Miitao Magbe Mihe—Kɛ́ Susumɔ Nɛɛ Ba Mijwɛŋmɔŋ Lɛ, Ani Biblia Lɛ Baanyɛ Awa Mi?

Hetoo ni Biblia lɛ kɛhãa

Hɛɛ! Biblia lɛ jɛ “Nyɔŋmɔ, mɔ ni shɛjeɔ mɛi ni tsui ekumɔ lɛ amii lɛ” ŋɔɔ. (2 Korintobii 7:6) Eyɛ mli akɛ Biblia lɛ jeee wolo ni akɛkaseɔ jwɛŋmɔ mli naagba he nii moŋ, shi eye ebua mɛi babaoo ni amɛnyɛ amɛye susumɔi ni hãa agbeɔ he anɔ. Ŋaawoo ni yɔɔ mli lɛ baanyɛ aye abua bo hu.

• Mɛɛ ŋaawoo ni yeɔ ebuaa Biblia lɛ kɛhãa?

• Ani Biblia lɛ gbaa wɔ mɛi ni kulɛ amɛmiitao amɛgbo ahe sane?

• Mɛɛ ŋmalɛi baanyɛ aye abua bo koni okpoo susumɔi ni hãa agbeɔ he?

• Kɛ́ onaanyo ko kɛɛ, “Miitao magbe mihe” lɛ mɛni obaafee?

• Kɛ́ mika akɛ magbe mihe pɛŋ hu?

Mɛɛ ŋaawoo ni yeɔ ebuaa Biblia lɛ kɛhãa?

• ● Hã mɛi krokomɛi ale bɔ ni onuɔ he.

  Nɔ ni Biblia lɛ kɛɔ: “Naanyo kpakpa sumɔɔ mɔ yɛ bei fɛɛ mli, ni ebatsɔɔ nyɛmi yɛ haomɔ beiaŋ.”—Abɛi 17:17.

  Nɔ ni etsɔɔ: Kɛ́ wɔhao lɛ, esa akɛ wɔhã mɛi krokomɛi aye abua wɔ.

  Kɛ́ ohãaa mɛi krokomɛi ale bɔ ni onuɔ he ohãa lɛ, onijiaŋ baaje wui. Shi kɛ́ okɛ mɛi krokomɛi gba he sane lɛ, ohe baajɔ bo fioo, ni obaaná jwɛŋmɔ ni ja yɛ onaagba lɛ he.

  

  Kaa enɛ okwɛ: Okɛ mɔ ko agba sane ŋmɛnɛ, ekolɛ owekunyo ko loo onaanyo ni oheɔ lɛ oyeɔ.a Obaanyɛ oŋmala bɔ ni onuɔ he ohãa lɛ hu yɛ wolo nɔ.

• ● Hã datrɛfonyo ni le naagba nɛɛ he nitsumɔ lɛ aye abua bo.

  Nɔ ni Biblia lɛ kɛɔ: “Mɛi ni yɔɔ hewalɛ lɛ, datrɛfonyo he ehiaaa amɛ, shi mɛi ni bɛ hewalɛ lɛ moŋ ehe hiaa.”—Mateo 9:12.

  Nɔ ni etsɔɔ: Kɛ́ wɔbɛ hewalɛ lɛ, esa akɛ wɔya helatsamɔhe.

  Kɛ́ mɔ ko nuɔ he akɛ egbe ehe lɛ, eeenyɛ efee akɛ eyɛ jwɛŋmɔŋ naagba. Taakɛ eji yɛ helai krokomɛi agbɛfaŋ lɛ, esaaa akɛ efeɔ mɔ lɛ hiɛgbele akɛ eeye hela nɛɛ. Abaanyɛ atsu jwɛŋmɔŋ naagbai ahe nii.

  Kaa enɛ okwɛ: Yaana datrɛfonyo ni tsuɔ naagba nɛɛ he nii kɛhã yelikɛbuamɔ mra.

• ● Hã ehi ojwɛŋmɔŋ akɛ Nyɔŋmɔ susuɔ ohe.

