Namɔ Loo Mɛni Ji Nyɔŋmɔ Wiemɔ Lɛ?

Hetoo ni Biblia lɛ kɛhãa

Bei pii lɛ, kɛ́ akɛ wiemɔ ni ji “Nyɔŋmɔ wiemɔ lɛ” tsu nii lɛ, ekɔɔ sane ko ni jɛ Nyɔŋmɔ ŋɔɔ loo saji ni jɛ Nyɔŋmɔ ŋɔɔ ni abua naa he. (Luka 11:28) Yɛ Biblia lɛ mli hei fioo lɛ, akɛ wiemɔ ni ji “Nyɔŋmɔ Wiemɔ Lɛ” loo “Wiemɔ lɛ” tsu nii akɛ gbɛnaa gbɛ́i.​—Kpojiemɔ 19:13; Yohane 1:14.

Sane ni jɛ Nyɔŋmɔ ŋɔɔ. Gbalɔi lɛ kɛɛ yɛ bei srɔtoi amli akɛ saji ni amɛwie loo amɛjaje lɛ ji Nyɔŋmɔ wiemɔ. Akɛ nɔkwɛmɔnɔ lɛ, Yeremia kpa egbalɛi ahiɛ kɛ wiemɔ ni ji “Yehowa kɛɛ mi akɛ.” (Yeremia 1:4, 11, 13; 2:1) Dani gbalɔ Samuel baakɛɛ Saul akɛ Nyɔŋmɔ ehala lɛ akɛ maŋtsɛ lɛ, ekɛɛ Saul akɛ: “Daamɔ shi, koni mahã onu Nyɔŋmɔ wiemɔ lɛ.”​—1 Samuel 9:27.

Gbɛnaa gbɛ́i. Akɛ “Wiemɔ Lɛ” tsu nii hu yɛ Biblia lɛ mli akɛ gbɛnaa gbɛ́i kɛtsɛ Yesu be ni eji mumɔ yɛ ŋwɛi lɛ kɛ be ni eba shikpɔŋ lɛ nɔ akɛ gbɔmɔ lɛ. Naa yiŋtoi komɛi ahewɔ ni wɔmu sane naa nɛkɛ lɛ:

• Wiemɔ lɛ yɛ dani abɔ nibii krokomɛi fɛɛ. “Shishijee lɛ mli lɛ Wiemɔ lɛ yɛ . . . Mɔ nɛ kɛ Nyɔŋmɔ yɔɔ yɛ shishijee lɛ mli.” (Yohane 1:1, 2) Yesu ji “bɔɔ nii fɛɛ ateŋ kromɔbi lɛ . . . Eyɛ dani nibii krokomɛi fɛɛ ba shihilɛ mli.”​—Kolosebii 1:13-15, 17.

• Wiemɔ lɛ ba shikpɔŋ lɛ nɔ akɛ gbɔmɔ. “Wiemɔ lɛ batsɔ heloo, ni ehi shi yɛ wɔteŋ.” (Yohane 1:14) “[Kristo Yesu] ŋmɛɛ nɔ fɛɛ nɔ he, ni eŋɔ nyɔŋ su, ni ebatsɔ gbɔmɔ.”​—Filipibii 2:5-7.

• Wiemɔ lɛ ji Nyɔŋmɔ Bi lɛ. Beni bɔfo Yohane wie akɛ, “Wiemɔ lɛ batsɔ heloo,” taakɛ wɔtsɛ yisɛɛ kɛtsɔ hiɛ lɛ, no sɛɛ lɛ, etsa nɔ akɛ: “Wɔna enunyam lɛ, anunyam ni tamɔ nɔ ni tsɛ ko kɛhãa ebi koome lɛ.” (Yohane 1:14) Yohane ŋma hu akɛ: “Yesu ji Nyɔŋmɔ Bi lɛ.”​—1 Yohane 4:15.

• Wiemɔ lɛ yɛ sui ni Nyɔŋmɔ yɔɔ lɛ eko. “Wiemɔ lɛ nyɔŋmɔ ko ni,” loo “ehiɛ Nyɔŋmɔ su.” (Yohane 1:1; An American Translation) Yesu ji “mɔ ni hãa anaa Nyɔŋmɔ anunyam lɛ, ni eji esu lɛ henɔ pɛpɛɛpɛ.”​—Hebribii 1:2, 3.

• Wiemɔ lɛ yeɔ nɔ akɛ maŋtsɛ. Biblia lɛ kɛɛ “maŋtsɛ faii pii” bumɔ Nyɔŋmɔ Wiemɔ lɛ yitso. (Kpojiemɔ 19:12, 13) Atsɛɔ Wiemɔ lɛ hu akɛ “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ.” (Kpojiemɔ 19:16) Atsɛɔ Yesu akɛ “mɛi ni yeɔ nɔ akɛ maŋtsɛmɛi lɛ a-Maŋtsɛ, kɛ mɛi ni yeɔ nɔ akɛ nuŋtsɔmɛi lɛ a-Nuŋtsɔ.”​—1 Timoteo 6:14, 15.

• Wiemɔ lɛ sɔmɔɔ akɛ Nyɔŋmɔ naawielɔ. Ekolɛ gbɛnaa gbɛ́i ni ji, “Wiemɔ lɛ” hãa ayɔseɔ mɔ ni gbɛnaa gbɛ́i nɛɛ kã enɔ lɛ akɛ mɔ ni Nyɔŋmɔ tsɔɔ enɔ ekɛ shɛɛ saji kɛ gbɛtsɔɔmɔi hãa. Yesu wie akɛ etsu sɔ̃ nɛɛ he nii, ekɛɛ akɛ: “Tsɛ lɛ ni tsu mi lɛ diɛŋtsɛ ewo mi kitã yɛ nɔ ni mikɛɛ kɛ nɔ ni miwie lɛ he. . . . No hewɔ lɛ, nɔ fɛɛ nɔ ni miwieɔ lɛ, bɔ ni Tsɛ lɛ ekɛɛ mi lɛ, nakai miwieɔ.”​—Yohane 12:49, 50.