Te Kukurei N aki Toki I Karawa Ke I Aon Te Aonnaba?

E A BOTO riki kukureim i aon am tabo are ko maeka iai? Angiia aomata a na kukurei ni kaotia bwa te kukurei e boto riki i aon bwaai n aron te marurung raoi, te maiu ae manena, ao te iraorao ae raoiroi ma aomata tabemwaang. E kangai te taeka n rabakau teuana man te Baibara: “E raoiroi riki te botaki n amarake ae te mtea kanaia ae e mena iai te tangira, nakon te kao ae kamarikaki ae raonaki n te riribai.”​—Taeka N Rabakau 15:17.

Te kananokawaki bwa rongorongon mwengara ae te aonnaba ma ngke rimoa ni karokoa ngkai, e on n te kairiribai, te iowawa ae tiritiri, ao mwakuri aika bubuaka tabeua. Ma tera aron karawa, ke te aba n taamnei, ike aomata aika mwaiti a kaantaninga te nako iai, ngkana a mate? Bon te tabo are n taai nako e bati te rau ao te raoi iai, ae akea te itabarara ae e a tia n riki iai, n aron are e iangoaki irouia aomata aika mwaiti?

E taku te Baibara bwa te Atua e mena i karawa ma aomata aika taamnei aika mirion ma mirion mwaitiia, ake a aranaki bwa anera. (Mataio 18:10; Te Kaotioti 5:11) Te koraki aikai a atongaki bwa “natin te Atua” aika taamnei. (Iobi 38:4, 7) Ma n ai aroia aomata, anera a inaaomata naba n rinea ae a na karaoia; bon tiaki taian mitin ngaiia. Mangaia are a kona naba n rinea are ngkana a na karaoa ae raoiroi ke a na karaoa ae buakaka. Ma te koaua bwa anera a na rinea ae bure? Tao ko na mimi n ataia bwa ngaa ma ngaa te ririki n nako, a mwaiti anera ake a bure nakon te Atua​—bwa a karitei nakoina!​—Iuta 6.

Taani Karitei i Karawa

E kaoti te bure n te aba n taamnei ibukin ana karitei te anera temanna, are e aranaki bwa Tatan (te tia Rarawa) ao Riaboro (te tia Uarao). Te anera aei are e ongeaba rimoa e rineia ibon irouna bwa e na karaoa ae buakaka. Imwin anne, e a riki bwa te tia kariri nakoia anera tabemwaang, n te aro are n ana tai Noa are imwain te Ieka, a mwaiti anera ake a a tia n airi ma Tatan ni karitei nakon te Atua.​—Karikani Bwaai 6:2; 2 Betero 2:4.

Anera ake a bure aikai a aki waekoa ni kakioaki nako mai karawa. E aki tukaki moa rokoia iai​—ma a tauaki karaoan bwaai tabeua irouia​—inanon ririki aika ngaa ma ngaa mwaitiia.a Ma ngke e a toki taotaonan nanon te Atua ni kaineti ma taani bure aikai, a “karenakoaki” mai karawa, ao n tokina, a na kamaunaki. E kangai te bwana mai karawa: “Ma ngaia ae kam na kimareirei, ngkami aika taiani karawa, ao ngkami aika kam maeka iai.” (Te Kaotioti 12:7-12) E teretere bwa anera aika kakaonimaki a rangi ni kimwareirei ngke e kaitiakaki karawa mairouia taani kakiriwe aika ribaaki aikai!

Ngkana a iangoaki koaua aika a aki rangi n ataaki aikai, e teretere bwa e aki kona n reke te rau ni koaua n taai nako ike ana karikibwai te Atua aika wanawana a kakeaa ana tua ao ana reirei te Atua. (Itaia 57:20, 21; Ieremia 14:19, 20) Ma n te itera teuana, ngkana a bane n ongeaba n ana tua te Atua, e a taabangaki te rau ao te mweeraoi. (Taian Areru 119:165; Itaia 48:17, 18) Mangaia are ngkana aomata ni kabane a tangira ma n ongeaba iroun te Atua ao a itangitangiri imarenaia, tiaki te koaua bwa te aonnaba e na riki bwa te maeka ae kakukurei ma ni moan te raoiroi? E kaeka eng te Baibara!

Ma tera aroia aomata aika a bangaomata n rawa ni bita aroaroia aika bubuaka? A na teimatoa n aki toki n urua te rau ibukia aomata aika a tangiria ni karaoa nanon te Atua? A na aki, bwa te Atua e a tia ni motika taekaia anera aika buakaka ake i karawa, ao e na karaoa naba anne nakoia aomata aika a mena i aon te aonnaba.

