Mɛni Biblia Lɛ Kɛɔ Yɛ Nɔhãmɔ He?
Hetoo ni Biblia lɛ kɛhãa
Biblia lɛ woɔ wɔ hewalɛ ni wɔjɛ wɔtsuiŋ wɔhã mɛi nii, ni wɔfee nakai kɛ yiŋtoo kpakpa. Ehãa wɔleɔ hu akɛ, wɔ kɛ mɛi ni wɔhãa amɛ nii lɛ fɛɛ náa miishɛɛ. (Abɛi 11:25; Luka 6:38) Yesu wie akɛ: “Nɔhãmɔ hãa mɔ náa miishɛɛ fe hemɔ.”—Bɔfoi 20:35.
Mɛni hãa Nyɔŋmɔ náa nɔhãmɔ ko he miishɛɛ?
Kɛ́ wɔjɛ wɔtsuiŋ wɔhã mɛi nii lɛ, Nyɔŋmɔ náa miishɛɛ. Biblia lɛ kɛɛ akɛ, “Mɔ fɛɛ mɔ afee bɔ ni ekpɛ mli yɛ etsui mli, jeee kɛ mligbigbilimɔ loo yɛ nɔnyɛɛ naa, ejaakɛ mɔ ni hãa kɛ miishɛɛ lɛ, lɛ Nyɔŋmɔ sumɔɔ.”—2 Korintobii 9:7.
Wɔtsuiŋ ni wɔjɛɔ wɔhãa mɛi nii lɛ fata “Jamɔ ni he tse” ni Nyɔŋmɔ náa he miishɛɛ lɛ he. (Yakobo 1:27) Mɔ ni jɛɔ etsuiŋ eyeɔ ebuaa mɛi ni ehia amɛ lɛ kɛ Nyɔŋmɔ efee ekome kɛmiitsu nii, ejaakɛ Nyɔŋmɔ naa yelikɛbuamɔ ni tamɔ nɛkɛ lɛ akɛ nɔ ko ni akɛmiifa lɛ. (Abɛi 19:17) Biblia lɛ tsɔɔ akɛ Nyɔŋmɔ diɛŋtsɛ baato ekpakpafeelɔ lɛ najiaŋ.—Luka 14:12-14.
Mɛni hãŋ Nyɔŋmɔ aná nɔhãmɔ ko he miishɛɛ?
Kɛ́ wɔfee mɛi ejurɔ yɛ yiŋtoi ni ejaaa ahewɔ. Yiŋtoi lɛ ekomɛi nɛ:
Koni wɔkɛ sa mɛi ahiɛ.—Mateo 6:2.
Koni ato wɔ najiaŋ.—Luka 14:12-14.
Koni wɔkɛhé naanɔ wala.—Lala 49:6, 7.
Kɛ́ wɔfee ejurɔ koni wɔkɛfi nibii loo nifeemɔi ni Nyɔŋmɔ nyɛɔ lɛ asɛɛ. Akɛ nɔkwɛmɔnɔ lɛ, eji tɔ̃mɔ akɛ wɔbaahã mɔ ko shika ni ekɛyashwɛ asɔ loo ekɛyatɔ dãa, loo ekɛyahé tsofai ni ekɛtsu nii yɛ gbɛ ni ejaaa nɔ. (1 Korintobii 6:9, 10; 2 Korintobii 7:1) Agbɛnɛ hu, esaaa akɛ wɔfeɔ mɔ ko ni yɛ hewalɛ ni ebaanyɛ ekɛtsu nii kɛkwɛ ehe, shi esumɔɔɔ akɛ efeɔ nakai lɛ ejurɔ.—2 Tesalonikabii 3:10.
Kɛ́ ebaanyɛ esa sɔ̃ ni kã mɔ lɛ nɔ akɛ ekwɛ eweku lɛ he. Biblia lɛ tsɔɔ akɛ esa akɛ wekuyitsei akwɛ amɛshĩabii. (1 Timoteo 5:8) Eji tɔ̃mɔ akɛ wekuyitso ko baafee mɛi ejurɔ ni eku ehiɛ eshwie eweku lɛ nɔ. Agbɛnɛ hu, Yesu wie eshi mɛi ni kpoɔ akɛ amɛbaakwɛ amɛfɔlɔi ni egbɔlɔ lɛ. Mɛi nɛɛ kɛɔ akɛ nibii fɛɛ ni amɛyɔɔ lɛ ji, “nikeenii ni ajɔɔ nɔ ahã Nyɔŋmɔ.”—Marko 7:9-13.