E Kaotaraeaki Mwaakan Te Atua N Taian Itoi
“Kaeka matami nako karawa, ao tara Ae karaoi baikai, Ae kairiia nako aia taanga ni warekiia: E kabaneia ni weteiia n araia; ngkae e bati mwakana, ngkae E korakora, ao e aki bua temanna mai buakoia.”—ITAIA 40:28.
TAAI bon te itoi naba teuana ae tau buburana. Ma e ngae n anne, e boni bubura naba n te aro are e a kona n reke okiokin ara aonnaba aei 1,300,000 te tai. Angiin itoi aika uakaan, a uarereke riki nakon taai. Ma bon iai naba itoi aika rangi ni buburakaei riki nakon taai, n aron teuana ae aranaki bwa V382 Cygni, ae e kona n reke okiokin Taai iai 27 te tai.
Mwaitira te korakora ae nako man taai? Iangoa buburan te ai ae e na kainnanoaki bwa ko aonga ni kona n namakina kabuebuena ngkana ko tei n raroa ma iai ae 15 te kiromita. Ma raroan taai ma te aonnaba e nakon 150 te mirion te kiromita, ao e boni kona naba ni mwai kunim ni korakoran kabuebuena ngkana e uki te riringa! E kamimi bwa e rangi n uarereke korakoran taai ae roko n te aonnaba. Ma e ngae ngke e rangi n uarereke, ma e bon tau naba ibukini kamaiuan ara buraneti aei.
Ni koauana, a a tia taan rabakau ni warebwaia ao a taku bwa korakoran taai aei, e tau ibukin boutokaan te maiu ni buraneti aika 31 te tirion mwaitiia aika ai aron ara buraneti aei. Ke n taekinana teuana e kangai: Bwa ngkana e kona n tauaki korakoran taai n tii teuana te tekan, e na tau ngkanne te korakora anne ibukin ‘kamaiuan bwaai ni kabane ake n te United States, i nanon 9,000,000 riki te ririki,’ anne ana kaongora te Space Weather Prediction Center (SWPC) are e kanakoa i aon te internet.
E waerake korakoran taai mai nukana raoi, ae te tabo ae rangi ni kabuebue kanga ai aron te bwai ae mwaakaroiroi ae urui atom ao ni katiinakoa te kabuebue ae korakora. E rangi ni buburakaei taai ao n rangi ni matenten nako nukana, ao e kabanea mirion ma mirion ririki ngkana e na kaotinakoa korakorana nako mataawa. E kanakoa ana kaongora te SWPC i aon te internet ni kangai: “Ngkana e toki korakoran Taai n te bong aei, e na tibwa kona n namakinaki te mwaitoro 50,000,000 te ririki imwina!”
Manga iangoa ngkanne te koaua aei: Ngkana ko tararake nako karawa n te tairiki, ko a nori iai itoi aika nga ma nga mwaitiia aika a kanakoa naba te korakora ae bati n aron taai. Ao a kunea taan rabakau bwa birion ma birion riki mwaitin itoi n te iuniweeti!
A riki mai ia itoi aikai? E ngae ngke a mwaiti taani kakae aika a aki ataa kaekaan te titiraki anne, ma a bon teimatoa naba ni kakoauaa ae e boni karina n riki i bon irouna ara iuniweeti 14 te birion te ririki n nako. Ma e tii taekina ae kangai te Baibara: “Ngke a tuai ni karikaki bwaai, ao E karika karawa ma aonaba te Atua.” (Karikani Bwaai 1:1) E kakoauaki ngkanne bwa Teuare e karikii itoi aika a kanakoa te oota ae bati, e kona n aranaki bwa te aomata ae “E korakora.”—Itaia 40:28.
Aron te Atua ni Kabonganaa Mwaakana
E kabonganaa mwaakana Iehova ae te Atua ni kakorakoraia ake a kakaraoa nanona. N te katoto, e kakorakoraa te abotoro Bauro n reireinia aomata nako taekan te Atua. Bauro bon te aomata naba ae ai arora, ma e rangi n teimatoa ni kakaraoi mwakuri aika raraoi n aki ongei kakaitara aika korakora. E kanga n riki anne? Kioina bwa e kakoauaa ae e karekea te “mwaka ae moan te korakora” mairoun te Atua.—2 I-Korinto 4:7-9.
Ma e kabonganaa naba mwaakana Iehova ae te Atua, ni kamaunaia iai akana urui ana kaetieti ibukin te aroaro ni maiu ae riai n oin nanoia. E katitebooa Iesu Kristo korakoran mwaakan Iehova ni kamaunaia tii aika buakaka, ma kamaunan Totom ma Komora ao te Ieka naba are n ana bong Noa. E taetae ni burabetinna Iesu bwa n te tai ae e a kaan roko, ao Iehova e nang manga kabonganaa naba mwaakana ni kamaunaia iai aomata, ake a kakeaa Ana kaetieti.—Mataio 24:3, 37-39; Ruka 17:26-30.
Tera Aron Rotakim Iai?
Imwin kananoan am iango i aoni mwaakan te Atua are e kaotiotaki n itoi, e na boni bae n titeboo ngkanne am namakin ma te Uea are Tawita are e kangai: “Ngkana I taratarai am karawa ake ana makuri tabonibaim, ma namakaina ma itoi, ake Ko motiki aroia; ao tera te aomata, ngkai Ko ururingnga? Ao natin te aomata, ngkai Ko kakawaria?”—Taian Areru 8:3, 4.
Eng, ti bon nora aroni mangorira ngkana ti taraa aron uarerekera ni kabotauaki ma buburan ao rababan te aonnaba aei. Ma ti bon aki riai n taonaki n te maaku ngkana ti iangoa mwaakan te Atua. E kaira te burabeti are Itaia Iehova bwa e na korei taeka aika karaunano ni kangai: “E angangania akana nimamate te kona [te Atua]; ao E kabatiai korakoraia akana aki konamaki. Ane a na bon nimamate ataei ni mwane ma ni kua, ao a na boni bwaka rorobuaka: ma e na manga reke te korakora irouia akana kaantaninga Iehova; a na mwemwe rake ni baiia ni kiba n ai aroia ikare; a na biribiri, ao a na aki kua; a na nakonako, ao a na aki nimamate.”—Itaia 40:29-31.
Ngkana ko bwarua kakaraoan nanon te Atua, ko na kona ni kakoauaa bwa e na bon anganiko taamneina bwa e na kateimatoako ni kakaraoan nanona. Ma ko bon riai ni bubutii ibukin anne. (Ruka 11:13) Ko na kona iai n nanomwaaka i aani kataaki ao ni kakorakoraki ni kakaraoa ae raoiroi, man ana ibuobuoki te Atua.—I-Biribi 4:13.
[Taamnei n iteraniba 7]
Ko na kona ni kakorakoraki ni kakaraoa ae raoiroi man ana ibuobuoki te Atua
[Taamnei n iteraniba 7]
Clockwise from top left: Whirlpool galaxy, Pleiades star cluster, Orion Nebula, Andromeda galaxy
[Taamnei n iteraniba 7]
E bubura riki taai n te aro are e kona n reke okiokin ara aonnaba aei 1,300,000 te tai
[Picture Credit Line n iteraniba 7]
Pleiades: NASA, ESA and AURA/Caltech; all others above: National Optical Astronomy Observatories