Yehowa Odasefoi Enyiɛ Yɔɔ Je Lɛŋ Fɛɛ?

Namɛi akaneɔ amɛ akɛ Odasefoi?

Mɛi ni wɔbuɔ amɛ akɛ Yehowa Odasefoi ji mɛi ni shiɛɔ Nyɔŋmɔ Maŋtsɛyeli lɛ he sanekpakpa lɛ daa nyɔɔŋ nɔ. (Mateo 24:14) Mɛi ni abaptisi amɛ ni amɛbatsɔmɔ Odasefoi kɛ mɛi ni abaptisiko amɛ ni miitsu shiɛmɔ nitsumɔ lɛ ji mɛi ni akaneɔ lɛ.

Ani esa akɛ mɔ ko ahã shika ko dani abu lɛ akɛ Odasefonyo?

Dabi. Abiii ni mɔ ko awo shika dani abu lɛ akɛ Odasefonyo loo dani akɛ nitsumɔ pɔtɛɛ ko loo sɔɔmɔ hegbɛ ko awo edɛŋ yɛ asafo lɛ mli. (Bɔfoi 8:​18-​20) Anɔkwa, mɛi babaoo tsuɔ onia ni amɛhãaa mɔ ko ale. Odasefonyo fɛɛ Odasefonyo jɛɔ etsui mli ekɛ ebe, ehewalɛ, kɛ nibii ni eyɔɔ fĩɔ jeŋ muu fɛɛ nitsumɔ lɛ sɛɛ yɛ enyɛmɔ naa.​—2 Korintobii 9:7.

Te afeɔ tɛŋŋ aleɔ mɛi abɔ ni shiɛɔ daa nyɔɔŋ nɔ?

Daa nyɔɔŋ nɔ lɛ, Odasefoi lɛ kɛ amɛshiɛmɔyaa he amaniɛbɔɔ hãa onukpai ni yɔɔ amɛsafoi lɛ amli lɛ. Anyɛɛɛ amɛnɔ ni amɛkɛ amaniɛbɔɔ lɛ ahã.

Asafoi lɛ feɔ fɛɛ ekome ni amɛkɛ yibɔi ni amɛbaaná lɛ majeɔ nitsumɔhe nine ni yɔɔ he ni amɛyɔɔ lɛ. Nitsumɔhe niji lɛ hu buaa maŋ muu lɛ fɛɛ loo shikpɔŋ kuku ni amɛkwɛɔ nɔ lɛ amaniɛbɔi lɛ ayibɔi lɛ anaa ni amɛkɛmajeɔ wɔnitsumɔhe yitso lɛ.

Kɛ́ sɔɔmɔ afia lɛ ba naagbee lɛ, nitsumɔhe nine ni yɔɔ maŋ fɛɛ maŋ nɔ kwɛɔ akɛ, yɛ nakai sɔɔmɔ afi lɛ mli lɛ, Odasefoi ayibɔ ni fa fe fɛɛ enyiɛ aná yɛ maŋ lɛ mli. Abuaa yibɔi nɛɛ fɛɛ anaa, ni no hãa anaa Odasefoi abɔ ni yɔɔ jeŋ fɛɛ. Akɛ maŋ fɛɛ maŋ nɔ amaniɛbɔi lɛ woɔ wɔwɛbsaiti lɛ fã ni ji “Je Lɛŋ Hei Srɔtoi” lɛ shishi. Amaniɛbɔi nɛɛ woɔ wɔ hewalɛ tamɔ bɔ ni amaniɛbɔi ni tamɔ nakai lɛ wo klɛŋklɛŋ afi oha lɛ mli Kristofoi lɛ hewalɛ lɛ nɔŋŋ.​—Bɔfoi 2:​41; 4:4; 15:3.

Ani nyɛbuɔ mɛi ni kɛ nyɛbɔɔ shi amɛyaaa shiɛmɔ lɛ nyɛfataa Odasefoi abɔ ni yɔɔ lɛ ahe?

Eyɛ mli akɛ wɔbuuu mɛi nɛɛ wɔfataaa Odasefoi ni yɔɔ jeŋ fɛɛ lɛ ahe moŋ, shi wɔŋmɛɔ amɛ gbɛ ni amɛbaa wɔkpeei lɛ ashishi. Amɛteŋ mɛi babaoo baa Kristo Gbele Lɛ Kaimɔ ni wɔfeɔ daa afi lɛ, no hewɔ lɛ, kɛ́ ajie Odasefoi lɛ ayibɔ ni yɔɔ lɛ kɛjɛ mɛi abɔ ni baa Kristo Gbele Lɛ Kaimɔ lɛ shishi lɛ mli lɛ, wɔnaa mɛi ni ba, shi amɛjeee Odasefoi lɛ ayibɔ. Yɛ afi 2025 lɛ, mɛi 20,635,015 ba Kaimɔ lɛ.

Mɛi ni baaa wɔkpeei lɛ ateŋ mɛi pii náa shĩa Biblia mli nikasemɔ ni wɔkɛ mɛi feɔ ni wɔheee shika lɛ he sɛɛ. Yɛ afi 2025 lɛ, kɛ́ aja mli lɛ, daa nyɔɔŋ lɛ, wɔfee Biblia mli nikasemɔi 7,603,182, yɛ ekomɛi amli lɛ, akɛ mɛi pii kase nii yɛ be kome too lɛ nɔŋŋ mli.

Mɛni hewɔ Odasefoi ayibɔ ni yɔɔ maŋ nɔyeli lɛ woji amli lɛ fa fe nɔ ni nyɛyɔɔ lɛ?

Kɛ́ nitsumɔhei ni kaneɔ mɛi amɛhãa nɔyeli lɛ miikane mɛi lɛ, bei pii lɛ, amɛbiɔ mɛi lɛ jamɔ mli ni amɛyɔɔ. Akɛ nɔkwɛmɔnɔ lɛ, Amerika nitsumɔhe ni kaneɔ mɛi (U.S. Census Bureau) lɛ tsɔɔ mli akɛ, kɛ́ amɛmiikane mɛi lɛ, “amɛbiɔ saji koni amɛkɛle jamɔi amli ni mɛi lɛ baakɛɛ amɛyɔɔ,” amɛkɛfata he akɛ, enɛ hewɔ lɛ, bei pii lɛ yibɔi ni wɔnáa lɛ “damɔɔ mɛi asusumɔi anɔ, shi jeee bɔ ni eji lɛ diɛŋtsɛ.” Nɔ ni tamɔɔɔ nakai lɛ, mɛi pɛ ni wɔkaneɔ amɛ akɛ Yehowa Odasefoi ji, mɛi ni kɛ wɔ bɔɔ ni amɛshiɛɔ amɛhãa mɛi krokomɛi, ni amɛbɔɔ amɛshiɛmɔyaa lɛ he amaniɛ, shi jeee mɛi ni kɛɔ kɛkɛ akɛ amɛ ji Odasefoi.