KARAKI 91

E Reirei Iesu N Te Maunga

NORA Iesu ae tekateka aei. E reireinia aomata aikai aika a mena i aon te maunga i Kariraia. Naake a tekateka n uakaan ma ngaia, bon taan rimwina. E a tia n rineia 12 mai buakoia bwa ana abotoro. Abotoro bon taan rimwin Kristo ake a okoro riki. Ko atai araia?

Iai Timon Betero ao tarina ae Anterea. Iai naba Iakobo ao Ioane, ake taari naba. Temanna te abotoro ae arana naba Iakobo, ao are temanna arana naba Timon. Iai naba abotoro aika uoman ae araia Iuta. Temanna Iuta Itekariota, ao are temanna Iuta ae arana naba teuana Tataio. Iai naba Biribo ao Natanaera (ae arana teuana Baretoromaio), ao Mataio ma Toma.

Imwin okia mai Tamaria, ao e a moanna Iesu n uarongorongoa ae kangai: ‘E a kaan uean te Atua.’ Ko ataia bwa tera uean te Atua? Bon ana tautaeka ni koaua te Atua. E na uea iai Iesu. E na tautaeka mai karawa ao e na karekea te rau nakon te aonnaba. E na karaoaki naba te aonnaba ni kabutaa iroun Ana Tautaeka n Uea te Atua, bwa te baretaiti ae rangi ni kan.

E reireinia aomata Iesu taekan te tautaeka aei. E kabwarabwaraa ni kangai: ‘E kangai arom n tataro. Tamara are i karawa, e na tabuaki aram. E na roko ueam. E na tauaki am taeka i aon te aba, n ai aron tauana i karawa.’ A bati aomata aika a arana te tataro aei bwa ‘Ana Tataro te Uea.’ Ma tabemwaang a aranna bwa ‘Tamara are i Karawa.’ E matenikuna iroum te tataro aei ni kabane?

E reireinia naba aomata Iesu aroia n reitaki ma tabemwaang. E taku: ‘Karaoa te mwakuri nakoia aomata are ko tangiria bwa a na karaoia naba nakoim.’ Tiaki ko kukurei ngkana a akoiko aomata? Mangaia are e taku Iesu, bwa ti riai naba n akoia aomata. Tiaki e na kakukurei te maiu n te aonnaba ae te baretaiti, ngkana a bane aomata ni karaoa aei?

Mataio mwakoro 5 nakon 7; 10:​1-4.