E a Tabe ni Bua Ngkai Nanon te Taeka ae “Kristian”?
TERA ae nanonaki ngkana e taekinaki bwa bon te Kristian te aomata? Ko na kanga ngkoe ni kaeka anne? E tabekaki te titiraki aei nakoia aomata aika kakaokoro n aaba tabeua, ao aikai aia reke tabeua:
“Te kakairi iroun Iesu ma ni katotonga aroarona.”
“Riki bwa te aomata ae raoiroi, ma n tibwatibwai am bwai ma aomata tabemwaang.”
“Butimwaean Kristo bwa te Uea ao te tia Kamaiu.”
“Irira te Tutia, waakina te Rotario, ao butimwaea te Komunio.”
“I aki kakoaua bwa ko riai n nanakon te umantabu bwa ko aonga n atongaki bwa te Kristian.”
A mwaiti naba kabwarabwara aika kamino iango n taian rikitinare, i aon te taeka aei. Iai kabwarabwara aika tebwina i aan te taeka ae “Kristian” n te rikitinare teuana, ao a moa man “kakoauan ke kaainakin ana Aro Iesu Kristo,” nakon “te aomata ae raoiroi ke e tara raoi.” E aki kamimi ngkai a mwaiti aomata aika e kangaanga irouia kabwarabwaran ae nanonaki ngkana e taekinaki bwa bon te Kristian te aomata temanna.
Te Waaki ni Kamarauraua Taiani Kaetieti
Ibuakoia naba aomata aika a taku bwa Kristian ngaiia ni boong aikai—ao ibuakoia naba aika a kaaina te ekaretia ae tii teuana—ko kona ni kunei iango aika kakaokoro nako i aon reirei n aron kairakin korean te Baibara iroun te Atua, te iango ae te ewarutin, irekereken te Aro ma te waaki n tautaeka, ao tibwatibwakin am onimaki nakoia aomata tabemwaang. Titiraki aikai a reitaki ma te aroaro ni maiu ae riai, n aron reirei ibukin kabwakaaia ataei aika a tuai ni bungiaki, te wene ni bure imarenaia aomata aika tii teboo aroia, ao te tekateka n taanga irouia aomata aika a tuai ni mareaki, a aki toki ni kariki kauntaeka aika korakora. Bon arona n taai aikai bwa aomata a kan kamarauraui kaetieti i aon bwaai aikai.
Ana tarabunare te Aro ni Borotetanti teuana, e a tibwa tia ni kaota nanona bwa e riai te ekaretia ni kona “n rinea te unimwaane ae e ataaki bwa e wene ni bure ma te aomata ae ai arona, bwa e na kaaina ana baba n tararua te ekaretia,” e taekinna te maekatin ae te Christian Century. Taan rabakau tabeman n Aro, a a tia n taekinna bwa onimakinan Iesu bon tiaki te bwai ae rangi ni kainnanoaki ibukin te kamaiuaki. A kakoaua bwa I-Iutaia, Mutirim, ao aomata tabemwaang, a na bon “rin naba nako karawa [n aroia naba Kristian],” e taku te ribooti teuana n te New York Times.
Iangoa aron te aomata ae te Komuniti are e kaungai nanoia aomata bwa a na waakina te tautaeka ae inaaomata, ke te aomata ae tangira te tautaeka ae inaaomata are e kaungai nanoia aomata bwa a na butimwaea tautaekanakiia iroun te tia tautaeka ae tii temanna ae taua aroia ma te matoatoa, ke te aomata ae tabe ma kawakinan raoiroin te otabwanin are e kaunga aron kabwakaan kaai ni buakonikai ni kabane. Ko na taku bwa “te aomata anne bon tiaki raoi te Komuniti, te aomata ae tangira te tautaeka ae inaaomata, ke te aomata ae tabe ma kawakinan raoiroin te otabwanin”—ao e bon eti am iango anne. Ma e ngae n anne, ngkana ko iangoi kaantaninga aika a kakaokoro nako aika a taekinaki irouia aomata aika a taku bwa Kristian ngaiia n taai aikai, ko na nori koaua aika a rangi ni kakaokoro aika a aki toki naba ni kauntaba ma ana reirei te tia Katea te Aro ni Kristian, are Iesu Kristo. Tera ae e nanonaki iai ibukin aroaron aia waaki ni Kristian?—1 I-Korinto 1:10.
Nanoia aomata ni kani bitii reirei ni Kristian bwa a aonga ni boraoi riki ma koaua aika a taabangaki n aia tai, e a kamani waakinaki ma ngkekei, n aron are ti na noria. Tera aia iango te Atua ma Iesu Kristo ibukin bitaki aikai? A kona, Aaro aika a boutokoi reirei aika a aki aanaki i aon Kristo ni kona n arania bwa Kristian? A na rinanoaki titiraki aikai n te kaongora are imwin aei.