  Nɔ ni Biblia lɛ kɛɔ: “Ani afilimatai enumɔ lɛ, jeee kapɛji enyɔ ni shɛɛɛ nɔ ko ahɔ̃ɔ amɛ? Shi Nyɔŋmɔ hiɛ kpaaa amɛteŋ ekome folo po nɔ. . . . Nyɛkashea gbeyei; nyɛjara wa fe afilimatai babaoo.”—Luka 12:6, 7.

  Nɔ ni etsɔɔ: Nyɛjara wa hã Nyɔŋmɔ.

  Ekolɛ, obaanu he akɛ mɔ ko susuuu ohe, shi Nyɔŋmɔ le shihilɛ mli ni otsɔɔ lɛ. Kɛ́ oonu he akɛ jeŋ shihilɛ eje otsine po lɛ, esusuɔ ohe. Lala 51:17 lɛ kɛɛ, “Ao Nyɔŋmɔ, tsui ni ekumɔ ni werɛ eho ehe lɛ, okpoŋ.” Nyɔŋmɔ miisumɔ ni ohi wala mli ejaakɛ esumɔɔ bo.

  Kaa enɛ okwɛ: Pɛimɔ odaseyelii ni yɔɔ Biblia lɛ mli ni tsɔɔ akɛ Nyɔŋmɔ sumɔɔ bo lɛ amli. Akɛ nɔkwɛmɔnɔ lɛ, kwɛmɔ Tsi Obɛŋkɛ Yehowa wolo lɛ yitso 24 lɛ.

• ● Sɔlemɔ ohã Nyɔŋmɔ.

  Nɔ ni Biblia lɛ kɛɔ: ‘Nyɛshɛrɛa nibii ni hãa nyɛyeɔ nyɛtsui lɛ fɛɛ nyɛshwiea enɔ, ejaakɛ ejwɛŋɔ nyɛhe.’—1 Petro 5:7.

  Nɔ ni etsɔɔ: Nyɔŋmɔ miitao ni okɛɛ lɛ bɔ ni onuɔ he ohãa kɛ nibii ni gbaa onaa.

  Nyɔŋmɔ baanyɛ ahã oná toiŋjɔlɛ kɛ hewalɛ ni baahã onyɛ odamɔ shihilɛ ni okɛkpeɔ lɛ naa. (Filipibii 4:6, 7, 13) Nɛkɛ gbɛ nɔ etsɔɔ eyeɔ ebuaa mɛi ni jɛɔ amɛtsui mli amɛsɔleɔ kɛbiɔ edɛŋ yelikɛbuamɔ lɛ.—Lala 55:22.

  

  Kaa enɛ okwɛ: Sɔlemɔ ohã Nyɔŋmɔ ŋmɛnɛ. Tsɛ egbɛ́i ni ji, Yehowa lɛ, koni okɛɛ lɛ bɔ ni onuɔ he ohãa. (Lala 83:18) Bi lɛ ni eye ebua bo koni onyɛ odamɔ shihilɛ ni okɛkpeɔ lɛ naa.

• ● Jwɛŋmɔ wɔsɛɛ be he hiɛnɔkamɔ ni Biblia lɛ kɛhãa lɛ nɔ.

  Nɔ ni Biblia lɛ kɛɔ: “Nɛkɛ hiɛnɔkamɔ ni wɔyɔɔ nɛɛ tamɔ sɛ́kɛ ni tseee ni tsɛkɛɔ shi shiŋŋ kɛhã wɔwala.”—Hebribii 6:19, shishigbɛ niŋmaa.

  Nɔ ni etsɔɔ: Bɔ ni wɔnuɔ he wɔhãa lɛ baanyɛ atsake yɛ be kɛ beiaŋ tamɔ lɛlɛ ko ni miikpalaŋ kɛmiiya kɛmiiba, shi hiɛnɔkamɔ ni yɔɔ Biblia lɛ mli lɛ baanyɛ ahã wɔtsui anyɔ wɔ mli loo wɔŋmɛ dɛmm.

  Hiɛnɔkamɔ nɛɛ jeee nɔ ko ni wɔkpaa gbɛ kɛkɛ akɛ eba, moŋ lɛ, edamɔ shi ni Nyɔŋmɔ ewo akɛ ebaajie nibii fɛɛ ni hãa wɔpiŋɔ lɛ kɛje shihilɛ mli lɛ nɔ.—Kpojiemɔ 21:4.

