REIREI 28

Kakaitau n te Baere E Karaoia Iehova ao Iesu Ibukim

Printed Edition

Tera am namakin ngkana e anganiko raoraom te bwaintangira teuana ae tamaroa? Ko na bae n rangi ni kukurei iai, ao ko na kani kaotia nakon raoraom anne ae ko kakaitau iai. A anganira Iehova ao Iesu te bwaintangira ae te kabanea n tamaroa. Tera te bwaintangira anne ao ti na kangaa ni kaotia bwa ti kakaitau iai?

1. Tera te anga teuana ae ti kaota iai ara kakaitau ibukin te baere e karaoia te Atua ao Kristo ibukira?

E beritanna te Baibara bwa ‘ane e mwakuria onimakinan Iesu’ e na reke irouna te maiu are aki toki. (Ioane 3:16, kbn) Tera ae nanonaki ni mwakurian te onimaki? E bati riki ae nanonaki iai nakon ae tii kakoauaan Iesu. Ti riai naba ni kaota ara onimaki n ara motinnano ao ni baika ti karaoi. (Iakobo 2:17) Ngkana ti kaota ara onimaki ni baika ti kakaraoi ao n tataekin, ti a kakorakoraa iai ara iraorao ma Iesu ao Tamana ae Iehova.—Wareka Ioane 14:21.

2. Tera te botaki ae rangi ni kakawaki ae buokira ni kaota ara kakaitau n te baere e karaoia Iehova ao Iesu?

N te tairiki are imwaini maten Iesu ao e tuangia taan rimwina te anga riki teuana ae a na kaota iai aia kakaitau ibukin ana angakarea. E tuangia bwa a na ikotaki ibukin te botaki teuana ae okoro ae e aranna te Baibara bwa “Ana Katairiki te Uea,” ao e ataaki naba bwa Kauringaani mateni Kristo. (1 I-Korinto 11:20) E moani karaoa te botaki aei Iesu bwa e tangiriia ana abotoro ao Kristian ni koaua ni kabane ake imwia bwa a na ururingnga ae e anga maiuna ibukira. E tua ae kangai Iesu ni kaineti ma te kauring aei: “Kakaraoa aei bwa kanuringau.” (Ruka 22:19) Ngkana ko kaea te Kauring, ko a kaota iai am kakaitau ibukin tangirara ae bati iroun Iehova ao Iesu.

REIAKINA AE BATI RIKI

Nori aanga riki tabeua aika ko kona ni kaota iai am kakaitau ibukin te tangira ae bati are a kaotiotia Iehova ao Iesu. Iangoia bwa e aera ngkai e kakawaki Kauringaani mateni Kristo.

3. Ti kairaki n ara kakaitau bwa ti na karaoa te mwakuri

Iangoia bwa iai ae kamaiuko bwa ko na aki bwabwa. Ko na kona ni mwaninga te baere e karaoia te aomata anne ibukim? Ke ko na bon ukeri aanga tabeua ae ko na kaotia iai nakoina bwa ko kakaitau n te baere e karaoia?

Maiura aei bon ana bwai Iehova. Wareka 1 Ioane 4:8-10, ao maroroakin titiraki aikai:

E aera ngkai bon te bwaintangira ae okoro ana angakarea Iesu?
Tera am namakin n te baere a karaoia Iehova ao Iesu ibukim?

Ti na kangaa ni kaota ara kakaitau n te baere a karaoia Iehova ao Iesu ibukira? Wareka 2 I-Korinto 5:15 ao 1 Ioane 4:11; 5:3. Imwini warekan te kibu teuana ma teuana, maroroakina te titiraki aei:

Ni kaineti ma te kibu anne, tera ae ti kona ni karaoia ni kaota iai ara kakaitau?

4. Kakairi iroun Iesu

Te anga teuana ae ti kaota naba iai ara kakaitau, boni man arora ni kakairi iroun Iesu. Wareka 1 Betero 2:21, ao maroroakina te titiraki aei:

Baikara aanga aika ko na toua raoi iai mwini mwanekan Iesu?

E wareka ana Taeka te Atua Iesu man te nira ni boki. — E tangira Ana Taeka te Atua Iesu, e tataekina te rongorongo ae raoiroi, ao e buokiia tabemwaang

E taetae Iesu nakon ainen Tamaria i taun te mwanibwa. — E tangira Ana Taeka te Atua Iesu, e tataekina te rongorongo ae raoiroi, ao e buokiia tabemwaang

5. Kaea Kauringaani Mateni Kristo

Ngkana ko kan ataa te bae riki ngke e moani karaoaki Ana Katairiki te Uea, wareka Ruka 22:14, 19, 20, ao maroroakin titiraki aikai:

Tera ae karaoaki n Ana Katairiki te Uea?
E tei ibukin tera te bwerena ao te wain?—Nora kibuna 19 ao 20.

E kantaningaia taan rimwina Iesu bwa a na kakaraoa Ana Katairiki te Uea ni katoa ririki, n te bongi n namwakaina are e mate iai. Ngaia are a ikotaki ni katoa ririki Ana Tia Kakoaua Iehova ni kauringa mateni Kristo, n aron are e tua. Ngkana ko kan ataa riki aron te botaki ae kakawaki aei, kaota te TAAMNEI. Ao maroroakina te titiraki aei.