Buu-Mɔɔ INTANƐT NƆ WOJIATOOHE

INTANƐT NƆ WOJIATOOHE

ijwbq sane ni ji 157
Mɛni Biblia Lɛ Kɛɔ Yɛ Adebɔɔ Naa Oshãrai Ahe?

Sanebimɔi Ni Biblia Lɛ Ehã Hetoo

ijwbq sane ni ji 157

Weku ko miikwɛ akutso ko ni adebɔɔ naa oshãra efite jɛmɛ lɛ

Mɛni Biblia Lɛ Kɛɔ Yɛ Adebɔɔ Naa Oshãrai Ahe?

Hetoo ni Biblia lɛ kɛhãa

Jeee Nyɔŋmɔ ji mɔ ni hãa adebɔɔ naa oshãrai ni baa ŋmɛnɛ lɛ baa, kɛ̃lɛ, esusuɔ mɛi ni ebaa amɛnɔ lɛ ahe. Adebɔɔ naa oshãrai fata nibii ni hãa wɔpiŋɔ ni Nyɔŋmɔ Maŋtsɛyeli lɛ baafo sɛɛ lɛ ahe. Shi dani be nɛɛ baashɛ lɛ, Nyɔŋmɔ shɛjeɔ mɛi ni adebɔɔ naa oshãrai lɛ baa amɛnɔ lɛ amii.—2 Korintobii 1:3.

Mɛni hewɔ wɔbaanyɛ wɔná nɔmimaa akɛ Nyɔŋmɔ kɛ adebɔɔ naa oshãrai gbalaaa mɛi atoi lɛ?

Esoro adebɔɔ naa oshãrai yɛ adebɔɔ hewalɛi ni atsĩ tã yɛ Biblia lɛ mli ni Nyɔŋmɔ kɛkpãtãa nibii ahiɛ lɛ ahe.

Adebɔɔ naa oshãrai kpãtãa mɛi ahiɛ ni eyeɔ mɛi awui, ni ejieee mɔ ko kwraa yɛ mli. Nɔ ni tamɔɔɔ nakai lɛ, be fɛɛ be kɛ́ Nyɔŋmɔ kɛ adebɔɔ hewalɛi baakpãtã mɛi ahiɛ lɛ, ekpãtãa mɛi fɔji lɛ pɛ ahiɛ. Akɛ nɔkwɛmɔnɔ lɛ, be ni Nyɔŋmɔ kpãtã Sodom kɛ Gomora maji lɛ ahiɛ lɛ, eshi gbɔmɔ kpakpa Lot kɛ ebiyei enyɔ lɛ. (1 Mose 19:29, 30) Nyɔŋmɔ na nɔ ni yɔɔ aŋkroaŋkroi ni hi shi yɛ nakai beiaŋ lɛ atsuii amli, no hewɔ lɛ, ekpãtã mɛi fɔji lɛ pɛ ahiɛ.—1 Mose 18:23-32; 1 Samuel 16:7.
Kɛ́ adebɔɔ naa oshãrai baaba lɛ, bei komɛi lɛ, aleɔ he nɔ ko fioo loo aleee he nɔ ko kwraa. Nɔ ni tamɔɔɔ nakai lɛ, Nyɔŋmɔ bɔ mɛi fɔji lɛ kɔkɔ dani ekɛ adebɔɔ hewalɛi kpãtã amɛhiɛ. Mɛi ni bo kɔkɔbɔɔ lɛ toi lɛ je hiɛkpamɔ lɛ mli.—1 Mose 7:1-5; Mateo 24:38, 39.
Adesai anifeemɔi ehã adebɔɔ naa oshãrai komɛi eba, ni ekomɛi hu ekpãtã nii ahiɛ waa. Mɛɛ gbɛ nɔ? Amɛfite adebɔɔ nibii tamɔ koi, ni amɛmamɔ tsũi yɛ hei ni nu taa, hei ni ewaaa akɛ shikpɔŋhosomɔi baaba yɛ, loo hei krokomɛi ni tamɔ nakai. (Kpojiemɔ 11:18) Kɛ́ adesai kpɛ yiŋ ni nilee bɛ mli ni nibii gbohii jɛ mli kɛba lɛ, esaaa kwraa akɛ ashwaa Nyɔŋmɔ.—Abɛi 19:3.

Ani adebɔɔ naa oshãrai ji okadi ni tsɔɔ akɛ wɔyɛ naagbee gbii lɛ amli?

