Aia Ribooti Taan Ua Rongorongo Ibukin Te Tautaeka N Uea

Karekean Ataakin te Atua ae E Tatangira

NGKE ai 16 ana ririki ni maiu, e a kaman tia ni bwara nanona n te maiu aei, temanna kaain Brazil are arana Antônio. Namakinan ae akea manenan bwaai, e a kairia bwa e na kabonganai drug n te aro ae aki riai, ao nakon tautoronakina n te manging. E aki toki n iaiangoia bwa e na bakaburea maiuna. Inanon iaiangoan anne, ao e a tii uringa naba are e tuangnga ngkoa tinana: “Te Atua bon te tangira.” (1 Ioane 4:8) Ma e ngaa te Atua ae e tatangira aei?

Ibukin kan karekean buokana man tautoronakina n taian drug ao te manging, teuae Antônio e a kakaea buokana mairoun te berebitero n ana tabo. E ngae ngke e a rikirake Antônio n rangi ni mwamwakuri ibukin te Aro ni Katorika, ma bon iai naba ana titiraki aika mwaiti. N te katoto teuana, e mino ana iango n ana taeka Iesu ae, “Kam na ata te koaua, ao e na kainaomataingkami te koaua.” (Ioane 8:32) Tera te inaaomata are e beritanna Iesu? E aki karauaki nanona n ana kaeka te ekaretia nakon ana titiraki. Imwin tabeua te tai, e a kerikaki mai iai Antônio ao e a manga okira naba arona rimoa. Ni koauana, e a korakora riki tautoronakina ni bwaai ni kamanging.

N te tai anne, bun Antônio ae Nei Maria e a moanna n reirei n te Baibara ma Ana Tia Kakoaua Iehova. E ngae ngke e aki riba ana reirei buna, ma Antônio e kakeaa bongaia taani Kakoaua ngke e iangoiia bwa ”te Aro mai Amerika ae kabuta nako ana waaki te tautaeka n Amerika.”

E aki bwara nanon Nei Maria iai, ao e katikui katoton Te Taua-n-Tantani ao Awake! n taabo tabeua n aia auti, aika maekatin aika iai inanoia kaongora are e taku neierei bwa e na kan wareware iai Antônio. Kioina ngke e nano n te wareware Antônio, n taai tabetai e mamataku ni maekatin aikai ngkana akea buna n te auti. Ai tibwa te moan tai anne are e nori kaeka nakon ana titiraki i aon te Baibara. “I moanna naba n nora te akoi ao te tangira are kaotaki nakoiu irouni buu ao irouia taani Kakoaua,” e uringnga.

I nukan te ririki ae 1992, e a reke nanon Antônio bwa e na reirei naba n te Baibara ma Ana Tia Kakoaua Iehova. E ngae n anne, ma e teimatoa ni kabonganai drug n te aro ae aki riai, ma ni kabatiaa te moi manging. E a rangi ni bwakanako te tai n te tairiki teuana ngke a tibwa oki ngaia ma raoraona temanna man te kaawa teuana, ao a tii kateaki naba irouia bureitiman. Ngke a a kunea te drug ae te cocaine bureitiman aikai iroun Antônio, ao a batiboia. Te bureitiman temanna e a karenakoa nako buakon te bokaboka, ao e kotea ubuna n taua ma te katii. “Kamatea!” e takarua te bureitiman are temanna.

Ngke e a wene ibuakon te bokaboka Antônio, ao e a iangoi anuani maiuna ni kabane. Bwaai aika raoiroi ake e kona n uring, bon tii taekan Iehova ma ana utu. E tataro teutana, n onnonia Iehova bwa e na buokia. E a kerikaki te bureitiman arei n akea bukina. E a okira mwengana ma ni kakoaua bwa bon Iehova are e kamanoa n te tai arei.

E a moanna n reirei n te Baibara Antônio ma te kaantaninga ae boou. Teutana imwin teutana e bita aroarona bwa e aonga ni kakukureia nanon Iehova. (I-Ebeto 4:22-24) Ngke e a karikirakea te taotaonakinnano, e a moanna n tokanikai i aon kabonganan taian drug. Ma e a kainnanoa naba te ibuobuoki mairouia taokita. E a reke ana tai uoua te namwakaina ngke e mena n te oo-n-aoraki, ibukin warekan booki tabeua aika a kabwarabwara te Baibara, n ikotaki naba ma te boki ae te Knowledge That Leads to Everlasting Life. Antônio e a manga tibwatibwai bwaai ake e reiakinaki man booki aikai, nakoia aoraki tabeman.

Ngke e a otinako man te oo-n-aoraki anne, Antônio e a reita nako ana reirei n te Baibara ma taani Kakoaua. N te tai aei, Antônio, Nei Maria, natiia aine aika uoman, ao tinan Antônio, a uaia ni beku iroun Iehova bwa te utu ae katiiteuanaki ma ni kukurei. E kangai Antônio: “I a tibwa ota ngkai n nanon raoi taeka aika ‘te Atua bon te tangira.’”

[Taamnei n iteraniba 8]

Tataekinan te rongorongo i Rio de Janeiro