Mɛni Mafee Dani Matsɔ Yehowa Odasefonyo?

Yesu tsɔɔ nibii ni esa akɛ mɔ ko afee dani ebatsɔ Yehowa Odasefonyo; obaana nibii nɛɛ yɛ Mateo 28:19, 20. Nakai ŋmalɛ tsɔɔ nibii ni esa akɛ mɔ lɛ afee koni ebatsɔ Kristo sɛɛnyiɛlɔ, ni eko ji akɛ, esa akɛ mɔ lɛ awie Yehowa he loo eye Yehowa he odase etsɔɔ mɛi.

1: Kasemɔ nɔ ni Biblia lɛ tsɔɔ. Yesu fã ekaselɔi lɛ koni ‘amɛfee mɛi kaselɔi, ni amɛtsɔɔ’ amɛ nii. (Mateo 28:19, 20) Wiemɔ “kaselɔ” lɛ shishi ji, mɔ ko ni “atsɔɔ lɛ nii.” Saji ni yɔɔ Biblia lɛ mli, titri lɛ nibii ni Yesu tsɔɔ lɛ, baaye abua bo koni oná shihilɛ kpakpa ni oná miishɛɛ. (2 Timoteo 3:​16, 17) Wɔyɛ yɛ he miishɛɛ akɛ wɔkɛ bo baakase Biblia lɛ koni ole nɔ ni etsɔɔ, ni wɔheŋ bo shika.​—Mateo 10:​7, 8; 1 Tesalonikabii 2:​13.

2: Okɛ nibii ni okaseɔ lɛ atsu nii. Yesu kɛɛ akɛ esa akɛ mɛi ni atsɔɔ amɛ nii lɛ ‘aye nii fiaa ni efã lɛ nɔ.’ (Mateo 28:20) Enɛ tsɔɔ akɛ, esaaa akɛ okaseɔ Biblia lɛ koni ole nii kɛkɛ, esa ená bɔ ni ohiɔ shi ohãa kɛ bɔ ni osusuɔ nii ahe ohãa lɛ hu nɔ hewalɛ koni ofee tsakemɔi ni sa. (Bɔfoi 10:42; Efesobii 4:22-29; Hebribii 10:24, 25) Kɛ́ oye Yesu famɔi lɛ anɔ lɛ, bo diɛŋtsɛ obaakpɛ oyiŋ akɛ obaanyiɛ esɛɛ, no ji, obaajɔɔ ohe nɔ ohã Yehowa Nyɔŋmɔ.​—Mateo 16:24.

3: Hã abaptisi bo. (Mateo 28:19) Yɛ Biblia lɛ mli lɛ, akɛ baptisimɔ toɔ bɔ ni afũɔ gbonyo ahãa lɛ he. (Okɛto Romabii 6:2-4 lɛ he.) Eji nifeemɔ ni tsɔɔ akɛ, mɔ lɛ efũ ehe eshai lɛ yɛ mfonirifeemɔŋ, no ji ekwa etsutsu shihilɛ, ni eekɔ shihilɛ hee. Belɛ kɛ́ ohã abaptisi bo lɛ, okɛ no miitsɔɔ mɛi fɛɛ akɛ otsu nibii ni Yesu tsɔɔ lɛ ateŋ klɛŋklɛŋ enyɔ lɛ ahe nii, ni oobi koni Nyɔŋmɔ aye abua bo ni oná henilee kpakpa.​—Hebribii 9:14; 1 Petro 3:​21.

Te mafee tɛŋŋ male akɛ mishɛ baptisimɔ lɛ?

Okɛ asafoŋ onukpai lɛ agba he sane. Amɛkɛ bo baasusu saji ahe kɛkwɛ kɛji onuɔ nɔ ni baptisimɔ tsɔɔ lɛ shishi, okɛ nibii ni okaseɔ lɛ miitsu nii, ni bo diɛŋtsɛ ojɛ otsui mli ojɔɔ owala nɔ ohã Nyɔŋmɔ lo.​—Bɔfoi 20:28; 1 Petro 5:​1-3.

Ani esa akɛ Odasefoi abii hu ashɛ taomɔnii nɛɛ ahe?

Hɛɛ. Wɔtsɔseɔ wɔbii lɛ yɛ Yehowa gbɛtsɔɔmɔi lɛ anaa, taakɛ Biblia lɛ fãa wɔ akɛ wɔfee lɛ. (Efesobii 6:4) Kɛ̃lɛ, be ni amɛdaraa lɛ, esa akɛ amɛ diɛŋtsɛ amɛkase Biblia lɛ, amɛkpɛlɛ nɔ ni amɛkaseɔ lɛ nɔ, ni amɛkɛtsu nii, dani abaanyɛ abaptisi amɛ. (Romabii 12:2) Yɛ fɛɛ mli lɛ, eji wɔteŋ mɔ fɛɛ mɔ sɔ̃ akɛ ekpɛ eyiŋ akɛ ebaajá Nyɔŋmɔ loo ejáaa lɛ.​—Romabii 14:12; Galatiabii 6:5.