Reirei 5
Tera Ana Kaantaninga te Atua Ibukin te Aonnaba?
Bukin tera Iehova ngke e karika te aonnaba? (1, 2)
Bukin tera bwa tiaki te baretaiti te aonnaba ngkai? (3)
Tera ae na riki nakoia aomata aika a buakaka? (4)
N taai aika imwaira, tera ae na karaoia Iesu ibukia aoraki? kaara? maate? (5, 6)
Tera ae ko riai ni karaoia ngkana ko kani kabwaia mani bwaai aika a na karaoaki n taai aika imwaim? (7)
1. E karika te aonnaba Iehova, bwa a aonga ni kukurei aomata ni maeka iai n aki toki. E tangiria bwa e na aki toki ni maekanaki te aonnaba aei, irouia aomata aika raoiroi ma ni kukurei. (Taian Areru 115:16; Itaia 45:18) E na bon aki kamaunaki te aonnaba; e na teimatoa n aki toki.—Taian Areru 104:5; Te Minita 1:4.
2. Ngke e tuai ni karika te aomata, te Atua, E rinea te tabo ae uarereke teuana, ao e karaoa iai te baretaiti ae tikauarerei. E arana te tabo anne bwa te o-n-aroka are Eten. Boni ngaia aei te tabo are e kamaekaia iai te moani mwaane are Atam, ao te moan aine are Nei Ewa. Te Atua, e tangiriia bwa a na karika natiia, ma ni kaona te aonnaba ni kabuta. Teutana imwin teutana, a na kabuta te baretaiti anne nakon tabon aonnaba.—Karikani Bwaai 1:28; 2:8, 15.
3. A bure Atam ao Nei Ewa ngke a riaon ana tua te Atua ni bon nanoiia. Mangaia are Iehova, e a katinanikuiia man te o-n-aroka are Eten. E a bua te Baretaiti. (Karikani Bwaai 3:1-6, 23) Ma e a aki manuokina ana moan kaantaninga ibukin te aonnaba aei Iehova. E a tia ni berita bwa e na karikia bwa te baretaiti, ike a na maiu n aki toki iai aomata. E na kanga ni karaoa anne?—Taian Areru 37:29.
4. Ngkana e na kona n riki bwa te baretaiti te aonnaba aei, ao a riai moa ni kamwawaki aomata aika a buakaka. (Taian Areru 37:38) E na karaoaki aei n Aremaketon, are ana buaka te Atua ae e na katoka te buakaka. Imwina, e na kainaki Tatan inanon 1,000 te ririki. Mangaia are, akea aomata aika buakaka aika a na katukaki bwa a na urua te aonnaba. Bon tii ana aomata te Atua aika a na kamaiuaki iai.—Te Kaotioti 16:14, 16; 20:1-3.
5. Ao ngkanne, e na tautaeka ma n Uea Iesu Kristo i aon te aonnaba, inanon te maan ae 1,000 te ririki. (Te Kaotioti 20:6) Teutana imwin teutana, e na kamwawa te bure man ara iango ao rabwatara. Ti na riki bwa aomata aika kororaoi, n ai aroia Atam ao Nei Ewa ngke a tuai ni bure. Akea iai te aoraki, te kara ao te mate. A na kamaiuaki aomata aika aoraki, ao a na manga riki n ataei kaara.—Iobi 33:25; Itaia 33:24; Te Kaotioti 21:3, 4.
6. N ana tai n Tautaeka Iesu ae Maanna Teuana Tenga te Ririki, a na mwakuri aomata aika kakaonimaki, ni manga karika te aonnaba aei ni kabuta bwa te baretaiti. (Ruka 23:43) Iai naba maate aika mirion ma mirion mwaitiia aika a na kautaki nakon te maiu i aon te aonnaba. (Mwakuri 24:15) Ngkana a ira nanon te Atua ibukiia, a na teimatoa ni maiu n aki toki i aon te aonnaba. Ngkana a aki, a na kamaunaki n aki toki.—Ioane 5:28, 29; Te Kaotioti 20:11-15.
7. E na kakoroaki bukin ana moan kaantaninga te Atua ibukin te aonnaba. Ko tangiria ni karekei kakabwaia aikai, aika a na reke n taai aika a na roko? Ngkana ko tangiria, ko riai n teimatoa n reirei taekan Iehova ma n ongeaba n ana tua. Kaean botaki aika a karaoaki n aia Maneaba N Uea Ana Tia Kakoaua Iehova ae mena n am tabo, e na buokiko iai.—Itaia 11:9; Ebera 10:24, 25.
[Caption on page 10]
Te Baretaiti ae bua
[Caption on page 11]
Imwin Aremaketon, e na manga karikaki te aonnaba bwa te baretaiti