Reirei 3
Antai Iesu Kristo?
Bukin tera ngkai e aranaki Iesu bwa “te moa ni bung” ibuakoia Natin te Atua? (1)
Bukin tera ngkai e aranaki bwa “te Taeka”? (1)
Bukin tera Iesu ngke e roko i aon te aba ao e riki n aomata? (2-4)
Bukin tera ngke e karaoi kakai? (5)
Tera ae e na karaoia Iesu n te tai ae e kaan n roko ngkai? (6)
1. E maeka i karawa Iesu bwa te aomata ae te taamnei, imwain rokona i aon te aba. Bon ana moani karikibwai te Atua, mangaia are e aranaki bwa te “moa ni bung” ibuakoia Natin te Atua. (I-Korote 1:15; Te Kaotioti 3:14) Bon tii Iesu, te Nati ae karikaki iroun te Atua n tii ngaia. Imwain rokona i aon te aba, Iehova, e kabongana Iesu bwa ana “tia makuri ae rabakau,” ni kariki nikirani bwaai ni kabane, i karawa, ao i aon te aba. (Taeka N Rabakau 8:22-31; I-Korote 1:16, 17) E kabongana naba Iesu te Atua, bwa Ana tia taetae ae kakannato. Ibukin anne, e aranaki Iesu bwa “te Taeka.”—Ioane 1:1-3, New World Translation; Te Kaotioti 19:13, NW.
2. E kanakoa Natina te Atua, nakon te aonnaba ngke e kamwainga maiun Iesu mai karawa, nako nanon biroton Nei Maria. Mangaia are, akea taman Iesu ae kaain te aonnaba. Ibukin anne, e aki ituaki n te bure, ke te maiu ae aki koro raoi. Iai bukina aika tenua, are e kanakoa Iesu nakon te aonnaba te Atua: (1) Ibukin reiakinara taekan te koaua ibukin te Atua (Ioane 18:37), (2) ibukin kaotan te katoto ibukin te aro ni kakaonimaki ae kororaoi ae ti na kakairi iai (1 Betero 2:21), ao (3) e na anga maiuna bwa te karea ae na kainaaomataira man te bure ao te mate. Bukin tera ngke e kainnanoaki karaoan anne?—Mataio 20:28.
3. Ngke e aki ongeaba n ana tua te Atua te moan aomata are Atam, e karaoa te bwai ae aranaki n te Baibara bwa “te bure.” Mangaia are, e katuaeaki n te mate iroun te Atua. (Karikani Bwaai 3:17-19) E manga aki boraoi maiuna ma ana tua te Atua, mangaia are e a kerikaki kororaoina. Teutana imwin teutana, e a rikirake ni kara ni karokoa matena. A ituaki natin Atam n te bure. Ngaia anne bukin rikirakera ni kara, ituakira n te aoraki, ao matera. E na kanga ni kona ni kamauiaki te botannaomata?—I-Rom 3:23; 5:12.
4. Bon te aomata ae kororaoi Iesu, n ai aron Atam. Ma e aki katotonga Atam, bwa e kororaoi ana ongeaba Iesu nakon te Atua, e ngae ngke moan te rawawata kataakina. Ibukin anne, e kona ni kareana maiuna ae kororaoi ibukin kabooani mwin ana bure Atam. Aio te bwai ae taekinaki n te Baibara bwa te “kaboomwi.” A kainaaomataki iai natin Atam man te kabuakakaki nakon te mate. Aomata ni kabane aika a onimakina Iesu, a kona ni karekea kabwaran aia bure, ao te maiu are aki toki.—1 Timoteo 2:5, 6; Ioane 3:16; I-Rom 5:18, 19.
5. Ngke e mena i aon te aba Iesu, e kamaiuia aoraki, e kaamwarakeia akana a baki, ao e karaui angibuaka. E kautia naba maate. Bukin tera ngke e karaoi kakai? (1) E nanoangaia aomata aika a kammarakaki, ao e tangiria ni kani buokiia. (2) E kakoauaki n ana kakai, bwa bon Natin te Atua ngaia. (3) E kaotii bwaai aika e na karaoi ibukia aomata aika a ongeaba ngkana e tautaeka n Uea i aon te aonnaba.—Mataio 14:14; Mareko 2:10-12; Ioane 5:28, 29.
6. E mate Iesu, ao e kautaki n te rabwata n taamnei iroun te Atua, ao e manga okira karawa. (1 Betero 3:18) Imwin anne, e karikaki bwa te Uea iroun te Atua. E nang roko te tai are Iesu, e na kamaunai buakaka ao maraki ni kabane mai aon te aonnaba aei.—Taian Areru 37:9-11; Taeka N Rabakau 2:21, 22.
[Caption on page 7]
N ana mwakuri ni minita,Iesu e karaoi reirei, kakai,ao e kareana maiuna ibukira