E Rineiia Abotoro Ake Tengauni ma Uoman Iesu

Imwin ana uarongorongo Iesu tao teuana ma te iterana te ririki, e a riai ni karaoa te motinnano ae kakawaki. Antai aika e na rineiia bwa a na uaia ni mwakuri ma ngaia? Antai aika e na kataneiaia bwa a na kairiri n te ekaretia ni Kristian? E kainnanoa ana kairiri Iehova ibukini karaoani motinnano aikai. Ngaia are e nakon te maunga ni kaokoroa iai, ao e kangainaa n tataro. Ngke e a ingabong, e a weteiia taan rimwina ni kabane ao e rineiia ana abotoro aika 12. Antai aika ko uringi araia? Naakai boni Betero, Anterea, Iakobo, Ioane, Biribo, Baretoromaio, Toma, Mataio, Iakobo are natin Arebaio, Tataio, Timon, ao Iuta Itekariota.

A iriria ni mwananga naaka Tengauni ma Uoman aikai. Imwini kataneiaakia irouna, a a kanakoaki bwa a na uarongorongo n tii ngaiia. E angania te mwaaka Iehova bwa a na kanakoia taimonio ao ni kamarurungia aomata aika aoraki.

E arania naaka Tengauni ma Uoman aikai Iesu bwa raoraona, ao e onimakinia. Ma Baritaio a iangoiia abotoro bwa aomata aika aki kakannato ao e uarereke aia reirei. Ma e reireinia Iesu ni kataneiaia n aia mwakuri. A na raona Iesu n taai aika rangi ni kakawaki ni maiuna, imwaini matena ao imwini kautakina man te mate. N aron Iesu, angia i buakoia naake Tengauni ma Uoman boni kaaini Kariraia. Tabeman i buakoia bon iai buuia.

A aki kororaoi abotoro aikai ao a kakaraoi kairua naba. N tabetai, a taetae n aki iango moa ao ni karaoi naba motinnano aika buakaka. N tabetai, a aki taotaon nanoia. A boni kauntaeka naba bwa antai ae kakannato riki. Ma bon aomata aika raoiroi aika tangira Iehova. A na riki bwa aan te ekaretia ni Kristian, ngkana e a nako Iesu.