Katoka Nanokokorakim

“Ko aera ngkai ko nanokokoraki, ngkoe ae e karako am onimaki?”​—Mataio 14:31.

TERA TE KANGAANGA? N taai tabetai ao a bon nanououa naba taan rimwin Iesu. (Mataio 14:30; Ruka 24:36-39; Ioane 20:24, 25) Ni koauana, e kabwarabwaraaki n te Baibara bwa te aki onimaki bon “te bure ae kai nimtira.” (Ebera 12:1) E korea ae kangai te abotoro Bauro: “A aki bane aomata n toa n te onimaki.” (2 I-Tetaronike 3:2) E aki nanonaki n aei bwa akea aia konabwai tabeman ni maiuakina aia onimaki, ma a boni bati aika a aki kakorakoraia ni karekea irouia. E na boni kakabwaiaa te Atua aia kekeiaki akana a karaoa aei.

KO NA KANGA N TOKANIKAI I AON TE KANGAANGA? Karekei ataakin reirei aika kakawaki akana ko nanokokoraki iai. N te katoto, e nanokokoraki te tia rimwin Iesu ae Tooma ni kautan Iesu, e ngae ngke a taekinna taan rimwini Kristo ake tabemwaang bwa a a tia n noria. E tangiria Tooma n nora te bwai ni kakoaua ni matana. Tera mwina? E kaota te bwai ni kakoaua nakoina Iesu are e kainnanoia ibukini kakorakoraan ana onimaki.​—Ioane 20:24-29.

Ibukini katokan nanokokorakira, e a anganira Iehova ae te Atua kaeka aika ti kainnanoi rinanon te Baibara. N te katoto, a bati aika a kabuaa onimakinan te Atua ibukina bwa a bukina te Atua n aaro aika teretere ke aika aki bati n teretere n rikini buaka, te iowawa ao karawawata ake a taonaki iai aomata. Tera ae taekinaki n te Baibara n aei?

E aki tautaeka te Atua rinanon aia tautaeka aomata. E taekinaki iroun Iesu taekan te taamnei ae aki kona n noraki ae Tatan bwa “uean aon te aba.” (Ioane 14:30) E tuanga Iesu Tatan bwa e na anganna te mwaaka i aoia tautaeka ni kabane i aon te aba, ngkana e taromauria n tii teuana te tai ngke e kangai: “N na anganiko tauan taekan aikai ni kabane ma tamaroaia: ba I anganaki aei; ao ane I kan anganna, ao I anganna.” E aki kakewea Iesu ae iai iroun Tatan te aeka ni mwaaka anne. Ma n oneani mwin anne e kangai: “E koreaki ae kangai, Ko na taromauria Iehova ae Atuam, ao ko na toro i Rouna n ti Ngaia.” (Ruka 4:5-8) Bon Tatan ao aia tautaeka aomata aika a riai ni bukinaki n rikini karawawataaia aomata n te aonnaba aei ao tiaki te Atua.​—Te Kaotioti 12:9, 12.

E na waekoa Iehova ae te Atua ni kamaunai bwaai ni kabane aika a karikii karawawata. E a kamani bairea te Tautaeka n Uea ke te tautaeka i aan Natina ae Kristo Iesu are e na tautaekania botannaomata. (Mataio 6:9, 10; 1 I-Korinto 15:20-28) Ni kakoroani bukin te taetae ni burabeti ae n te Baibara, e a tataekinaki ngkai te rongorongo ae raoiroi ibukin te Tautaeka n Uea aei ni katobibia te aonnaba. (Mataio 24:14) E na boni waekoa ni kamaunaia aomata ni kabane aika kakaitaraa ana waaki te Tautaeka n Uea aei ao baike a karikii karawawata nakoia naba aomata.​—Taniera 2:44; Mataio 25:31-33, 46; Te Kaotioti 21:3, 4.

TERA UAANA? Titeboo te koraki ake a nanokokoraki ma naao aika kamwaeieieaki n te “angi nako ae te reirei nako, ni mamanaki irouia aomata.” (I-Ebeto 4:14; 2 Betero 2:1) Ni kaitaraan anne, a na kona n “teimatoa n te onimaki” te koraki ake a a tia ni karekei kaeka aika karaunano nakon aia titiraki.​—1 I-Korinto 16:13.

A kukurei ni buokiko taani korea te maekatin aei aika Ana Tia Kakoaua Iehova bwa ko na karekei kaekaan titiraki akana a karekea nanokokorakim n am onimaki. A kaoko naba bwa ko na bobotaki ma ngaiia ao n neneri aia reirei i bon iroum. E na rangi ni kakorakoraaki onimakinan te Atua iroum ngkana ko karaoa aei.

Ibukin rongorongona riki tabeua, nora te boki ae Tera Ana Reirei ni Koaua te Baibara? mwakoro 8, ae kangai atuna, “Tera Uean te Atua?” ao mwakoro 11, ae atunaki n ae kangai, “E Aera Ngkai E a Aki Katoka te Rawawata te Atua?”a

[Kabwarabwara ae nano]

[Taamnei n iteraniba]

A na boni karekea aan aia onimaki ae nene te koraki ake a a tia ni karekei kaeka aika karaunano nakon aia titiraki