  Kaa enɛ okwɛ: Kanemɔ Sane Kpakpa Ni Jɛ Nyɔŋmɔ Ŋɔɔ! wolo lɛ nikasemɔ 5 lɛ, koni ole Biblia mli hiɛnɔkamɔ nɛɛ he saji krokomɛi

• ● Feemɔ nɔ ko ni onyaa he waa.

  Nɔ ni Biblia lɛ kɛɔ: “Tsui ni yɔɔ miishɛɛ lɛ, eji tsofa kpakpa.”—Abɛi 17:22.

  Nɔ ni etsɔɔ: Kɛ́ wɔfee nibii ni baahã wɔná miishɛɛ lɛ, ehãa wɔnáa gbɔmɔtsoŋ hewalɛ kpakpa.

  

  Kaa enɛ okwɛ: Feemɔ nɔ ko ni onyaa he. Akɛ nɔkwɛmɔnɔ lɛ, bo lala ko ni shɛjeɔ mɔ mii toi, kanemɔ sane ko ni woɔ mɔ hewalɛ, loo feemɔ nɔ kroko ni hãa onáa miishɛɛ. Agbɛnɛ hu, kɛ́ ofee nɔ ko kɛye obua mɛi krokomɛi, kɛ́ eji nɔ ko bibioo po lɛ, ebaahã omiishɛɛ ada.—Bɔfoi 20:35.

• ● Kwɛmɔ ogbɔmɔtsoŋ hewalɛnamɔ jogbaŋŋ.

  Nɔ ni Biblia lɛ kɛɔ: “Kpɔiaŋgbɔlemɔ he yɛ sɛɛnamɔ.”—1 Timoteo 4:8, shishigbɛ niŋmaa.

  Nɔ ni etsɔɔ: Kɛ́ wɔgbɔle wɔkpɔiaŋ, wɔná be saŋŋ kɛwɔ, ni wɔye niyenii ni hãa mɔ náa hewalɛ lɛ, wɔnáa he sɛɛ waa.

  Kaa enɛ okwɛ: Yaa wɔk loo nyiɛmɔ oyayaayai, kɛ́ ofee nakai miniti 15 po lɛ ehi.

• ● Kaimɔ akɛ bɔ ni wɔnuɔ he wɔhãa kɛ nibii krokomɛi lɛ nyɛɔ etsakeɔ.

  Nɔ ni Biblia lɛ kɛɔ: “Nyɛleee nɔ ni baaba nyɛnɔ wɔ.”—Yakobo 4:14.

  Nɔ ni etsɔɔ: Naagba ni suɔ mɔ tsui, nɔ ni osusuɔ akɛ anyɛŋ aná naa tsabaa po baanyɛ aba naagbee.

  Ekɔɔɔ he eko bɔ ni shihilɛ ni okɛkpeɔ bianɛ lɛ mli wa hã lɛ, ebaanyɛ etsake wɔ. No hewɔ lɛ, taomɔ gbɛi anɔ ni obaatsɔ okpee naa. (2 Korintobii 4:8) Bɔ fɛɛ bɔ ni fee lɛ, be ni be shwieɔ mli lɛ shihilɛ ni okɛkpeɔ lɛ baatsake, shi kɛ́ ogbe ohe lɛ, onaagbee ji no.

  Kaa enɛ okwɛ: Kanemɔ Biblia mli amaniɛbɔi ni kɔɔ mɛi komɛi ni amɛnijiaŋ je wui aahu akɛ amɛshwe ni amɛgbo lɛ ahe lɛ ahe sane, koni ona bɔ ni sɛɛ mli lɛ amɛshihilɛ tsake ni amɛmii shɛ amɛhe bɔ ni amɛkpaaa gbɛ akɛ ebaaba lɛ. Enɛ he nɔkwɛmɔnii komɛi nɛ.

Ani Biblia lɛ gbaa wɔ mɛi ni kulɛ amɛmiitao amɛgbo ahe sane?

Hɛɛ. Biblia lɛ gbaa wɔ mɛi komɛi ni kɛɛ akɛ, “Miitao magbo lɛ” ahe sane. Nyɔŋmɔ kãaa amɛhiɛ, moŋ lɛ eye ebua amɛ. Ebaanyɛ eye ebua bo hu.

