Kawaran Abamwakoron te Betebeke Ibukin Karaoan Te Mwakuri!
E KORAKORA te unga nano n aia tabo n tataninga bwatintia ni marae ni wanikiba ibukin te kiba nako tinaniku, ake i Brisbane ao Sydney, i Aotiteria. Te korakina aika 46 mwaitiia, a tauraoi ni kiba nakon te tabo ae e korakora te riringa iai ae Taamoa, ike a na kaitiboo iai ma te korakina aika 39 mwaitiia, ake a roko mai New Zealand, Hawaii, ao te United States. E rangi ni kaokoro kanoan aia baeki—bwa angiin uotaia boni bwaai ni mwakuri, n aron te aama, te tao, ao te ubwaabwaa—aika tiaki bwaai aika a tataneiai aomata n uotii ngkana a na mwananga nakon te abamwakoro ae tikauarerei n te Betebeke. Ma bukin mwanangaia anne bon te bwai ae rangi ni kaokoro naba.
A tabe ma bon oin aia kabane mwane ni mwanangaia aei, ao a na mwakuri n aki kabooaki inanon uoua te wiiki n te waaki ni kateitei ae tararuaki iroun te Regional Engineering Office are e mena ni mwaangan aia botaki Ana Tia Kakoaua Iehova are i Aotiteria. Te waaki aei, are e mwanenaki ni bwaintangira aika a aki tebonaki, ao e tabeakina katean Maneaba n Uea, Taabo n Runga, auti ibukia mitinare, ao mwaangan te Totaieti ke aobiti ibukin te raitaeka, aika a kainnanoaki irouia aia ekaretia Ana Tia Kakoaua Iehova n aban te Betebeke are e korakora te rikirake iai. Ti bia kaitiboo ma taani mwakuri aikai tabeman, ake a a tia n iri tiim aika a katei Maneaba n Uea n oin abaia mai imwaina.
Max, ae te tia katoka kaabwa, e roko mai Cowra i New South Wales i Aotiteria. E a tia n iein teuaei, ao iai natina aika niman. Raoraona ni mwakuri temanna are arana Roy, bon te tia been ao te tia katamaroa tinanikin te auti, are e mwananga man Mount Maunganui i New Zealand. E a tia naba n iein teuaei ao iai natina aika aman. Arnold, e mwananga mai Hawaii. Teuaei ma buna bon iai uoman natiia mwaane, ao e boni waakina naba te mwakuri ni bwaiania, ke te tia karaoa te mwakuri ni minita ni kabwanina ana tai iai. Arnold bon te unimwaane n te ekaretia n ana kaawa n aekakiia naba Max ao Roy. Aroaroia mwaane aikai—aika ai aroia naba angiia aomata aika a ira te waaki aei—a aki anga nanoia ni mwakuri n ibuobuoki ibukina bwa e mwawawa aia tai. Ma, ngaiia ao aia utu a nora te bwai ae kainnanoaki, ao a tangiria n ibuobuoki iai, n aron are a kona.
Taani Mwakuri man Aaba Aika Kakaokoro A Buoka te Mwakuri ae Kakawaki ae Kainnanoaki
Te aba teuana are e kainnanoa rabakauia ao aia ibuobuoki bon Tuvalu, ae te botannaomata teuana n te Betebeke are iai kaaina aika tao 10,500 mwaitiia, ake a mena n abamwakoro aika ruaiua ake a raroa nako i meangin maeaon Taamoa n ua kaan ma te ekuetoa. Te katautau n abwakiia abamwakoro aikai, tao kaka teuana te maire. N 1994, taani Kakoaua aika 61 mwaitiia ake a mena iai a rangi ni kainnanoa aia Maneaba n Uea ae boou, ao te aobiti n raitaeka ae bubura riki.
N aonon te Betebeke aei, a riai ni kateaki auti aika a kona n teimatoa imwain angibuaka ao ukeukennanti aika rangi ni korakora. Ma tii tabeua bwaai ni kateitei aika raraoi aika a kona n reke n abamwakoro aikai. Tera ae e na karaoaki ibukin aei? Bwaai ni kabane—ni moa man taiani kaabwa ao ooka ao ni karokoa bwain nanon te auti ma rabunan winto, boo n nako tinaniku, bwain te tiawa n ikotaki ma tikuru ao neera—a bane ni karinaki inanon kaonteina ma ni kanakoaki mai Aotiteria.
Imwain rokon bwaai ni kateitei aikai, e a roko rimoa te tiim ae uarereke mwaitiia ni katauraoa nnen te kateitei ma ni karaoa te kabwaro ibukin aana. Ao ngkanne, a manga roko taani mwakuri man aaba aika kakaokoro bwa a na kateia, a na beeniia, ao a na katiai auti aikai.
