KEKEIAKI MA RIKIRAKENI BOONI BWAAI

E na Rau Nanom ni Baike Iai Iroum

Aomata ake a rauaki ni baike iai irouia a boni kukurei ni maiuia. Ao ngkana iai te bitaki nakoni baike a rinanoi, a kaangaraoa maiuia ma are boraoi ma aia karekemwane.

BUKINI KAKAWAKINA

E taekinna te tia rabakau n te iango ae Jessica Koehler bwa aomata ake a rau nanoia ni baike iai irouia, a bwabwaina te iango ae raoiroi ibukini bwaai. E kunea naba neiei bwa a karako bakantangia irouia tabemwaang. Anne bukina ae aomata ake a rau nanoia ni bwaai ake iai irouia, a kukukurei riki ao e karako tabeaiangaia. Ni koauana, tabeman i buakoia aomata aika a kukukurei, e boni karako aia bwai. Ao e boni koaua aei irouia naake a iangoi bwaai aika kakawaki riki ni maiuia bwa e aki kona ni kabooaki n te mwane, e rereke kukureia mani kabanean aia tai ma aia utu ao raoraoia.

“Ngkana iai kanara ma kunnikaira, ao a na rau nanora ni baikai.”—1 Timoteo 6:8.

TE BAE KO KONA NI KARAOIA

Rarawa ni kakabotau. Ngkana ko kabotaua maium ae mangori ma temanna ae taraa ni kaubwai, ko nang moanna n aki rauaki ni baike iai iroum ao ni bakantang naba. Ma aeka ni kabotau akanne a boni kona n aki koaua. Tabeman ake a bati aia bwai, a kona n ae a koko n taarau. E taku Nicole, ae maeka i Senegal: “I aki kainnanoi bwaai aika bati bwa I aonga ni kukurei iai. Ngkana e rau nanou ni baike iai irou, I boni kona ni kukurei e ngae ngkana a bati riki aia bwai tabemwaang nakoiu.”

Kataa aei: Rarawa ni katanoata n anainano ke ni baike a katokaaki n te intanete ake a kaatuua taekan te maiu ni kaubwai ke te maiuraoi irouia tabemwaang.

“E ngae ngkana a bati ana bwai te aomata, ma tiaki maiuna mwaitin ana bwai nako.”—Ruka 12:15.

Bwabwaina te kakaitau. A bae n rauaki riki ni baike iai irouia aomata aika bwabwaina te kakaitau ao e karako irouia namakinan ae a kainnanoa ae bati riki. E taku Roberton ae kaain Haiti: “I iaiangoi aia mwakuri n akoi tabemwaang ake a kaotiotia nakoiu ao nakoia au utu. Ao imwina I kaota au kakaitau ae bati nakoia aomata akanne n te baere a a tia ni karaoia. I reireina naba natiu te mwaane ae wanua ana ririki, arona n taekina ko rabwa ibukini bwaai ni kabane ake e anganaki.”

Kataa aei: Karekea am boki ibukini baika “ko kakaitau iai”. Kokorei baika ko kakaitau iai ni katoabong. Tao taekani kateimatoaani marurungim, am utu ni kaan temanna, taekaia raoraom ni koaua, ke tao kantaran naba bungintaai.

“E reitinako ana baka n amwarake ane e kakatonga nanona.”—Taeka N Rabakau 15:15.

Ti bane ni kabokorakora n tabetai bwa ti na rauaki ni baike iai iroura. Ma a bon uaana ara kakorakora iai! Ngkana ti rineia bwa ti na rauaki ni baike iai iroura, ti a rinea naba iai te kukukurei, ae te aroaro naba teuana ae aki kona ni kabooaki n te mwane.