Mutiakina Taekan Te Kabuanibwai Ae Nang Roko!
BOOM! N Tun 3 1991, e korakora rebwen te Maunga ae Fugen i Tiaban ngke e urarake, ao e otinako te kaeti ao te bubu man te warekeno arei. Bwaai akanne aika moan te rangi ni kabuebue, a raanga nako ni karaaben te maunga. A mate n te urarake anne, aomata aika 43 mwaitiia. Aomata aika mwaiti aika a rawei maiuiia iai a bon rangi ni kakaiaki buen rabwataia. A tangitang tabeman, “Te ran, te ran, taiaoka.” Taan tiri ai ao bureitiman tabeman a kawaekoaia ni kataia ni buokiia.
E A NORAKI buroburoraken te lava i aon taubukin te Maunga are Fugen, tao uoua te wiiki imwain anne, mangaia are kaain te tautaeka ao taani maeka iai a kaman taratara iai. N te tai ae maan riki nakon teuana te wiki imwain rikin te kabuanibwai arei, e katanoataki bwa a riai aomata ni kitana te tabo anne. Teuana te bong imwain te urarake arei, bureitiman a butiia taani kareke rongorongo bwa a na aki rin nakon te tabo arei. Ma e ngae n anne, ni bongin te kabuanibwai anne, 43 aomata ake a mena n te tabo ae karuanikai anne, aika a mate.
Bukin tera bwa a mwaiti aomata aika a rin nakon te tabo arei ke a titiku iai? Taan ununiki tabeman ake a a tia ni kitana aia auti a manga okirikaki bwa a na tuoi aia bwai ao arokaia. Taan rabakau n ana mwakuri te warekeno a kataia ni kaania riki te warekeno bwa a aonga ni waakina aia kakaei mai iai. Taan kareke rongorongo ao taan rawe taamnei tabeman a ninikoria n rin nakon te tabo are e taburoroko rinin te aba iai, bwa a tangiria ni karekea te rongorongo ae boou ibukin ana mwakuri te warekeno arei. Teniman taani kabuti taxi aika a kabooaki irouia taani kareke rongorongo, aika a mena naba iai. A tei iai bureitiman ao taan ibuobuoki n tiri ai tabeman. Bon iai bukina ae aomata aikai a roko inanon te tabo ae karuanikai arei—ao uaan karaoan anne, are a kabuanibwai maiuiia iai.
Ko a Mena Naba n te Tabo ae Karuanikai?
Tao ti aki mena irarikin te warekeno ae kakamwakuri. Ma tera ngke ti kaitara ma te kabuanibwai ae taabangaki n te aonnaba, ao nanona bwa ti a bane ni mena inanon te tabo ae karuanikai ae kabuta te aonnaba? Te boki teuana ae e a tia ni kakoauaki bwa te boki ae taekin taetae ni burabeti aika a kona n onimakinaki, e reireinira taekan te kabuanibwai ae na buta te aonnaba ae i aoni kawaina n roko ngkai, ao e kabwarabwara taekana ae kangai: “E na rina ni karoroaki taai, ao e na aki mama namakaina, ao a na bwaka itoi mai karawa, ao a na kamwaeieiaki bwaini karawa ake a korakora . . . a na bane n tang kaain aonaba.” (Mataio 24:29, 30) Bwaai aika kamimi aika a na riki i karawa ma n noraki n taabo nako a taekinaki bwa a na rootiia ‘kaain aonnaba ni kabane.’ Ke n taeka tabeua, te taetae ni burabeti aei e taekina te kabuanibwai ae na rootira n tatabemanira nako.
Te boki aei ae e taekin taetae ni burabeti aika a kona n onimakinaki, bon te Baibara. Ao e riai n ataaki bwa kiibu ake irarikin te kibu ae kaotaki i eta, a kabwarabwarai raoi bwaai aika a na riki imwain te kabuanibwai ae taabangaki anne. N ai aron taubukin te maunga ae buroburorake iai te lava, ao kanikina tabeua riki aika a nako man te warekeno arei a kaotia nakoia kaain te kauntira i Shimabara, bukina ae a na arana te tabo arei bwa te tabo ae e kona ni kabuanibwai iai te aomata, ao te Baibara naba e tuangira bukina ae ti riai n tarataraira ma ni katauraoira bwa ti aonga n rawei maiura man te kabuanibwai ae na roko. Bon iai reireiara ae ti kona ni karekea man te kabuanibwai are e a riki i aon te Maunga are Fugen, ma n atai rawawatan bwaai aika a na riki nakon taai aika imwaira.
[Te Kabwarabwaraan te Taamnei 2]
COVER: Yomiuri/Orion Press/Sipa Press
[Te Kabwarabwaraan te Taamnei 3]
Yomiuri/Orion Press/Sipa Press