Mwakuri aikai aika a karaoaki i Tuvalu a kauna temanna te mataniwi n te Aro are e maeka iai, ao e katanoata i aon te rerio bwa taani Kakoaua a tabe ni katea te “Taua are i Babera”! Ma tera raoi te koaua iai? “Ngke a katea te Taua are i Babera, aomata ake a taekinaki n te Baibara, a noria bwa a kaokoroaki aia taetae iroun te Atua ao a aikoa kona n ota n aia taetae temanna nakon temanna, ao anne are e a toki aia kateitei iai, ao a kitana ikanne n aki katiaa moa te taua,” e taku te tia ibuobuoki temanna are arana Graeme. (Karikani Bwaai 11:1-9) “Ma e rangi ni kaokoro ma anne, ngkana ko mwakuri ibukin Iehova ae te Atua. E ngae ngkai a kona ni kaokoro taetae ao katei, ma a aki kona n aki katiaaki taian kateitei.” Ao e tia naba te kateitei aio—inanon te tai ae tii uoua te wiki. Aomata aika 163 mwaitiia, n ikotaki naba ma buun te buraim minitita, a kaea te botaki ni katabu.
Doug, are mataniwin te kateitei anne e taekina te waaki anne ni kangai: “E kakimwareirei te uaia ni mwakuri ma taan ibuobuoki man aaba tabeua. E ngae ngke a kakaokoro nako arora ni karaoi bwaai, e kaokoro aron atongan bwaai iroura, ao e kaokoro naba ara kai ni baire n te kateitei, ma akea te kangaanga ae riki man kaokoro aikai.” E a manga kangai, ngkai e a tia ni mwakuri ni kateitei tabeua imwin anne: “Te waaki aei e a kakorakora iangoan ae ngkana ti boutokoaki iroun Iehova, ao ana aomata a kona ni kateitei n taabo nako n te aonnaba aei, n aki ongea bwa e raroa nako te tabo ni kateitei ke e kangaanga nnen te kateitei. Te koaua bwa iai mwaane aika rabakau ibuakora aika mwaiti, ma ti boni konai bwaai aikai n taamnein Iehova.”
Taamnein te Atua ae e kairia utu aika taani Kakoaua aika kaain abamwakoro aikai bwa a na katauraoa te amwarake ao nneia ni maeka iruwa, are e kangaanga karaoana irouia tabeman mai buakoia. Ao a rangi ni kakaitau iai te koraki ake a kairuwaeaki. Ken, are e mwananga mai Melbourne Aotiteria, e a tia n ibuobuoki n te kateitei teuana i French Polynesia. E taekina ae kangai: “Ti roko bwa kaanga tooro, ma ti tabeakinaki n ai aroia uea.” Ngkana e kona n reke, ao kaain te aba aika taani Kakoaua a ibuobuoki naba n te kateitei. Ainen Toromon a kaboo timanti—n akea te mitiin. Mwaane ao aine aika tebubua mwaitiia a tamwarakei taiani maunga are e korakora bwabwakan te karau iai, ao a uotii rikaaki kaai ibukin te kateitei, n te mwaiti ae 40 tabun te tan. A ibuobuoki naba te koraki aika ataei riki. Roy, are e a tia n taekinaki, e uringa ae kangai: “I uringa taekan te ataeinimwaane temanna ae kaain te Betebeke are e kona ni uoti baeki n timanti aika uoua ke tenua n tii te uotakina. Ao e kabongnga n urakina te atama n aki tabe ma te kabuebue ae korakora ke te karau.”
Iai riki te kakabwaia teuana ae reke ngke taani Kakoaua aika kaain te aba a buoka te kateitei. E ribootina ae kangai ana aobiti te Watch Tower Society ni mwaangana are i Taamoa: “Taari n te Betebeke a a tia n reireiaki rabakau tabeua ake a kona ni kabonganai ibukin katean Maneaba n Uea ao manga karaoan mwiin te uruaki ae riki n tain te angibuaka. Karekean rabakau aikai e kona naba ni buokiia bwa a na karekea aia mwakuri ibukini maiuiia n taabo ike e kangaanga reken te mwakuri iai irouia aomata.”
Te Waaki ni Kateitei E Karaoa te Kaotioti ae Raoiroi
E mena i Oniara Colin, ao e nora katean te Tabo n Runga Ibukin te Aono ae Toromon. E anaaki nanona iai ao e kororeta nakon mwaangan te Watch Tower Society n te tabo anne n taekina ae kangai n te taetae ni Bitin n Ingriti: “A bane n inanoi aomata ao akea ae un iai, a riki naba bwa te utu teuana.” Teutana imwin anne, ngke e okira ana kaawa are Aruligo, ae 25 te maire raroana mai iai, ngaia ma ana utu a katea oin aia Maneaba n Uea. Ao ngkanne, a manga kororeta riki nakon te aobiti n taekina ae kangai: “E a tauraoi ngkai ara Maneaba n Uea ma ana taibora ni kabwarabwara naba, mangaia are ti kona naba ni karaoi botaki tabeua ikai?” E a waekoa ni baireaki karaoan anne, ao e a raka nakon 60, mwaitiia aika a roroko iai.
