Mɛi Komɛi Kɛɛ Esaaa Akɛ Ayeɔ Kooloi Loo Agbeɔ Amɛ Kɛfeɔ Nɔ Ko​—Mɛni Biblia Lɛ Kɛɔ Yɛ He?

Mɛi babaoo hiɛ susumɔ nɛɛ yɛ je lɛŋ hei srɔtoi.

• “Mɛi pii bɔɔ mɔdɛŋ fɛɛ ni amɛbaanyɛ koni amɛkafee nɔ ko kɛye kooloo ko awui loo amɛgbe kooloo ko kɛhã niyenii, atade, loo yiŋtoo kroko hewɔ.”​—The Vegan Society.

Agbɛnɛ hu, mɛi komɛi kɔɔ gbɛ nɛɛ, jeee akɛni kooloi asane kã amɛtsui nɔ lɛ kɛkɛ hewɔ, shi moŋ akɛni amɛmiisumɔ ni akakpãtã kooloi ahiɛ, amɛná gbɔmɔtsoŋ hewalɛ kpakpa, loo akɛni amɛjamɔ lɛ biɔ ni amɛfee nakai lɛ hewɔ.

• “Esoro susumɔ nɛɛ kwraa yɛ bɔ ni mɛi halaa niyenii ni esa akɛ amɛye kɛ nɔ ni esaaa akɛ amɛyeɔ lɛ he, ejaakɛ bei pii lɛ, mɛi naa susumɔ nɛɛ akɛ eji hemɔkɛyeli, yiŋ ni akpɛ, kɛ gbɛ ni mɔ ko baasumɔ ni etsɔ nɔ etsake nibii koni nibii ahi yɛ je lɛ mli.”​—Britannica Academic.

Ani susumɔ ni ahiɛ nɛɛ ji shikpɔŋ lɛ naagbai lɛ anaa tsabaa? Mɛni Biblia lɛ kɛɔ yɛ he?

Wɔ-Bɔlɔ lɛ susumɔ yɛ gbɔmɛi kɛ kooloi ahe

Biblia lɛ tsɔɔ akɛ wɔ-Bɔlɔ, ni ji Yehowa Nyɔŋmɔa lɛ naa gbɔmɛi akɛ amɛnɔkwɔlɔ kwraa fe kooloi, ni ehã gbɔmɛi hegbɛ akɛ amɛye kooloi anɔ. (1 Mose 1:27, 28) Sɛɛ mli lɛ, Nyɔŋmɔ ŋmɛ gbɔmɛi agbɛ ni amɛgbe kooloi amɛye. (1 Mose 9:3) Shi esumɔɔɔ ni afeɔ kooloi niseniianii.​—Abɛi 12:10.

Biblia lɛ tsɔɔ akɛ, kɛji mɔ ko baaye kooloo ko loo loo eyeee lɛ, eji mɔ aŋkro yiŋkpɛɛ.b Yiŋ ni wɔbaakpɛ yɛ enɛ he lɛ hãŋ wɔhi fe mɛi krokomɛi yɛ Nyɔŋmɔ hiɛ. (1 Korintobii 8:8) Esaaa akɛ mɔ ko wieɔ mɔ ko hiɛ yɛ nɔ ni ehala akɛ ebaaye lɛ he.​—Romabii 14:3.

Bɔ ni baafee ni nibii ahi wɔsɛɛ

Biblia lɛ hãa wɔnaa akɛ bɔ ni wɔhalaa akɛ wɔbaahi shi wɔhã lɛ kɛkɛ nyɛŋ atsu je nɛŋ naagbai lɛ ahe nii. Pɔlitis, maŋ saji, kɛ bɔ ni atoɔ shika he gbɛjianɔ ahãa yɛ je nɛɛ mli lɛ ji nɔ ni kɛ naagbai lɛ babaoo baa, ni enɛ lɛ, adesai nyɛŋ atsu he nii. Biblia lɛ kɛɛ:

• “Nɔ ni ekɔ̃dɔ̃ lɛ, anyɛŋ ajaje.”​—Jajelɔ 1:15.

Wɔ-Bɔlɔ lɛ baatsu naagbai ni wɔkɛkpeɔ lɛ ahe nii. Biblia lɛ kɛ mfonirifeemɔŋ wiemɔi tsuɔ nii kɛtsɔɔ nɔ ni ebaafee.

• “Ni mina ŋwɛi hee kɛ shikpɔŋ hee; ejaakɛ tsutsu ŋwɛi lɛ kɛ tsutsu shikpɔŋ lɛ eho etee, ni ŋshɔ lɛ bɛ dɔŋŋ.”​—Kpojiemɔ 21:1.

Nyɔŋmɔ kɛ eŋwɛi Maŋtsɛyeli nɔyeli loo “ŋwɛi hee lɛ” baaye adesai anɔyelii loo “tsutsu ŋwɛi lɛ” najiaŋ. Nyɔŋmɔ Maŋtsɛyeli lɛ baakpãtã “tsutsu shikpɔŋ lɛ,” ni ji mɛi ni feɔ nibii fɔji lɛ ahiɛ, ni ebaaye “shikpɔŋ hee lɛ,” loo mɛi ni jɛɔ amɛsuɔmɔ mli amɛbaa amɛhe shi amɛhãa enɔyeli lɛ anɔ.

Ja Nyɔŋmɔ Maŋtsɛyeli lɛ nɔyeli shishi pɛ ni adesai baanyɛ akase bɔ ni amɛkɛ kooloi baahi shi yɛ toiŋjɔlɛ mli, ni amɛfee nibii ni tsɔɔ akɛ amɛsumɔɔ shikpɔŋ lɛ kɛ enɔ nibii lɛ jogbaŋŋ.​—Yesaia 11:6-9.