Reiakina te Koaua Ibukin Iesu

“E tangiriia aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.”​—Ioane 3:16.

TERA TE KANGAANGA? A kona n taku tabeman bwa bon akea Iesu ma ngkoa. A ataia tabemwaang bwa bon iai ma a kamatoaa n taekinna bwa bon te aomata n ai arora ae e a kaman tia ni mate.

KO NA KANGA N TOKANIKAI I AON TE KANGAANGA? Kakairi iroun te tia rimwini Kristo ae Natanaera.a E tuangnga raoraona ae Biribo bwa e taku n ana iango bwa e a tia n reke irouna te Mesia ae “Iesu are te I-Natareta, are natin Ioteba.” Ma e aki n are e a tii kakoauaa naba ana taeka Biribo Natanaera. Ni koauana e kaekaa ni kangai: “E kona n riki te bwai ae raoiroi mai Natareta?” E ngae ngke e nanououa Natanaera, ma e boni butimwaea naba ana kakao Biribo ae kangai, “Mai, noria” i bon iroum. (Ioane 1:43-​51) Ko na boni kakabwaiaaki naba ngkoe ngkana ko neneri i bon iroum bwaai ni kakoaua ibukin Iesu. Tera ae ko kona ni karaoia?

Kakaaei bwaai ni kakoaua n rongorongon rimoa bwa bon te aomata ni koaua Iesu. Bon taani korei rongorongon rimoa aika uoman aika karineaki n te moan tienture Josephus ao Tacitus aika tiaki Kristian. A taekinna bwa bon te aomata ni koaua Iesu Kristo are e a tia ni maiu i aon te aba. E korea ae kangai Tacitus ni kaineti ma rongorongon te Embera n Rom ae Nero are e bukinia Kristian ibukin rikin te urarake i Rom n 64 C.E: “E kamatoa ana bukibuki ibukin te urarake Nero nakoia Kristian, ae te koraki aika a a rangi ni ribaaki irouia kaain Rom ibukin aroaroia, ao a a karawawataaki n te aro ae iowawa. E anganaki Kristo are e nako mai iai te ara ae Kristian te katuuaaeaki ae te kabanea ni korakora n ana tai n tautaeka Tiberio iroun temanna mai buakoia ara tia motikitaeka ae Bontio Birato.”

Ni kaineti ma rongorongon Iesu ao Kristian ake rimoa mairouia taani korei rongorongon rimoa n te moan ao te kauoua n tienture, e taekinaki ae kangai n te Encyclopædia Britannica, are e koreaki n 2002: “Rongorongo aikai a kakoauaa ae taani kakaaitaraia Kristian n taai ake rimoa, a bon aki nanououa n te koaua are e a bon tia ni maiu Iesu. E moani kauntaekaaki aio n akea bukina ae riai n tokin te ka-18 n tienture, i nanon te ka-19 n tienture ao ni moan te ka-20 n tienture.” E taekinaki ae kangai n te kaongora teuana n te The Wall Street Journal n 2002: “A a kamani kakoauaa angia taan rabakau bwa e a bon tia ni mena i aon te aba Iesu are te I-Natareta, ma tii tabeman aomata ake a aki kakoauaa ae iai te Atua, ae a kaokoro aia iango n aei.”

Iangoa te bwai ni kakoaua ni kaineti ma kautakin Iesu. Ni katikan Iesu irouia taani kakaaitara ao a a kitanna raoraona aika rangi ni kaan ma ngaia, ao raoraona are Betero e kakeaa naba Iesu ngke e a rangi ni maaku. (Mataio 26:55, 56, 69-75) Imwini katikan Iesu, ao a a maenako taan rimwina. (Mataio 26:31) Ma imwin anne, a a manga waekoa ni mwakuri korakora taan rimwina. A ninikoria Betero ao Ioane ni kaaitaraia aomata ake a bouruakina tiringan Iesu. A a rangi ni kaungaaki nanoia taan rimwin Iesu n te aro are a a tataekina ana reirei ni kabutaa te Embwaea n Rom ao a a kukurei riki ni mate nakoni kakeaan aia koaua.

E kanga n riki te bitaki teuana ae rangi ni korakora ni kaineti ma te aroaro aei? E kabwarabwaraa te abotoro Bauro bwa e kautaki mai buakoia maate Iesu ao e “kaoti nakoni Keba [Betero], ao rimwi, nakoia uaake tengauni ma uoman.” E reitia naba Bauro ni kangai: “Ao rimwi, E kaoti nakoia taari aika nimabubua tabun ni bon ti te norakina.” A boni maiu angia te koraki ake a nori baikanne n te tai are e korei taeka aikai Bauro. (1 I-Korinto 15:3-7) Tao a na kakai kakeai bongani kaotioti ni kakoaua mairoun temanna ke uoman taani kananououai koauani bwaai. (Ruka 24:1-11) Ma ai bon te bwai ni kakoaua ae rangi n otara raoi bwa e boni kautaki Iesu mai buakoia maate, aia taeka ni kakoaua aomata aika e raka i aon nimabubua mwaitiia ake a nori ni mataia.

TERA UAANA? A kona ni kabwaraaki aia bure te koraki ake a onimakina Iesu ao n ongeaba irouna. Ao a na karekei naba mataniwin nanoia aika itiaki. (Mareko 2:5-12; 1 Timoteo 1:19; 1 Betero 3:16-22) Ngkana a mate, e berita Iesu bwa e na kautiia “n te bong n toki.”​—Ioane 6:40.

Ibukin rongorongona riki tabeua, nora te boki ae Tera Ana Reirei ni Koaua te Baibara? mwakoro 4, ae kangai atuna, “Antai Iesu Kristo?” ao ni mwakoro 5 ae atunaki n ae kangai, “Te Kaboomwi ae Ana Bwaintangira te Atua ae Moanibaan te Raoiroi.”b

[Kabwarabwara ae nano]

[Taamnei n iteraniba 7]

Kakairi iroun Natanaera ni kakaaei bwaai ni kakoaua ibukin Iesu