Te Kabwarabwara i Aon te Maunga

Ngke e tia Iesu n rineiia ana abotoro ake 12 ao e a ruo man te maunga nakon te tabo are a ikotaki iai aomata aika bati. A roko mai Kariraia, Iutaia, Turo, Titon, Turia, ao man iteran te Ioretan are teuana. Ao a kairiia aomata aika aoraki ao tabeman a taniaki irouia taimonio. E bane ni kamarurungia Iesu. Imwina, e tekateka n raabeen te maunga ao ni moana ana maroro. E kabwarabwaraa te bwai ae ti riai ni karaoia ngkana ti kan riki bwa raoraon te Atua. Ti riai n ataia ae ti kainnanoa Iehova ao ti riai ni karekea tangirana. Ma ti aki kona n tangira te Atua ngkana ti aki tangiriia aomata. Ti riai n akoiia aomata nako ao ni karaoa ae riai nakoia, ao nakoia naba aika kairiribai nakoira.

E taku Iesu: ‘E aki tau bwa kam na tii tangiriia raoraomi. Kam riai naba n tangiriia aika kairiribai nakoimi ao ni kabwarai aia bure aomata mai nanomi. Ngkana iai ae e un iroum, naako kawaria ngkekei naba ao kabwaraa am bure. Te baere ko tangiria bwa a na karaoia nakoim karaoia naba nakoia.’

E angania naba aomata Iesu taeka n reirei aika manena ibukin te kaubwai. E taku: ‘E kakawaki riki bwa ko na riki bwa raoraon Iehova nakoni kabatiaan am mwane. E kona te tia iraa ni kimoaa am mwane, ma akea ae e kona n anaa am iraorao ma Iehova. Katoka raraomaeakinani kanam ke nimam, ke kunnikaim. Taraiia mannikiba. E taraia raoi te Atua n taai nako bwa e na tau kanaia. E aki kona te raraoma ni kaananaua maium tebongina riki. Uringnga bwa e atai baika ko kainnanoi Iehova.’

A tuai n ongo mai mwaina taeka ake e taekin Iesu aomata aikai. A tuai n reireinaki baikai irouia mataniwi n aia Aro. E aera Iesu ngkai bon te tia reirei ae kakannato? Ibukina bwa bwaai ni kabane ake e reireinia iai aomata boni mairoun Iehova.