Reirei 1

Ko na Kanga ni Kakaai Rongorongoni Bwaai Aika Tangiraki Iroun te Atua

Tera te rongorongo ae kakawaki ae mena n te Baibara? (1)

Antai te tia korea te Baibara? (2)

Bukin tera ngkai ko riai n reirei n te Baibara? (3)

1. Te Baibara, bon te bwaintangira ae kakawaki mairoun te Atua. Ai aron te reta mairoun te tama ae tatangira, nakoia natina. E kaongoira taekan te koaua ibukin te Atua​—⁠antai ngaia, ao tera ana tua. E kabwarabwara aron reken te tokanikai i aon kanganga, ao aron reken te kukurei ni koaua. Tii te Baibara ae tuangira bwaai aika ti riai ni karaoi ibukin kakukureian nanon te Atua.​—⁠Taian Areru 1:​1-3; Itaia 48:​17, 18.

2. E koreaki te Baibara irouia aomata aika 40 mwaitiia, inanon te tai ae maanna 1,600 te ririki, ni moa man 1513 B.C.E. Iai 66 booki aika a uarereke inanona. Aomata aika a korea te Baibara, a kairaki iroun te Atua. A korei ana iango te Atua, ao tiaki oin aia iango. Mangaia are, te tia Korea te Baibara, bon te Atua ae e mena i karawa, ao tiaki te aomata temanna ae e mena i aon te aonnaba.​—⁠2 Timoteo 3:​16, 17; 2 Betero 1:​20, 21.

3. Te Atua, e bairea raoi aron etin kaewewean te Baibara, ao aron kawakinana. A mwaiti riki Baibara aika a a tia ni boreetiaki, nakon booki nako. A na aki bane ni kukurei aomata n noriko n reirei n te Baibara, ma tai kariaia anne bwa e na katoka am reirei iai. Reken te maiu are aki toki iroum, e boboto i aon kinaakin te Atua ma karaoan nanona, e ngae ngke ko a ribaaki iai.​—⁠Mataio 5:​10-12; Ioane 17:⁠3.