Hɛɛ, Biblia mli gbalɛi lɛ hãa wɔnaa akɛ adebɔɔ naa oshãrai baaba yɛ “naagbee gbii lɛ amli.” (Mateo 24:3; 2 Timoteo 3:1) Akɛ nɔkwɛmɔnɔ lɛ, Yesu wie yɛ gbii ni wɔyɔɔ mli nɛɛ ahe akɛ: “Hɔmɔ kɛ shikpɔŋhosomɔi baaba yɛ heihei.” (Mateo 24:7) Etsɛŋ, Nyɔŋmɔ baahã nibii fɛɛ, ni adebɔɔ naa oshãrai fata he, ni kɛ piŋmɔ kɛ amanehulu baa lɛ asɛɛ afo yɛ shikpɔŋ lɛ nɔ.—Kpojiemɔ 21:3, 4.

Mɛɛ gbɛ nɔ Nyɔŋmɔ tsɔɔ eyeɔ ebuaa mɛi ni adebɔɔ naa oshãrai enina amɛ?

Nyɔŋmɔ tsɔɔ e-Wiemɔ ni ji Biblia lɛ nɔ eshɛjeɔ mɛi ni adebɔɔ naa oshãra eba amɛnɔ lɛ amii. Biblia lɛ hãa wɔleɔ akɛ, Nyɔŋmɔ jwɛŋɔ wɔhe, ni kɛ́ wɔmiina nɔ lɛ, enuɔ he ehãa wɔ. (Yesaia 63:9; 1 Petro 5:6, 7) Ehãa wɔleɔ hu akɛ, Nyɔŋmɔ ewo shi akɛ, be ko baashɛ ni adebɔɔ naa oshãra baŋ dɔŋŋ.—Kwɛmɔ “Ŋmalɛi ni baanyɛ ashɛje mɛi ni adebɔɔ naa oshãrai esa amɛhe lɛ amii” lɛ.
Nyɔŋmɔ tsɔɔ mɛi ni jáa lɛ lɛ anɔ eyeɔ ebuaa mɛi ni adebɔɔ naa oshãra eba amɛnɔ lɛ. Nyɔŋmɔ tsɔɔ ejalɔi ni yɔɔ shikpɔŋ lɛ nɔ ni kaseɔ Yesu lɛ anɔ eyeɔ ebuaa mɛi ni adebɔɔ naa oshãra eba amɛnɔ lɛ. Agba akɛ Yesu baashɛje “mɛi ni tsui ekumɔ” kɛ “mɛi fɛɛ ni yeɔ awerɛho” lɛ amii. (Yesaia 61:1, 2) Mɛi ni jáa Nyɔŋmɔ lɛ hu bɔɔ mɔdɛŋ akɛ amɛbaafee nakai.—Yohane 13:15.

Agbɛnɛ hu, Nyɔŋmɔ tsɔɔ mɛi ni jáa lɛ lɛ anɔ ehãa mɛi ni adebɔɔ naa oshãra eba amɛnɔ lɛ heloonaa nibii.—Bɔfoi 11:28-30; Galatiabii 6:10.

Yehowa Odasefoi miisaa shĩa ko yɛ Puerto Rico — Yehowa Odasefoi miiye amɛmiibua mɛi komɛi ni ahum ekpãtã amɛnibii ahiɛ yɛ Puerto Rico

Ani Biblia lɛ baanyɛ aye abua wɔ ni wɔsaa wɔhe wɔto adebɔɔ naa oshãrai?

Hɛɛ. Eyɛ mli akɛ Biblia lɛ jeee wolo ni afee koni etsɔɔ wɔ bɔ ni wɔɔfee wɔsaa wɔhe wɔto adebɔɔ naa oshãra moŋ, shi saji komɛi yɛ mli ni baanyɛ aye abua wɔ. Ekomɛi nɛ:

