Te Koaua Bwa Te Aonnaba Bon Tii Aia Tabo Ni Kataitai Aomata?
AI KAMAIURA! E a bwaati neiei. E a reke irouna te ribooti ae raoiroi ae mwiin ana ukeuke ae maanna, uoua te wiki. E a kona ngkai ni karekea ana mwakuri are e a kamani kaantaningaia.
A mwaiti aomata aika a iangoa te maiu i aon te aonnaba n te aro naba anne. A iangoia bwa kaanga te kataaki ke te kataitai moa, ae e riai n rinanoaki irouia aomata ni kabane. Akana a “bwaati” iai a kona ni karekea te maiu ae raoiroi riki n te Maiu Teuana are Imwin te Maiu aei. E kananokawaki ngkana te maiu aei—ae e rangi ni kangaanga ibukiia aomata aika mwaiti—bon te kabanea n raoiroi ae e kona ni kaantaningaki rekena, irouia aomata. E ngae ngkai e marurung ao e toronibwai n angiin ana tai ni maiu, ma e kangai Iobi are e taekinaki n te Baibara: “Te aomata ae bungiaki mairoun te aine, ai ti tabe bong ana bong, ao e on n te rawawata.”—Iobi 14:1.
E boraoi ma aia iango aomata aika mwaiti te New Catholic Encyclopedia ngke e kangai: “Te neboaki i karawa bon tokiia aomata are e baireaki iroun te Atua. . . . Kakukureiaia aomata e a reitaki ma reken te kakukurei i karawa irouia.” Te kakae are e a tibwa karaoaki iroun Ana Ekaretia Kristo n te United States, e taku bwa 87 te katebubua mai buakoia aomata ake a kaeka te kakae, a kakoaua bwa a na nako karawa ngkana a mate.
A mwaiti aomata aika tiaki Kristian ake a kakoaua bwa a na kitana te aonnaba ma n nako n te tabo ae raoiroi riki ngkana a mate. N aron anne, kaain te Aro ni Mutirim a kaantaninga rokoia n te baretaiti i karawa. Kaain te katei n Aro ae te Aba ae Itiaki aika a reitaki ma te Aro ni Buddhist i Tiaina ao i Tiaban, a kakoaua bwa ngkana a aki toki ni kaokioka taekinan te “Amitabha,” are aran te Buddha ae Akea Tokin Ana Oota, ao a na manga bungiaki n te Aba ae Itiaki, ke te Baretaiti are i Maeao, ike a na maiu ma te kukurei ae moanibaan te raoiroi.
E kakaongora bwa te Baibara, ae te boki ae tabu ae e a tia n rairaki ma ni kabutaki riki nakon booki ni kabane n te aonnaba, e aki taekina te aonnaba bwa te tabo are aongkoa ti riai ni birinako mai iai, ae te tabo ni kataitai moa. N aron anne, e taekina ae kangai: “A na abana te aba akana raoiroi, ao a na mamaeka iai n aki toki.” (Taian Areru 37:29) E kuneaki naba n te Baibara ana taeka Iesu ae tanoata taekana: “A a kabaia akana nimamanei, ba a na abana te aba.”—Mataio 5:5.
Te iango ae taabangaki irouia aomata, ae menara i aon te aonnaba bon tiaki te bwai ae e na teimatoa ni maan, e karika te iango ae aongkoa te mate bon te mataroa nakon te maiu teuana ae kakukurei, are imwin te maiu aei. Ngkana ngaia anne, ao te mate bon te kakabwaia. Ma e koaua ngkai bwa angiia aomata a iangoa te mate n te aro anne, ke a kataia ni kaananaua riki maiuia? E noraki man bwaai aika a riiriki, bwa ngkana a marurung aomata ao a mweeraoi, ao a aki tangiria ni mate.
Ma e ngae n anne, ibukina bwa e onrake te maiu i aon te aonnaba n te buakaka ao te rawawata, a teimatoa aomata aika mwaiti n iangoa karawa bwa te tabo ae tii teuana are a kona ni kunea iai te rau ni koaua ao te kukurei. Te koaua bwa karawa bon nnen te rau ae moanibaan te raoiroi, ae akea te buakaka ao te aki-nakoraoi iai? Ao te koaua bwa te Maiu Teuana are Imwin te Maiu aei, bon tii taekan te maiu are i karawa? Tao ko na mimi n ana kaeka te Baibara iai. Taiaoka n reita nako am wareware.