Elia

• ● Namɔ ni? Elia ji gbalɔ ni yɔɔ ekãa. Shi lɛ hu enijiaŋ je wui bei komɛi. Yakobo 5:17 lɛ kɛɛ, “Elia ji gbɔmɔ ni yɔɔ henumɔi tamɔ wɔ nɔŋŋ.”

• ● Mɛni hewɔ kulɛ etaoɔ ni egbo lɛ? Be ko shɛ ni Elia nu he akɛ eshwɛ ekome pɛ, eshe gbeyei waa, ni enu he akɛ ehe bɛ sɛɛnamɔ. No hewɔ lɛ esɔle akɛ: “Yehowa, ŋɔɔ miwala kɛya.”—1 Maŋtsɛmɛi 19:4.

• ● Mɛni ye ebua lɛ? Elia kɛɛ Nyɔŋmɔ bɔ ni enuɔ he ehãa. Mɛni Nyɔŋmɔ fee kɛwo lɛ hewalɛ? Nyɔŋmɔ hã Elia na akɛ esusuɔ ehe, ni efee nibii ni hã Elia na akɛ Nyɔŋmɔ yɛ hewalɛ. Ehã Elia ná nɔmimaa hu akɛ, lɛ ni ji Elia lɛ, he yɛ sɛɛnamɔ lolo ni ehã lɛ mɔ ko ni sa ni baanyɛ aye abua lɛ.

• ▸ Kanemɔ Elia he sane yɛ: 1 Maŋtsɛmɛi 19:2-18.

Hiob

• ● Namɔ ni? Hiob ji wekuyitso, ni eyɛ nii waa ni ejɛ etsui mli fɛɛ eja anɔkwa Nyɔŋmɔ lɛ.

• ● Mɛni hewɔ kulɛ etaoɔ ni egbo lɛ? Trukaa lɛ nibii gbohii pii ba enɔ. Enibii fɛɛ hiɛ kpãtã. Oshãra ko ba ni ebii fɛɛ gboi. Hela ko ni naa wa waa bamɔ lɛ. Naagbee lɛ, afolɔ enaa akɛ nɔ ni edu lɛ no ekpaa lɛ. Hiob kɛɛ akɛ: “Minyaŋeɔ miwala; Misumɔɔɔ maya nɔ mahi wala mli.”—Hiob 7:16.

• ● Mɛni ye ebua lɛ? Hiob sɔle koni Nyɔŋmɔ awa lɛ ni ekɛ mɛi krokomɛi gba enaagba lɛ he sane. (Hiob 10:1-3) Enaanyo ko ni atsɛɔ lɛ Elihu lɛ wo lɛ hewalɛ, ni eye ebua lɛ ni ená jwɛŋmɔ ni ja yɛ eshihilɛ lɛ he. Nɔ ni fe fɛɛ lɛ ekpɛlɛ ŋaawoo kɛ hewalɛwoo ni Nyɔŋmɔ kɛhã lɛ lɛ nɔ.

• ▸ Kanemɔ Hiob he sane yɛ: Hiob 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mose

• ● Namɔ ni? Mose ji blema Israelbii lɛ ahiɛnyiɛlɔ kɛ gbalɔ anɔkwafo.

• ● Mɛni hewɔ kulɛ etaoɔ ni egbo lɛ? Nyɔŋmɔ kɛ nitsumɔ ko ni wa waa wo Mose dɛŋ, awie ashi lɛ yɛ be kɛ beiaŋ, ni etɔ lɛ. No hewɔ lɛ, ebolɔ etsɛ Nyɔŋmɔ ekɛɛ: “Ofainɛ, gbee mi bianɛ nɔŋŋ.”—4 Mose 11:11, 15.

• ● Mɛni ye ebua lɛ? Mose kɛɛ Nyɔŋmɔ bɔ ni enuɔ he ehãa. Nyɔŋmɔ hã mɛi krokomɛi ye ebua Mose koni enitsumɔ lɛ nɔ agbɔ, ni ehe ajɔ lɛ.

• ▸ Kanemɔ Mose he sane yɛ: 4 Mose 11:4-6, 10-17.