A Kona Aomata n Ota Raoi ni Kanoan te Baibara?
“A wawareka te Baibara ni katoa Taabati kaain au utu. Ma I aki rangi n unga iai. I kakoauaa bwa te Baibara bon Ana Taeka te Atua, ma e rangi ni kangaanga otau raoi n angiini kanoana.”—Steven mai Buritan.
“I kataia ni wareka te Baibara ngke 17 au ririki. I noria bwa e rangi ni kangaanga te ota raoi ni kanoana, ai ngaia are I a katoka naba warekana.”—Valvanera mai Tibein.
“I a tia ngkoa ni wareka te Baibara n te taina kioina ngkai I taku bwa I riai ni warekia ngkai te Katorika ngai. I kabanea tenua te ririki ni warekia ni kabwaninna! Ma e kangaanga otau raoi n angiini kanoana.”—Jo-Anne mai Aotiteria.
E TEIMATOA n riki te Baibara bwa te boki ae rangi n ataaki irouia angia aomata n te aonnaba. E teimatoa kabonakoan te Baibara n te mwaiti ae rangi n raka riki nakoni booki ni kabane, bwa e kona n reke irouia aomata aika bati riki, n taetae aika mwaiti riki ao n aaro aika mwaiti riki n aron te viteo teibi, taian CD ao DVD n aron ae e aki nonoraki ma ngkoa. E ngae ngke a bati aika iai aia Baibara ma e kangaanga bwa a na ota raoi ni kanoana. Anne naba arom?
E Tangiria te Atua Are te Tia Korea te Baibara Bwa Ti na Ota Raoi n Ana Taeka?
E taekinaki ae kangai n te Baibara: “E anganaki te aba te Baibara ni kabanea iroun Tamnein te Atua.” (2 Timoteo 3:16) Eng, bon Iehova ae te Atua te tia Korea te Baibara. E koaua ae e tangirira bwa ti na ota raoi n ana Taeka? Ke tao e iangoa korean te Baibara bwa e na rangi ni kangaanga otaia raoi iai aomata nako, ao e tii rineiia tabeman n ai aroia mataniwi n Aaro ao taan rabakau n te Baibara bwa a na ota raoi iai?
Iaiangoi kibun te Baibara aika i nano aikai:
“Te tua aei ae I tuangko n te bong aei, e aki bati ni kanganga i roum, ao e aki raroa naba.”—Te Tua-Kaua 30:11.
“E karekea te ota kabaraan am taeka, e wanawana iai te nanoro.”—Taian Areru 119:130, BK.
“N te aua arei ao E kimareirei Iesu iroun te Tamnei are Raoiroi, ao E kangai, I karaoiroiko, Tamau, ae Ueani karawa ma aonaba, ba Ko karaba baikai nakoia akana rabakau ma akana wanawana, ao Ko kaotioti nakoia merimeri.”—Ruka 10:21.
Ni koauana, e bon tangiriko te tia Korea te Baibara bwa ko na ota raoi n ana Taeka! E ngae ngke e koaua anne, ma a boni bati naba aomata aika a iangoa te Baibara bwa te boki ae rangi ni kangaanga te ota raoi ni kanoana. Tera ae na kona n ibuobuoki n aei? A kateretereaki aanga n ibuobuoki aika tenua ni kaongora aika imwin aei, ake a na kona ni buokiko bwa ko na ota raoi ni kanoan te Baibara.