Reirei 2
Antai te Atua?
Antai te Atua ni koaua, ao antai arana? (1, 2)
Aekakira rabwatan te Atua? (3)
Tera aroarona ae rangi ni kaotaki? (4)
Ti riai ni kabongana katotongan ke bannan bwaai, ngkana ti taromauria? (5)
Tera anga aika uoua ae ti kona n reirei taekan te Atua iai? (6)
1. A mwaiti bwaai aika a taromauriaki irouia aomata. Ma e tuangira te Baibara, bwa tii temanna te Atua NI KOAUA. E kariki bwaai ni kabane, aika i karawa ao i aon te aonnaba. Ibukina bwa e anganira te maiu, bon tii Ngaia ae ti riai n taromauria.—1 Korinto 8:5, 6; Te Kaotioti 4:11.
2. A mwaiti nakoan te Atua, ma tii teuana arana. Arana, bon IEHOVA. E a tia ni kamaunaki aran te Atua man angini Baibara, ao e a oneaki mwina n nakoa aika TE UEA ke TE ATUA. Ma ngke e moa ni koreaki te Baibara, e a koreaki iai te ara ae Iehova, 7,000 tabun te tai!—Te Otinako 3:15; Taian Areru 83:18.
3. Iai rabwatan Iehova ma tiaki aron rabwatara. “Bon te Tamnei te Atua,” e taku te Baibara. (Ioane 4:24) Te taamnei, bon te aekani maiu teuana ae e rietata riki nakoni maiura. Akea te aomata ae a tia n nora te Atua. E maeka i karawa Iehova, ma e kona n nori bwaai ni kabane. (Taian Areru 11:4, 5; Ioane 1:18) Ma tera te taamnei ae raoiroi? Tiaki te aomata, ae ai aron te Atua. Ma boni mwaakan te Atua ae kakamwakuri.—Taian Areru 104:30.
4. E a kaotaira aroaron Iehova te Baibara. E kaotia bwa aroarona aika kakannato, bon te tangira, te kaeti taeka ae riai, te rabakau ao te korakora. (Te Tua-Kaua 32:4; Iobi 12:13; Itaia 40:26; 1 Ioane 4:8) E tuangira naba te Baibara, bwa e nanoanga, e akoi, e kabwarai buure, e kakaianga, ao e taotaona nanona. N aroia ataei aika ongeaba, ti riai naba ni kataia ni katotonga aroarona.—I-Ebeto 5:1, 2.
5. Ti riai ni bobaraki imataia, ke n tataro nakon katotongani bwaai, taamnei, ke bannan bwaai n ara taromauri? Ti aki! (Te Otinako 20:4, 5) E taku Iehova bwa ti riai n taromauria n tii ngaia. E na aki anga neboakina nakon te bwai teuana ke te aomata temanna. Akea korakoran katotongani bwaai, ao a aki kona ni buokira.—Taian Areru 115:4-8; Itaia 42:8.
6. Ti na kanga ni kinaa riki te Atua? Te anga teuana, ngkana ti tara ana kariki bwai, ma n iangoa raoi reireiara maiai. Ana kariki bwai te Atua, a kaotaira bwa iai irouna te korakora ao te rabakau ae bati. Ti nora naba ana tangira inanon bwaai ni kabane ake e a tia ni karaoi. (Taian Areru 19:1-6; I-Rom 1:20) Te anga riki teuana ae ti kona n reireinira taekan te Atua, ngkana ti reirei n te Baibara. E tuangira inanona, taekan aroarona n Atua. E kaongoira iai naba taekan ana kaantaninga, ao bwaai aika e tangirira bwa ti na karaoi.—Amota 3:7; 2 Timoteo 3:16, 17.
[Caption on page 5]
Ti reireiaki taekan te Atua man bwaai aika karikaki ao man te Baibara