Tsɔ hiɛ oto gbɛjianɔ yɛ nɔ ni obaafee kɛ́ oshãra ba lɛ he. Biblia lɛ kɛɛ, “hiɛtɛ̃lɔ naa oshãra lɛ, ni eteɔ ehe.” (Abɛi 22:3) Nilee yɛ mli akɛ wɔbaatsɔ hiɛ wɔkpɛ wɔyiŋ yɛ nɔ ni wɔbaafee he dani oshãra lɛ aba. Nibii ni wɔbaafee lɛ eko ji, ni wɔbaabua nibii fioo komɛi ni he baahia wɔ lɛ anaa wɔwo baagi mli wɔma shi, ni wɔkɛ wɔweku lɛ mli bii lɛ afee he ni wɔbaayakpe yɛ be ni oshãra eba lɛ he nɔkwɛmɔnɔ.
Buu wala fe heloonaa nibii. Biblia lɛ kɛɔ akɛ: “Wɔkɛ nɔ ko baaa je lɛ mli, ni wɔnyɛŋ wɔkɛ nɔ ko aya hu.” (1 Timoteo 6:7, 8) Esaaa akɛ egbaa wɔnaa kwraa akɛ wɔbaashi wɔshĩa kɛ nibii krokomɛi kɛ́ oshãra ba. Esa akɛ wɔhã ehi wɔjwɛŋmɔ mli akɛ, wɔwala jara wa kwraa fe heloonaa nibii fɛɛ.—Mateo 6:25.

Ŋmalɛi ni baanyɛ ashɛje mɛi ni adebɔɔ naa oshãrai enina amɛ lɛ amii

1 Mose 18:25: ‘Ebaŋ lɛ nakai kɔkɔɔkɔ akɛ Nyɔŋmɔ baafee nɛkɛ nɔ ko, akɛ ebaagbe jalɔ kɛ mɔ fɔŋ fɛɛ shi kome. Ani shikpɔŋ lɛ fɛɛ Kojolɔ lɛ efeŋ nɔ ni ja?’

Nɔ ni etsɔɔ: Nyɔŋmɔ feɔ nɔ ni ja be fɛɛ be; kɛ́ adebɔɔ naa oshãra kpãtã mɛi ahiɛ lɛ, esaaa akɛ ashwaa lɛ.

Lala 46:1, 2: “Nyɔŋmɔ ji wɔbobaahe kɛ wɔhewalɛ, mɔ ni yeɔ ebuaa wɔ oya yɛ haomɔ beiaŋ. No hewɔ ni wɔsheŋ gbeyei kɛ́ shikpɔŋ lɛ nɔ tsake.”

Nɔ ni etsɔɔ: Ekɔɔɔ he eko nɔ ni baaba wɔ nɔ lɛ, wɔbaanyɛ wɔkɛ wɔhiɛ afɔ̃ Nyɔŋmɔ nɔ akɛ ebaawaje wɔ.

Yesaia 63:9: “Be ni amɛhao lɛ mli fɛɛ lɛ, lɛ hu ehao.”

Nɔ ni etsɔɔ: Nyɔŋmɔ musuŋ tsɔɔ lɛ—enuɔ he ehãa wɔ kɛ́ wɔmii na nɔ.

Yohane 5:28, 29: “Ŋmɛlɛtswaa lɛ miiba, be mli ni mɛi fɛɛ ni yɔɔ gbohii abui lɛ amli lɛ baanu [Yesu] gbee ni amɛbaaje kpo.”

Nɔ ni etsɔɔ: Wɔbaanyɛ wɔná hiɛnɔkamɔ akɛ wɔbaana wɔsuɔlɔi ni egboi lɛ ekoŋŋ, ejaakɛ Nyɔŋmɔ baahã Yesu hewalɛ ni ekɛtee amɛ shi.

1 Petro 5:6, 7: “No hewɔ lɛ, nyɛbaa nyɛhe shi yɛ Nyɔŋmɔ nine ni wa lɛ shishi . . . be mli ni nyɛshɛrɛɔ nibii ni hãa nyɛyeɔ nyɛtsui lɛ fɛɛ nyɛshwieɔ enɔ lɛ, ejaakɛ ejwɛŋɔ nyɛhe.”

Nɔ ni etsɔɔ: Nyɔŋmɔ susuɔ wɔhe waa ni eesumɔ ni wɔsɔle wɔhã lɛ ni wɔkɛɛ lɛ nibii fɛɛ ni hãa wɔyeɔ wɔtsui lɛ.

Kpojiemɔ 21:4: “[Nyɔŋmɔ] baatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, ni mɔ ko yeŋ awerɛho dɔŋŋ, ni mɔ ko woŋ yara ko hu dɔŋŋ, ni mɔ ko hu piŋŋ dɔŋŋ. Tsutsu nibii lɛ eho etee.”

Nɔ ni etsɔɔ: Nyɔŋmɔ baahã nibii fɛɛ, ni adebɔɔ naa oshãrai fata he, ni kɛ amanehulu baa lɛ asɛɛ afo.