Ani Biblia Lɛ Tsɔɔ Akɛ Shikpɔŋ Lɛ Yɛ Tɛtrɛɛ?

Hetoo ni Biblia lɛ kɛhãa

Dabi, Biblia lɛ etsɔɔɔ akɛ shikpɔŋ lɛ yɛ tɛtrɛɛ.a Biblia lɛ jeee jeŋ shikpamɔ wolo. Nakai beiaŋ nɔŋŋ lɛ, nɔ ko bɛ Biblia lɛ mli ni teɔ shi ewoɔ jeŋ shikpamɔ. Wɔbaanyɛ wɔkɛ wɔhiɛ afɔ̃ nibii ni Biblia lɛ kɛɔ anɔ “bianɛ kɛ agbɛnɛ hu, kɛmiiya naanɔ.”—Lala 111:8.

• Mɛni wiemɔ ni ji “shikpɔŋ lɛ koji ejwɛ” ni akɛtsu nii yɛ Biblia lɛ mli lɛ tsɔɔ?

• Ni kaa ni Abonsam kɛba Yesu nɔ lɛ hu?

Mɛni wiemɔ ni ji “shikpɔŋ lɛ koji ejwɛ” ni akɛtsu nii yɛ Biblia lɛ mli lɛ tsɔɔ?

Esaaa akɛ wɔnuɔ wiemɔi “shikpɔŋ lɛ koji ejwɛ” kɛ “shikpɔŋ lɛ naagbeehei lɛ” ni akɛtsu nii yɛ Biblia lɛ mli ashishi akɛ nakai shikpɔŋ lɛ yɔɔ, oookɛɛ nɔ ni eyɛ skwɛɛ loo eyɛ naagbeehei diɛŋtsɛ. (Yesaia 11:12; Hiob 37:3) Ekã shi faŋŋ akɛ wiemɔi nɛɛ ji mfonirifeemɔŋ wiemɔi ni akɛtsuɔ nii kɛkɔɔ shikpɔŋ muu lɛ fɛɛ he. Biblia lɛ wieɔ kɔmpase niji ejwɛ lɛ he yɛ gbɛ ni tamɔ nakai nɔŋŋ nɔ.—Luka 13:29.

Abaanyɛ atsɔɔ Hebri wiemɔ ni atsɔɔ shishi akɛ “koji” loo “naagbeehei” lɛ shishi hu akɛ “fiji.” The International Standard Bible Encyclopedia lɛ tsɔɔ mli akɛ, “akɛni loofɔlɔ lɛɔ efiji amli kɛhaa ebii anɔ hewɔ lɛ, akɛ Hebri wiemɔ nɛɛ tsuɔ nii kɛtsɔɔ nɔ fɛɛ nɔ ni kpãa emli kɛyaa shɔŋŋ lɛ mli.” Nakai wolo lɛ nɔŋŋ tsɔɔ mli akɛ: Wiemɔ nɛɛ ni akɛtsu nii yɛ Hiob 37:3 kɛ Yesaia 11:12 lɛ “shishi ji ŋshɔnaa, husui, loo shikpɔŋ lɛ naagbeehei.”b

Ni kaa ni Abonsam kɛba Yesu nɔ lɛ hu?

Be ni Abonsam baaka Yesu lɛ, ‘ekɛ Yesu tee gɔŋ ko ni kwɔ waa diɛŋtsɛ nɔ, ni ekɛ jeŋ maŋtsɛyelii lɛ fɛɛ kɛ amɛnunyam lɛ tsɔɔ lɛ.’ (Mateo 4:8) Mɛi komɛi kɛɔ akɛ Biblia mli sane nɛɛ hãa anaa akɛ abaanyɛ adamɔ he ko yɛ shikpɔŋ tɛtrɛɛ lɛ nɔ koni ana je lɛŋ he fɛɛ he. Shi etamɔ nɔ ni wiemɔ ni ji, “gɔŋ ko ni kwɔ waa diɛŋtsɛ” ni akɛtsu nii yɛ sane nɛɛ mli lɛ ji mfonirifeemɔŋ wiemɔ, ejeee he ko diɛŋtsɛ. Naa nɔ hewɔ ni nilee yɔɔ nɔ ni wɔkɛɔ nɛɛ mli lɛ.

• Gɔŋ diɛŋtsɛ ko bɛ shikpɔŋ lɛ nɔ ni kɛ́ adamɔ nɔ lɛ abaanyɛ ana je lɛŋ maŋtsɛyelii lɛ fɛɛ.

• Jeee maŋtsɛyelii lɛ fɛɛ kɛkɛ Abonsam kɛtsɔɔ Yesu lɛ, shi moŋ ekɛ “amɛnunyam lɛ” hu tsɔɔ lɛ. Anyɛŋ ana nibii nɛɛ fɛɛ kɛjɛ shɔŋŋ, no hewɔ lɛ, eeenyɛ efee akɛ abonsam tsɔ nɔ ko tamɔ ninaa nɔ ekɛ nibii nɛɛ tsɔɔ Yesu. Nɔ ni Abonsam fee nɛɛ tamɔ bɔ ni mɔ ko kɛ projɛkta kɛ skrin tsuɔ nii kɛjieɔ je lɛŋ hei srɔtoi ahe mfonirii etsɔɔ mɔ ko lɛ.

• Sane nɛɛ he amaniɛ ni abɔ yɛ Luka 4:5 lɛ kɛɛ akɛ, Abonsam kɛ “shikpɔŋ lɛ nɔ maŋtsɛyelii lɛ fɛɛ tsɔɔ lɛ,” gbɔmɔ ko gbɔmɔ ko nyɛŋ ekɛ ehiŋmɛi ana enɛ kɔkɔɔkɔ. Enɛ tsɔɔ akɛ jeee gbɛ ni yɔɔ faŋŋ nɔ Abonsam tsɔ ekɛ kaa nɛɛ ba Yesu nɔ lɛ, moŋ lɛ, etsɔ nɔ ko tamɔ ninaa nɔ.