Tera Am Atatai I Aon Te Tabunea?

TE TABUNEA! Tera ae ko iangoia ngkana ko ongora te taeka anne?

Irouia aomata aika mwaiti, bon te bwai ae akea nanona ae aki riai ni mutiakinaki raoi. Irouiia, te tabunea bon te bwai ae tii mena n aia iango aomata​—ae taekaia unaine aika a kunnikaia n aia kunnikai ibonga, aika aongkoa a karaoi mwaan aika kamimi n aron renganan te bwaa, te ningoningo, ao a taetae ibon irouia n akea nanona.

Irouia tabemwaang, te tabunea bon tiaki te bwai ni kangare. Taani kakaei rongorongo tabeman a taku bwa e a raka i aon iteran mwaitiia kaain te aonnaba aika a kakoaua bwa bon iai ibonga n tabunea ngkai aika a kona n roota maiuiia aomata. Mirion ma mirion mwaitiia aomata aika a kakoaua bwa e buakaka te tabunea, e karuanikai, ao e riai n rangi ni maakaki. N aron anne, te boki teuana ae taekaia Aaro i Aberika, e taekina ae kangai: “Kakoauan ana mwakuri te tabunea ae buakaka ao kabuanibwai aika a kona n riki mai iai, e rangi n irekereke ma anuani maiuia kaain Aberika . . . Ibonga n tabunea a ribaaki riki nakoia aomata nako n aia kaawa. Nakon taai aikai naba, bon iai taabo ao taai tabeua are a batiboaki irouia kaain aia kaawa ni karokoa ae a mate.”

Ma n aaba ake i Maeao, e tibwa katamaroaki riki aron taraakin te tabunea irouia aomata. Booki, kamataku n te TV, ao birim ake a karaoaki ngkai a rangi ni kauarerekea maakakin te tabunea irouia aomata. Te tia kakae temanna ae tabe ma aaro ni kaki botu, ae arana David Davis, e taekina ae kangai: “E karina n noraki ngkai ibonga n tabunea aika aine aika ataei riki, ao a bakitoutou riki, eng, a bon bakitoutou riki. A rabakau kaain Hollywood n atai bwaai aika boou aika a tatangiraki irouia aomata. . . . Ngkai a kaotiia ibonga n tabunea aika bobotonnaine ma n tangiraki riki, ao a kona iai n anaa nanoia aomata aika mwaiti riki, n ikotaki ma aine ao ataei.” A rabakau kaain Hollywood n onika te bwai ae tatangiraki irouia aomata, nakon te waaki ae a kona ni kareke mwane mai iai.

Tabeman a taku bwa te waaki n tabunea, boni ngaia te waaki n taromauri ae e korakora riki rikirakena n te United States. E tabe n rikirake ngkai n aaba aika kaubwai, mwaitiia aomata aika a kairaki irouia botaki ibukin kainaaomataia aine ao aika a bwara nanoia n Aaro aika e a taneiai te aba iai, ao ngkanne a kataia ni katoki kainnanoia ibukin bwaai n taamnei rinanon waaki n tabunea aika kakaokoro nako. Ni koauana, a rangi ni mwaiti aeka n tabunea aika kakaokoro, n te aro ae a aki kona ni boraoi nanoia taan tabunea n nanon te taeka ae te “ibonga n tabunea.” Ma a mwaiti aomata aika a taku bwa ibonga n tabunea ngaiia, aika a irekereke ma te waaki ae te Wicca​—ae e kabwarabwaraki n te rikitinare teuana bwa “te Aro ni beekan ae reitaki ma bwaai aika mena i aon te aonnaba, are e riki i Eurobe maeao imwain rokon te aro ni Kristian iai, are e a manga kateaki inanon te ka 20 n tienture.”a Ibukin anne, a mwaiti mai buakoia aika a arania bwa beekan, ke beekan aika boou.

Man taai aika rimoa ni karokoa ngkai, a bon ribaaki ibonga n tabunea, a bainikirinaki, a kammarakaki, ao a kamateaki. Tiaki te kamimi ngkanne ae taan tabunea n taai aikai a tangiria ni katamaroa riki aron taraakiia irouia aomata. N te kakai teuana, a mwaiti ibonga n tabunea ake a titirakinaki bwa tera te rongorongo ae a tangiria ni kaotia nakoia aomata. E kangai aia kaeka ae ribootinaki iroun te tia kakae ae Margot Adler: “Tiaki aomata aika buakaka ngaira. Ti aki taromauria te Riaboro. Ti aki katekebuakaia aomata ke ni mwamwanaiia. Tiaki aomata aika kakamaaku ngaira. Bon tii te arona arora ma ngkami. Bon iai ara utu, ara mwakuri, bwaai aika ti tangira rekeia iroura, ao bwaai aika ti kakaantaningai. Bon tiaki te katei n Aro ae kaokoro ngaira. Tiaki aomata aika kamimi ngaira. . . . Kam aki riai ni maaku iroura. . . . E iorooro riki arora ma ngkami, nakon ae kam iangoia.”

E a tabe n rikirake mwaitiia aomata aika a butimwaea te rongorongo anne ngkai. Ma e nanonaki iai bwa akea bukina ae ti na raraoma ibukin waakinan te tabunea? Ti na iangoa te titiraki anne n te kaongora are imwin aei.

[Kabwarabwara ae nano]