Ani Kooloi Baaya Ŋwɛi?
Hetoo ni Biblia lɛ kɛhãa
Biblia lɛ tsɔɔ akɛ yɛ Nyɔŋmɔ adebɔɔ nibii lɛ fɛɛ ateŋ lɛ, adesai fioo ko pɛ ni baaya ŋwɛi. (Kpojiemɔ 14:1, 3) Amɛkɛ Yesu baayaye nɔ akɛ maŋtsɛmɛi kɛ osɔfoi yɛ jɛmɛ. (Luka 22:28-30; Kpojiemɔ 5:9, 10) Abaatee adesai babaoo ashi kɛba wala mli yɛ paradeiso shikpɔŋ lɛ nɔ.—Lala 37:11, 29.
Awieko yɛ Biblia lɛ mli he ko he ko akɛ kooloi ni asumɔɔ amɛsane ni akɛ amɛ hiɔ shĩa, tamɔ gbei nɛkɛ baaya ŋwɛi—ni jwɛŋmɔ yɛ enɛ mli. Kooloi nyɛɛɛ afee nibii ni hãa mɔ ko shɛɔ taomɔ nii kɛhã “ŋwɛi tsɛmɔ lɛ” he. (Hebribii 3:1) Nibii nɛɛ ekomɛi ji, ni mɔ lɛ baakase Nyɔŋmɔ he nii, ebaaná hemɔkɛyeli yɛ emli, ni ebaabo efamɔi atoi. (Mateo 19:17; Yohane 3:16; 17:3) Gbɔmɛi pɛ abɔ amɛ kɛ hiɛnɔkamɔ akɛ amɛbaahi shi kɛya naanɔ.—1 Mose 2:16, 17; 3:22, 23.
Kɛ́ adebɔɔ nii lɛ eko baaya ŋwɛi lɛ, esa akɛ egbo ni atee lɛ shi. (1 Korintobii 15:42) Biblia lɛ ewie gbohiiashitee babaoo ahe. (1 Maŋtsɛmɛi 17:17-24; 2 Maŋtsɛmɛi 4:32-37; 13:20, 21; Luka 7:11-15; 8:41, 42, 49-56; Yohane 11:38-44; Bɔfoi 9:36-42; 20:7-12) Gbɔmɛi sɔŋŋ shi atee lɛ, kooloo ko bɛ mli.
Ani kooloi yɛ susumai?
Dabi. Biblia lɛ kɛɔ akɛ, kooloi kɛ gbɔmɛi fɛɛ lɛ, susumai ji amɛ. (4 Mose 31:28) Be ni abɔ klɛŋklɛŋ gbɔmɔ, ni ji Adam lɛ, ahãaa lɛ susuma, moŋ lɛ ‘ebatsɔ susuma ni hiɛ kã.’ (1 Mose 2:7, shishigbɛ niŋmaa) Nibii enyɔ ni feɔ susuma lɛ: “shikpɔŋ sũ” kɛ “wala mumɔ.”
Ani susumai gboiɔ?
Hɛɛ, Biblia lɛ tsɔɔ akɛ, susuma baanyɛ agbo. (3 Mose 21:11, shishigbɛ niŋmaa; Ezekiel 18:20) Kɛ́ gbɔmɛi kɛ kooloi gboi lɛ, amɛkuɔ amɛsɛɛ kɛyaa shikpɔŋ sũ lɛ mli. (Jajelɔ 3:19, 20) Ni tsɔɔ akɛ, amɛbɛ shihilɛ mli dɔŋŋ.a
Ani kooloi feɔ esha?
Dabi. Kɛ́ akɛɛ mɔ ko efee esha lɛ, no tsɔɔ akɛ mɔ lɛ nyɛɔ ejwɛŋɔ, enuɔ nii ahe, loo efeɔ nɔ ko ni teɔ shi ewoɔ Nyɔŋmɔ mlai lɛ. Kɛ́ adebɔɔ nɔ ko baafee esha lɛ, esa akɛ enyɛ ekpɛ yiŋ yɛ nɔ ni ja kɛ nɔ ni ejaaa he, ni kooloi nyɛɛɛ afee nakai. Amɛwala shihilɛ mli fɛɛ lɛ, amɛdamɔɔ bɔ ni amɛnuɔ nii ahe amɛhãa lɛ nɔ amɛfeɔ amɛnii. (2 Petro 2:12) Kɛ́ amɛwala shihilɛ ba naagbee lɛ, amɛgboiɔ, eyɛ mli akɛ amɛfeee esha.
Ani esa akɛ wɔfee kooloi niseniianii?
Dabi. Nyɔŋmɔ hã gbɔmɛi hegbɛ yɛ kooloi anɔ, shi ehãaa amɛ hegbɛ ni amɛfee amɛ niseniianii. (1 Mose 1:28; Lala 8:6-8) Nyɔŋmɔ susuɔ kooloo fɛɛ kooloo ni loofɔji bibii po fata he lɛ ahe. (Yona 4:11; Mateo 10:29) Efã mɛi ni jáa lɛ lɛ koni amɛkɛ kooloi aye jogbaŋŋ.—2 Mose 23:12; 5 Mose 25:4; Abɛi 12:10.