KARAKI 116
Arora Ni Kona Ni Maiu N Aki Toki
KO KONA n taekinna bwa tera ae e warekia te ataeinnaine ae uarereke aei ma raoraona? Eng, bon te boki naba ae ko warekia aei, ae—Karaki Man te Baibara. Ao a wareka naba te karaki ae ko warekia aei, ae “Arora ni Kona ni Maiu n Aki Toki.”
Ko ataia bwa tera ae a reiakinna? Te moanibwai ae ti riai n ataia bwa ti aonga ni karekea te maiu are aki toki, bon taekan Iehova ao Natina ae Iesu. E taku te Baibara: ‘Aio aroni karekean te maiu are aki toki. Reiakina taekan te Atua ae tii ngaia ae koaua, ao Natina are e kanakomaia nakon te aonnaba are Iesu Kristo.’
Ti na kanga n reiakina taekan Iehova ae te Atua ao Natina ae Iesu? Te anga teuana, boni man te wareware n te boki ae Karaki Man te Baibara mai moana ni karokoa banena. E bati karakinan Iehova iai ao Iesu, tiaki ngaia anne? Ao e taekini naba bwaai ake a a tia ni karaoi, ao bwaai ake a na karaoi. Ma e bati riki te bwai ae ti riai ni karaoia nakon tii warekan te boki aei.
Ko nora te boki teuana ane e wene anne? Bon te Baibara. Karekea temanna bwa e na wareka nakoim mwakoron te Baibara, ake a boboto iai karaki man te boki aei. E na anganira te rongorongo ae bwanin te Baibara are ti kainnanoia bwa ti aonga n toro iroun Iehova n te aro ae eti, ao ti na karekea iai te maiu are aki toki. Mangaia are ti bon riai ni karekea bwa anuara reiakinan te Baibara ni katoatai.
Ma e aki tau tii reiakinan taekan Iehova ae te Atua ao Iesu Kristo. Ti kona ni karekea ataakia ae rangi ni bati ao ataakin aia reirei, ma ti bon tuai naba tau nakon te maiu are aki toki. Ko ataia bwa tera riki ae kainnanoaki?
Ti tangiria naba ni maiuakini baike ti reiakin. Ko uringa ngkoa Iuta Itekariota? Boni ngaia temanna mai buakoia naake 12 ake a rineaki iroun Iesu bwa ana abotoro. E rangi ni bati ana atatai Iuta i aon taekan Iehova ao Iesu. Ma tera are e riki nakoina? Imwin tabeua te tai ao e a rikirake ni bangaaomata, ao e a kamwanea Iesu nakoia ana kairiribai ibukin 30 te mwakoro n tirewa. Mangaia are e na aki karekea te maiu are aki toki Iuta.
Ko uringa Keati, are teuare ti reiakina taekana ni Karaki 69? E tangiria ni karekei tabeua ana kunnikai ma ana mwane, ae tiaki bwaai ibukina. Mangaia are e kewe bwa e aonga n reke baikai irouna. Ma e katuuaea Iehova, ao e na katuuaaira naba ngkana ti aki ongeaba n ana tua.
Ma a bati aomata aika raoiroi ake a teimatoa n toro iroun Iehova ma te kakaonimaki. Ti kani katotongia, tiaki ngaia anne? Te banna ni katoto ae raoiroi bon Tamuera. Uringa taekana ni Karaki 55 bwa ai tibwa aua ke nimaua ana ririki, ao e a moanna naba n toro iroun Iehova n ana umwa-n-rianna ae tabu. Mangaia are e aki kakauaroro te toro iroun Iehova, e ngae naba ngkana ko uarereke.
Ni koauana, te aomata ae ti bane ni kan toua mwina bon Iesu Kristo. E ngae ngke e uarereke n aron ae oti ni Karaki 87, ma e boni mena n te tembora bwa e taekina Tamana are i karawa nakoia aomata. Ti riai ni katotonga aroarona. Ti bia tataekina taekan Atuara ae kamimi ae Iehova, ao Natina ae Iesu Kristo nakoia aomata aika bati. Ngkana ti karaoi baikai, ao ti na kona ngkanne ni karekea iroura te maiu are aki toki n ana baretaiti ae boou te Atua n te aonnaba.
Ioane 17:3; Taian Areru 145:1-21.