Te tia mwakuri ibukin te European Union e nora waakinan te kateitei are i Tuvalu. “Tao a bane aomata n taekina aei nakoimi,” e taku nakon te tia mwakuri temanna, “ma irou, te bwai aei bon te kakai!” Te aine are e mwakuri n te tabo n tarebon e titirakina te tia ibuobuoki temanna ae te iruwa ni kangai: “E aera ngkai kam a bane ni kukurei? E rangi ni kabuebue aon ikai!” A tuai man nora aron waakinan te aro ni Kristian n te aro ae manena n aron anne, ae e kairia taan ibuobuoki n anga boni ngaiia iai.
Te Anganga Bwai n Tituaraoi n Akea te Nanokawaki iai
“Ane kamae n ununiki ni kabatia, ao e na tai ni kabatia,” e taku te Baibara n te 2 I-Korinto 9:6. Taani mwakuri, aia utu, ao aia ekaretia, a teimatoa ni kamae n ununiki ma te nano n tituaraoi ngkai a buokia raoia aika taani Kakoaua ake kaain te Betebeke. “Au ekaretia e bwaintangira n te mwaiti ni mwane ae raka i aon teuana te katenimwakoroni kantokau,” e taku Ross are te unimwaane mai Kincumber are e kaan ma Sydney, “ao mwaaneni buu are e iri naba e bwaintangira naba $500.” Te tia mwakuri temanna e karekea kantokana ngke e kabonakoa ana kaa. Temanna riki e kabonakoa abana teuana. Kevin e kainnanoa riki $900, mangaia are e motika nanona bwa e na kabonakoa ana bitian aika 16 mwaitiia ake a koro uoua aia ririki. Mairoun raoraona temanna, e a reke kaitiboona ma te aomata are e kukurei ni kabooi ana bitian aikai, ao e kukurei n anganna te mwaiti ae $900!
“[Te roko ikai] e botau ma mwaitin te kantoka ao buan ami bwakabwai ae roko n te mwaiti ae tao $6,000?” a titirakinaki Danny ao Cheryl. “Eng! E ngae ngkana tao e okioki uoua te tai te mwaiti anne, ma boni moan te rangi ni manena,” a kaekaa. Alan, are e mwananga mai Nelson New Zealand, e reitia ni kangai: “Ni kabotauaki ma te mwaiti ni mwane are I kabanea ni mwanangau nako Tuvalu, aongkoa I kona ni mwananga nako Eurobe ao e na iai nikiran naba au mwane iai. Ma e na reke kakabwaiau iai, ke N na karekeia raoraou aika mwaiti aika kakaokoro nako aroia, ke ni karaoa te bwai teuana ibukia aomata tabeman ao tiaki tii ibukiu, ngke arona bwa I karaoa anne? I aki! Ma e ngae n anne, e a mwaiti riki are a anganai tarira ake kaain te Betebeke nakon are I angania.”
Te bwai teuana ae kakawaki ae kanakoraoa te waaki ni kateitei aei, bon te ibuobuoki man te utu. E ngae ngkai buu-aine tabeman a kona n airi ma buuia ma n ibuobuoki n te tabo ni kateitei, ma tabeman riki, bon iai natiia aika a reirei, ke iai riki tabeia ke te bitineti n te utu ake a riai n tararuai. “Kukurein nanon buu n tiku ni kawakinia ataei ao te mwenga ngke I nako,” e taku Clay, “e a anga te karea ae korakora riki nakon are I karaoia.” Te koaua bwa a na korakora nanoia buu-mwaane ni kabane ake a aki kona ni kairia buuia ni kangai “Amene” nakon te taeka anne!
Mai imwin tian te kateitei i Tuvalu, taan ibuobuoki a a tia ni katei Maneaba n Uea, Taabo n Runga, auti ibukia mitinare, ao aobiti ibukin te raitaeka i Biitii, Tonga, Babua Nukin, New Caledonia, ao taabo tabeua riki. A mwaiti kateitei ake a tabe ni baireaki ngkai, n ikotaki naba ma kateitei tabeua i Atia Maiaki Mainiku. A na tau mwaitiia taani mwakuri aika a na kainnanoaki iai?
N taraana, e na akea te kangaanga iai. “Aomata ni kabane ake a a tia n ibuobuoki ni kateitei n aaba aika kaokoro a manga bubutii bwa a na kaongoaki ngkana e a manga boo te kateitei teuana,” e koreia mwaangan te Totaieti are i Hawaii. “A tibwa okirikaki nakon mwengaia, ao a moanna ni kawakina aia tianti ibukin te manga nakon te kateitei are teuana.” E na kanga n aki nako raoi ngkanne te waaki aei ngkana ko a iangoia naba bwa e na boni korakora ana kakabwaia Iehova i aon nanoia aomata ni kan anga boni ngaiia n te aro anne?
[Taamnei n iteraniba 9]
Bwaai ni kateitei
[Taamnei n iteraniba 9]
Taani mwakuri n te tabo ni kateitei
[Taamnei n iteraniba 10]
Imwin katiaan taiani kateitei, ao ti kakatonga ibukin bwaai ake a karaoaki ni korakoran taamnein te Atua