E Kaotaraeaki Wanawanan Te Atua N Ana Karikibwai

“E anganira te iangoraoi ma te wanawana ae e aki reke irouia man ni kaakang ma mannikiba.”​—IOBI 35:11, BK.

IAI aia konabwai mannikiba aika kamimi. A mataiakinaki mannikiba n aroia ni mwaatai ni kibakiba n akea aia kangaanga, irouia aomata ake a kakaraoi waanikiba. Tabeman mannikiba a boborau riaoni marawa n te raroa ae nga ma nga te kiromita, ao a roroko raoi n aia tabo n akea bureni kawaiia.

Teuana naba rabakauia mannikiba ae e kaotaraeaki iai wanawanan te tia Karikiia, bon aroia n itoman i marenaia rinanon tangitangia. Iangoi katoto tabeua.

Aia Taetae Mannikiba

A moana aia itoman aeka ni mannikiba tabeua ni moa mai nanon nanaia. N te katoto, e kona ni kamrarai bunnimoana aika wanua te mannikiba te aine ae te quail, ae kaka teuana ni katoa bong. Ngkana arona bwa titeboo rikirakeia bunnimoa aikai ni kabane, a na bae ngkanne n raure temanna imwin temanna i nanon te maan ae e na aki kee i aan wanibong. Ibukin anne, e na kaaitara ngkanne te tina ma te mwakuri ae kangaanga, bwa e riai n tabeakinia ana kiokio ake a biribiri n aki akaka ao n tokari naba ana bunnimoa ake a tuai n raure bwa e aonga ni kaabuei. Ma tiaki ngaia anne ae riki, bwa a bane n raure kiokio aika waniman aika quail aikai n te maan ae aki kee i aan onoua te aoa. E kanga n riki anne? Bukina teuana ae kakawaki ae a kunea taani kakaae, bwa n aia katautau a tataetae i marenaia quail aikai mai nanon nanaia, ao titeboo ma a baireia bwa a na bane n raure n te tai ae tii teuana.

Ngkana a a ikawai mannikiba, n angiin te tai, bon tii mwaane aika tatangitang. E riiriki aei n tain te iein bwa e aonga ni kanikinaeaki ana tabo ao e aonga naba n anaa nanoni buuna. A bane n toa aeka ni mannikiba aika nga ma nga ma aia taetae aika kakaokoro, ao a buokaki iai mannikiba aika aine ni kakaaei raoia aika bon aekakia.

N angiin te tai, a tangitang mannikiba n te moan ingabong ao ngkana e a kaani bung taai, ibukina bwa akea te kaberoro iai ao e aki bati ni baibati te ang are e na kamangaongaoa tangitangiia. A kunea taani kakaae bwa a kai otara riki bwanaaia n taai aikai, nakon are a na tang n te tawanou.

E ngae ngkai boni mwaane aika a tatangitang n angiin te tai, ma a bon tataetae naba mannikiba aika mwaane ao aine n tangitangiia aika kakaokoro. N te katoto, iai aia taetae aeka ni mannikiba aika taiani chaffinche aika ruaiwa aika kakaokoro. A kamanena teuana aia taetae ae kaokoro ngkana a katanoataa te kangaanga ae e na roko mai eta, tao n aron ae iai te mannikiba ae kakaaea konana. Ao teuana aia taetae ae kaokoro ibukini katanoatan te kangaanga ae e na roko mai aontano.

Te Bwaintangira ae Rianako

E rangi ni kamimi te rabakau are e karinna Iehova i nanoia mannikiba. Ma ngkana e iangoaki rabakauia aomata n itoman, e a raka riki ngkanne kamimin aroia aomata. E taekinaki n Iobi 35:11 bwa e a tia te Atua ni ‘kawanawanaira riki nakoia manin aan-nang.’ E kaonotaki nakoia aomata te konabwai n iangoi baika nano, rinanon taetaeia mai buaia ao n te taetae ni baia.

A kaokoro ataei aika merimeri ma maan riki ake tabeman, bwa e taraa n ae a bungiaki ma te konabwai n reiakini taetae aika kakaokoro. E taekina ae kangai te kaongora man te maekatin n te Internet ae American Scientist: “A kona n reiakina te taetae ataei aika uarereke, e ngae naba ngkana a aki kakataetaeaki irouia aia karo; a otei i bon irouia aia taetae ataei aika bonotaninga, e ngae naba ngkana a aki reireinaki te taetae n te bai ni mwengaia.”

Ni koauana, bon te bwaintangira ae kamimi mairoun te Atua rabakaura ni kaotii ara iango ma ara namakin, rinanon ara tatae ni kawai ke te taetae n te bai. Ma te bwaintangira ae moan te kakawaki riki ae a anganaki aomata, bon te rabakau n itoman ma te Atua rinanon te tataro. N etina, e kaungaira Iehova ae te Atua bwa ti na taetae ma ngaia. E taekinaki ae kangai n Ana Taeka te Atua ae te Baibara: “Tai iangoa te bwai teuana n raraomaeakinna; ma a na kaotaki ami bubuti nakon te Atua ni bwaai ni kabane, n te tataro ma te bubuti ma te katituaraoi.”​—I-Biribi 4:6.

Ngkana ti kaaitara ma karaoan ara motinnano ae kangaanga, e tangirira Iehova bwa ti na kamanenai reirei aika bati aika n te Baibara ibukini kawanawanara. E na boni buokira naba bwa ti na rabakau ni kamanenai reirei aika ti nori iai ni maiura. E taku te tia korea te Baibara ae Iakobo: “Ngkana akea ana rabakau temanna i buakomi, ao e na butiia te Atua, ae tituaraoi n angangania aomata ni kabaneia, n aki ngurengureakiniia.”​—Iakobo 1:5.

Tera Aron Rotakim Iai?

Tera aron rotakim ngkana ko kakauongo tangitangia mannikiba aika bwanaaraoi, ke te ataei ae e a tibwa reireinna n taetae? Ko nora iai wanawanan te Atua ni baika e karikii?

E kaungaki nanon te tia areru ae Tawita imwin iaiangoan aroni karikana bwa e na kangai nakon te Atua: “N na katituaraoiko; ba e kakamaku karaoau i Roum ao e kamimi naba: A kamimi am makuri; ao e bon ataia raoi tamneiu.” (Taian Areru 139:14) Ngkai ko nenera wanawanan te Atua ae kona n noraki n ana karikibwai, e na bon rikirake iai onimakinan ae e kona n anganiko te kairiri ae manena.

[[Kabwarabwaraan n iteraniba 5]

Bon te bwaintangira mairoun te Atua te konabwai n taetae

[Picture Credit Line n iteraniba 4]

© Dayton Wild/Visuals Unlimited