Reirei 4
Antai te Riaboro?
Tatan te Riaboro—e riki maiia? (1, 2)
E kanga ni mwamwanaia aomata Tatan? (3-7)
Bukin tera ngkai ko riai n rarawa nakon te Riaboro? (7)
1. Te taeka ae te “riaboro,” nanona, te aomata ae taekin kewe aika buakaka ibukin te aomata temanna. Te taeka ae “Tatan,” nanona, te tia kairiribai ke te tia kaitara ae te kabanea ni buakaka. E anganaki nakoa aikai, ana kairiribai te Atua. N te moan tai, bon te anera ae kororaoi, ae e mena irarikin te Atua i karawa. Ma imwina riki, e kabatia iangoan tamaroana irouna ao e tangira te kan taromauriaki, ae te bwai ae riai ni karaoaki nakon te Atua n tii ngaia.—Mataio 4:8-10.
2. E taetae nakon Nei Ewa te anera ae Tatan aei, rinanon te naeta. N ana kewe nakoina, e kaira neierei bwa e na aki ongeaba iroun te Atua. N arona anne, Tatan, e kataia n eka nako ana “tautaeka” te Atua, ke nakoana ae te Atua ae Moan te Rietata. Tatan, e kananokokorakina raoiroin ana tautaeka te Atua, bwa a kona ni kabwaia iai Ana toro ke a aki. E karika naba te nanououa ibukia aomata Tatan, bwa a kona n teimatoa ni kakaonimaki iroun te Atua ke a aki. N ana mwakuri aei, Tatan, e karikia bwa ana kairiribai te Atua. Ngaia anne bukina are e riki n aranaki bwa Tatan te Riaboro.—Karikani Bwaai 3:1-5; Iobi 1:8-11; Te Kaotioti 12:9.
3. E kataia ni mwamwanaia aomata Tatan bwa a na taromauriia. (2 I-Korinto 11:3, 14) Ana anga teuana ni mwamwanaia aomata, bon rinanon Aaro aika kewe. Ngkana e taekin kewe ibukin te Atua te Aro teuana, nanona, bwa e buoka aron karaoan ana mwakuri Tatan. (Ioane 8:44) Aomata aika kaain Aaro aika kewe, a kona n taku bwa a taromauria te Atua ma nanoiia ni koaua. Ma a bon toro iroun Tatan. Boni ngaia “atuan aon te aba.”—2 I-Korinto 4:4.
4. Te tabunea bon ana anga Tatan teuana riki are e tauu aroia aomata iai. A kona ni weteia anti tabeman bwa a na kawakiniia, ke a na manibuakaia aomata tabeman, ke a na taekin kanoan taai aika a na roko, ke ni karaoi kakai. Tatan, bon te aomata ae mwaaka ae buakaka, ae boutokai mwakuri aikai ni kabane. Ngkana ti na kakukureia te Atua, ti riai ni kararoaira man te tabunea.—Te Tua-Kaua 18:10-12; Mwakuri 19:18, 19.
5. E mwamwanaia aomata naba Tatan bwa a na kamoamoa aia reeti n aomata, ma n taromaurii botaki n tautaeka. A taku tabeman bwa e raoiroi riki aia reeti ke aia botannaomata nakoia ake tabeua. Ma e aki koaua aei. (Mwakuri 10:34, 35) Tabeman riki, a onimakina aia botaki n tautaeka aomata, ibukin katokan ana kanganga te botannaomata. Ni karaoan anne, a rarawa nakon Ana Tautaeka n Uea te Atua. Bon tii ngaia ae kona ni katoka ara kanganga.—Taniera 2:44.
6. Ana anga Tatan teuana riki ibukin mwamwanaia aomata, ngkana e kaiririia n tangiran bwaai aika bure. E tuangira Iehova, bwa ti riai n rawa nakon mwakuri aika a buakaka, ibukina bwa e ataia bwa ti na reke n te kanganga iai. (I-Karatia 6:7, 8) Tao tabeman, a na tangiriko bwa ko na raoniia ni karaoi mwakuri aikai. Ma uringnga, bon Tatan ae tangiriko bwa ko na karaoi mwakuri aikai.—1 I-Korinto 6:9, 10; 15:33.
7. Tatan, e kona ni kabongana te bainikirinaki ke te kairiribai ni kairiko bwa ko na kitana Iehova. Tabeman mai buakoia aomata aika a tangiraki iroum, a kona n un nakoim ngkai ko reirei n te Baibara. Tabeman riki, a kona ni kakanikoko. Ma antai ae e anganiko maium? E kani kamaakuko Tatan, bwa ko aonga ni katoka am reirei ibukin Iehova. Tai kariaia bwa e na tokanikai Tatan! (Mataio 10:34-39; 1 Betero 5:8, 9) Ngkana ko rarawa nakon te Riaboro, ko kona ni kakukureia nanon Iehova, ma ni kaotia bwa ko tei ibukin Ana tautaeka.—Taeka N Rabakau 27:11.
[Caption on page 9]
Aaro aika kewe,te tabunea, ao te nano n aba, a mwamwanaia aomata
[Caption on page 9]
Rarawa nakon Tatan n te aro ae ko teimatoa n reireiniko taekan Iehova