Namɔ Ji Ŋwɛibɔfonukpa Mikael?

Hetoo ni Biblia lɛ kɛhãa

Ekã shi faŋŋ akɛ Mikael ji gbɛ́i ko ni akɛwo Yesu dani eba shikpɔŋ lɛ nɔ kɛ be ni eshi shikpɔŋ lɛ nɔ lɛ, ni lɛ ji mɔ ni jamɔi komɛi tsɛɔ lɛ “Saint Michael” (Hetselɔ Mikael) lɛ.a Yɛ Mose gbele sɛɛ lɛ, Mikael kɛ Abonsam pele Mose gbonyo lɛ he, agbɛnɛ hu eye ebua ŋwɛibɔfo ko koni enyɛ ekɛ sane ni jɛ Nyɔŋmɔ ŋɔɔ yahã gbalɔ Daniel. (Daniel 10:13, 21; Yuda 9) Mikael fãa Nyɔŋmɔ nɔyeli lɛ he, ni ekɛ Nyɔŋmɔ henyɛlɔi lɛ wuɔ ta kɛtsɔɔ akɛ ehiɔ shi yɛ egbɛ́i lɛ, ni eshishi ji “Namɔ Tamɔ Nyɔŋmɔ?” lɛ naa.​—Daniel 12:1; Kpojiemɔ 12:7.

Naa nɔ hewɔ ni nilee yɔɔ mli akɛ wɔbaamu sane naa akɛ Yesu ji ŋwɛibɔfonukpa Mikael lɛ.

• Mikael ji “ŋwɛibɔfonukpa lɛ.” (Yuda 9) Gbɛnaa gbɛ́i ni ji “ŋwɛibɔfonukpa” ni eshishi ji “ŋwɛibɔfoi lɛ anɔ onukpa” lɛ, jeɔ kpo shii enyɔ pɛ yɛ Biblia lɛ mli. Yɛ shii enyɔ lɛ fɛɛ amli lɛ, bɔ ni akɛtsu nii ahã lɛ tsɔɔ akɛ mɔ kome he awieɔ lɛ, ni no tsɔɔ akɛ ŋwɛibɔfo kome pɛ ni hiɛ nakai gbɛnaa gbɛ́i lɛ. Nakai ŋmalɛi lɛ ateŋ ekome wie akɛ, Nuŋtsɔ Yesu ni atee lɛ shi lɛ “baakpeleke shi kɛjɛ ŋwɛi, ni ekɛ ŋwɛibɔfonukpa gbee . . . baabo etsɛ.” (1 Tesalonikabii 4:16) Yesu yɛ “ŋwɛibɔfonukpa gbee” ejaakɛ lɛ ji Mikael, ŋwɛibɔfonukpa lɛ.

• Mikael nyiɛɔ ŋwɛibɔfoi asraafoi ahiɛ. “Mikael kɛ ebɔfoi lɛ fã drako lɛ [Satan] nɔ ta.” (Kpojiemɔ 12:7) Mikael yɛ hegbɛ kpele yɛ ŋwɛi, ejaakɛ atsɛ lɛ akɛ “lumɛi wuji lɛ ateŋ mɔ kome” kɛ “lumɔ wulu lɛ.” (Daniel 10:13, 21; 12:1) Woloŋlelɔ kpanaa ko ni atsɛɔ David E. Aune, ni ekase Kpaŋmɔ Hee lɛ he nii jogbaŋŋ lɛ wie akɛ, gbɛnaa gbɛ́ii nɛɛ tsɔɔ akɛ Mikael ji “ŋwɛibɔfoi asraafoi lɛ atatsɛ nukpa.”

  Mɔ kome ko pɛ Biblia lɛ tsĩ egbɛ́i tã akɛ eyɛ hegbɛ yɛ ŋwɛibɔfoi ata ko nɔ. Etsɔɔ mli akɛ “abaajie Nuŋtsɔ Yesu kpo kɛaajɛ ŋwɛi ni ebɔfoi ni yɔɔ hewalɛ lɛ fata ehe lɛ yɛ la ni tsoɔ mli, be ni etɔɔ owele” lɛ. (2 Tesalonikabii 1:7, 8; Mateo 16:27) “[Yesu tee] ŋwɛi, ni eyɛ Nyɔŋmɔ ninejurɔ nɔ, ni akɛ ŋwɛibɔfoi kɛ hegbɛi kɛ hewalɛi ewo eshishi.” (1 Petro 3:​21, 22) Nilee bɛ mli akɛ Nyɔŋmɔ baahala Yesu kɛ Mikael fɛɛ akɛ ŋwɛibɔfoi krɔŋkrɔŋi lɛ atatsɛmɛi lɛ anɔ onukpai, koni amɛkɛ amɛhe atswa. Moŋ lɛ, nilee yɛ mli waa akɛ wɔbaamu sane naa akɛ gbɛ́ii enyɔ, ni ji Yesu kɛ Mikael lɛ, fɛɛ damɔ shi kɛhã mɔ kome too lɛ nɔŋŋ.

• Mikael “baate shi adamɔ shi,” yɛ “haomɔ be ni eko bako dã” mli. (Daniel 12:1) Yɛ Daniel wolo lɛ mli lɛ, bei pii lɛ, akɛ wiemɔ ni ji “baate shi adamɔ shi” lɛ tsuɔ nii kɛdamɔɔ shi kɛhãa maŋtsɛ ko ni teɔ shi efeɔ nɔ ko ni sa kadimɔ. (Daniel 11:​2-4, 21) Yesu Kristo, ni atsɛɔ lɛ akɛ “Nyɔŋmɔ Wiemɔ Lɛ,” kɛ hegbɛ ni eyɔɔ akɛ “maŋtsɛmɛi a-Maŋtsɛ” lɛ baatsu nɔ ko ni sa kadimɔ kɛkpãta Nyɔŋmɔ henyɛlɔi lɛ fɛɛ ahiɛ, ni ebu Nyɔŋmɔ webii lɛ ahe. (Kpojiemɔ 19:11-16) Ebaafee nakai be ni “amanehulu kpeteŋkpele ni anako enɔ dã kɛjɛ je lɛ shishijee aahu kɛbashi amrɔ nɛɛ” yaa nɔ lɛ.​—Mateo 24:21, 42.