bwa aongkoa ko a bua i nanon te kaawa ae buburakaei. Ko a iangoia bwa ko nang kakaaea buokam. E a tuangko naba temanna are e taku bwa e rangi ni mwaatai n te kawai, bwa ko na boonako mainiku. Are temanna, e kaumakiko bwa ko na boonako maeao. Ao are temanna, e taku bwa ko na bon rinea ae ko taku bwa e raoiroi riki iroum. Ma ni bon tokina, temanna te aomata are e a buuta naba te mwabe ae kona n onimakinaki ao ni kotea nakoim te kawai ae eti. Ao e a manga anganiko te mwabe bwa ko aonga ni kona ni kaira kawaim iai. Tiaki nanona ngkanne bwa ko nang onimaki raoi bwa ko na bon roko n te tabo are ko na kaea?

Mangaia are, n aron naba anne, ti kainnanoa te bwai ni kairiri ae kona n onimakinaki n iangoan ae te Aro raa ae ti na kaainna. Ma iai nibwan te kairiri ae tauraoi? Eng, bon iai. Bon te Baibara nibwan te bwai ni kairiri anne bwa kaanga ara mwabe, ae e kabwarabwaraaki taekana ni kangai: “E anganaki te aba te Baibara ni kabanea iroun Tamnein te Atua, ao e manena nakon te reirei, ao nakoni kaotan ana buakaka te aomata nako ina, ao nakoni manga-kaetana, ao nakoni kawanawanana n te raoiroi.”​—2 Timoteo 3:16.

E bae naba n iai te Baibara n am taetae, are ko kona ni kamanena bwa te bwai ni kairiri ae e na kairiko nakon te taromauri ae koaua. E katauraoaki naba te Baibara ae kona n onimakinaki ae e ataaki n arana ae te New World Translation of the Holy Scriptures, irouia Ana Tia Kakoaua Iehova, ake ngaiia aika boreetia te maekatin aei. Mangaia are, ngkana tiaki ngkoe temanna mai buakoia Ana Tia Kakoaua Iehova, ko na bae ni butimwaei rairai tabeua riki ibukin rinanoakin reirei aika katereterea te Aro ae raoiroi ao ae buakaka. Ai ngaia are, kaongora aikai a mwanewei naba kiibu mani Baibara riki aika bati ake a korakora karineaia n Aaro riki tabeua.

Ngkana ko wareki kaongora aika imwin aei ao kabotaui baika ko atai ma baika a taekinaki n te Baibara. Ururinga ana taeka Iesu ake a kaineti ma arora ni kona n ataa okoron te Aro ae raoiroi ma ae buakaka. E kangai: “E kariki ua aika a raraoi te kai ae e raoiroi, ma e kariki ua aika a bubuaka te kai ae e buakaka. E aki kona ni kariki ua aika a buakaka te kai ae e raoiroi, ao e aki kona ni kariki ua aika a raraoi te kai ae e bubuaka.” (Mataio 7:17, 18, BK) Iaiangoi uaa aika raraoi aika tenua ake a taekinaki n te Baibara aika a na kona ni katerea te “kai ae raoiroi.”

[Kabwarabwaraan n iteraniba 3]

Titeboo te Baibara ma mwaben te kawai ae kona n onimakinaki ae kona ni buoka te aomata ni kunea kawain te Aro ae koaua