Te Aonnaba ae Kaitiakaki

“Karawa au kaintokanuea, ao aonaba kaintokani waeu,” e taku te Atua. (Itaia 66:1) Kioina ngkai te Atua e kororaoi n te raoiroi, e na aki kariaia kabarekan ‘kaintokani waena’ n te buakaka, n aki toki. (Itaia 6:1-3; Te Kaotioti 4:8) N aron are e kaitiaka karawa mairouia taamnei aika buakaka ao e na manga kamaunaia naba aomata aika buakaka ni kabane mai aon te aonnaba, n aron are e kaotaki ni kiibu aikai man te Baibara:

“Ba a na teweaki nako taani kakaraoa ae buakaka: ao akana kaantaninga Iehova a na abana te aba.”—Taian Areru 37:9.

“Ba a na maekana aon te aba akana raoiroi, ao a na tiku i aona akana moa n raoiroi. Ma a na teweaki nako akana buakaka mai aon te aba. Ao a na taekaki taani bure mai nanona.”​—Taeka N Rabakau 2:21, 22.

“Ngkana tao e riai iroun te Atua te manga angania ake a karawawataingkami te rawawata, ao te anganingkami ngkami akana kam karawawataki te motirawa ma ngaira, ngkana E kaotaki mai karawa te Uea are Iesu ma anerani mwakana n te ai ae ura mwaka, ni kareke kaiia ake a aki ata te Atua, ma ake a aki ira nanon euangkerion are Uea are Iesu Kristo. Ao a na reke kaiia n tiringaki n aki toki mai matan te Uea, ao mani mimitongini mwakana.”​—2 I-Tetaronike 1:6-9.

“Ao e kume ni mauna aon te aba [are te botannaomata ae buakaka] ma kaibabaruna: ma ane kakaraoa ae E tangiria te Atua, ao e teimatoa n aki toki.”​—1 Ioane 2:17.

E na Teimatoa n Raoi te Aonnaba?

E ngae ngkai te Baibara e katereterea bwa iai tian taotaonan nanon te Atua nakon te buakaka, ma ti na kanga n ataia bwa ngkana e kamaunaki te buakaka, ao e na aki manga rikirake riki? Bwa ni koauana, e a waekoa ni manga rikirake te buakaka imwin te Ieka are n ana bong Noa, n te aro ae te Atua e riai ni manga katoka aia waaki ae buakaka aomata ngke e kamangaongaoa aia taetae nikawai.​—Karikani Bwaai 11:1-8.

Bukina ae kakawaki riki ae ti onimakinna bwa e na aki manga rikirake te buakaka, bwa e na aki manga tautaekanaki te aonnaba irouia aomata, n aron are e karaoaki imwin te Ieka. Ma e na tautaekanaki iroun ana Tautaeka n Uea te Atua. E na uea mai karawa te Tautaeka n Uea aei, ao akea riki te tautaeka teuana ae e na taua taekan te aonnaba. (Taniera 2:44; 7:13, 14) E na waekoa ni karaoa motikan taekaia aomata aika a kataia ni manga karina riki te buakaka. (Itaia 65:20) Ni koauana, e na boni kamauna teuare ngaia uton te buakaka​—are Tatan te Riaboro​—n ikotaki naba ma ana taimonio, ake anera aika buakaka ake a airi ma ngaia.​—I-Rom 16:20.

Irarikin anne, akea riki bukina teuana ae te botannaomata e na manga raraoma ibukin te amwarake, te kunnikai, te mwenga, ke te mwakuri​—taren bwaai aikai n taai aikai e kairia aomata tabeman nakon te maiu buaka. Eng, te aonnaba ni kabuta e na onikaki nakon te baretaiti ae maiureirei are e na taonako iai te amwarake ibukia aomata ni kabaneia.​—Itaia 65:21-23; Ruka 23:43.

Ma ae kakawaki riki, te Tautaeka n Uea aei e na reireiniia kaaina aron te maiu ae rau, ao e na karikirakeiia naba ni karokoa ae a kororaoi. (Ioane 17:3; I-Rom 8:21) Imwin anne, aomata a na aki manga buakan mamaaraia ao aroia ni kani bure, mangaia ae a na kororaoi n aron aia ongeaba iroun te Atua, ao a na kukurei iai, n aron are e noraki iroun te aomata ae kororaoi are Iesu. (Itaia 11:3) Ni koauana, e kakaonimaki Iesu iroun te Atua e ngae ngke e korakora kataakina ao kammarakana​—aika bwaai aika a na bon aki noraki n te maiu n te Baretaiti.​—Ebera 7:26.

Bukin Tera Ngkai Tabeman A Nako Karawa

A mwaiti taani wareware n te Baibara ake a ataa ana taeka Iesu aikai: “A bati nee ni maeka n ana auti Tamau . . . ba I nako ni katauraoi nemi i mwaimi.” (Ioane 14:2, 3) Tiaki te koaua bwa a riki mai iai titiraki tabeua aika kananououa aron te maiu n aki toki n te aonnaba ae te baretaiti?

A aki kauntaba reirei aika uoua aikai. A uaia ni boutokaiia ibon irouia. Te moani bwai, e taku te Baibara bwa e tianaki mwaitiia Kristian aika kakaonimaki​—nakon te mwaiti ae 144,000​—ake a na kautaki bwa taamnei ake a na maiu i karawa. Bukin tera bwa a anganaki te kaniwanga ae kamimi aei? Ibukina bwa a kaaina te koraki ae noraki n te miitara iroun Ioane, ake “a maiu, ao a uea ma Kristo tenga te ririki.” (Te Kaotioti 14:1, 3; 20:4-6) Te koaua bwa te koraki aei aika 144,000 mwaitiia bon tii te “nanai ae uarereke,” ngkana e kabotauaki mwaitiia ma aomata aika birion ma birion ake a maiu i aon te aonnaba. (Ruka 12:32) Ao ibukina bwa a a tia n namakin kangaanga ake a tataneiai aomata n nanamakin, n ai aron Iesu, a na kona n ‘nanoangaira ni mamaraara’ ngkana a tararua aron manga katamaroan te botannaomata ao ai te aonnaba naba.​—Ebera 4:15.

Te Aonnaba​—Mwengan te Botannaomata n Aki Toki

Ngke e anga te karea ni kaboomwi rinanon Iesu Kristo, te Atua e moanna n ikotiia te koraki aika 144,000 mwaitiia tao 2,000 te ririki n nako, ao n taraana, e a koro mwaitina ngkai. (Mwakuri 2:1-4; I-Karatia 4:4-7) Ma ana karea Iesu e aki tii anganaki ibukin aia bure te koraki aika 144,000, ma ibukin naba “aia bure kaain aonaba ni kabaneia.” (1 Ioane 2:2) Mangaia are aomata ni kabane ake a onimakina Iesu a kaantaninga te maiu are aki toki. (Ioane 3:16) Akana a matu inanon te rua ni mate ma a mena n ana ururing te Atua a na boni kautaki, tiaki nako karawa, ma nakon te maiu n te aonnaba ae itiaki. (Te Minita 9:5; Ioane 11:11-13, 25; Mwakuri 24:15) Tera ae na mena imwaiia iai?

E kaeka Te Kaotioti 21:1-4 ngke e kangai: “Noria, e mena uman te Atua irouia aomata, . . . ao E na kabane rannimataia te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki: ba a mauna nako bwaai rimoa.” (Ara bwai man reireiti.) Iangoa anne​—ae aomata a kainaaomataki n aki toki man te mate, ao te maraki ao te tang ae riki mai iai! Ao ngkanne, ana moan kaantaninga Iehova ibukin te aonnaba ao te botannaomata e na roko ni kakoroana ae moanibaan te raoiroi.​—Karikani Bwaai 1:27, 28.

Ti na Rinea​—Te Maiu ke te Mate

A bon aki anganaki te kaantaninga ae a na nako karawa Atam ma Nei Ewa. A riai n rinea ae a na karaoia mai buakon te ongeaba iroun te Atua ao te maiu n aki toki i aon te aonnaba ae te baretaiti, ke te aki-ongeaba irouna ao te mate. E kananokawaki bwa a rinea te aki-ongeaba, ao ibukin anne a okira ‘tanon’ te aonnaba, n aron are e taku te Atua bwa e na riki nakoia. (Karikani Bwaai 2:16, 17; 3:2-5, 19) Bon tiaki ana kaantaninga te Atua bwa a na mate aomata bwa e aonga ni kona ni kaona karawa irouia, imwin utiia man te rua ni mate. Te Atua e karikiia anera aika mwaiti kurikuri bwa a na maeka i karawa; ao anera aikai bon tiaki aomata ake a a tia ni mate ao a manga kautaki nakon te maiu i karawa.​—Taian Areru 104:1, 4; Taniera 7:10.

Ma tera ae ti riai ni karaoia bwa ti aonga n anganaki te kakabwaia ae te maiu n aki toki n te Baretaiti i aon te aonnaba? Te moan bwai bon reiakinan ana Taeka te Atua ae te Baibara ae Tabu. “Ao aio te maiu are aki toki,” e tataroakinna Iesu, “te ataiko ae te Atua ae ti temanna ae koaua, ao Iesu Kristo, ae Ko kanakomaia.”​—Ioane 17:3.

Te mwaneka naba teuana ibukin karekean te kukurei n aki toki n te Baretaiti, bon kamanenan te atatai aei. (Iakobo 1:22-24) Akana a maiuakina ana Taeka te Atua a kona ni kaantaninga noran kakoroan bukin taetae ni burabeti aika kamimi, n aron ae n Itaia 11:9, ae kangai: “Ane e na aki tabare [te botannaomata] ma n ururu n au maunga ae tabu ni kabuta: ba a na buta aonaba n atakin Iehova, n ai aron taari ngkae e kabuta marawa.”—Ara bwai man reireiti.

[Kabwarabwara ae nano]

[Taamnei n iteraniba 7]

“A na abana te aba akana raoiroi, ao a na mamaeka iai n aki toki.”​—Taian Areru 37:29