Ani Mɔ Ko Baanyɛ Ekɛ Yehowa Odasefoi Asafo Lɛ Afo Tako Mli?

Hɛɛ. Mɔ ko baanyɛ atsɔ gbɛi enyɔ nɔ ekɛ asafo lɛ afo tako mli:

• Kɛtsɔ le ni ebaahã ale nɔ. Mɔ ko baanyɛ atsɔ woloŋmaa loo wiemɔ nɔ ehã ale akɛ ejeee Yehowa Odasefonyo dɔŋŋ.

• Kɛtsɔ enifeemɔ nɔ. Mɔ ko baanyɛ afee nɔ ko ni baatsɔɔ akɛ esumɔɔɔ ni aleɔ lɛ akɛ Yehowa Odasefonyo loo wɔnyɛmi dɔŋŋ. (1 Petro 5:9) Akɛ nɔkwɛmɔnɔ lɛ, mɔ lɛ kɛ jamɔ kroko baabɔi bɔɔ ni ebaahã ana faŋŋ akɛ eesumɔ ni ehi nakai jamɔ lɛ mli.​—1 Yohane 2:​19.

Kɛ́ mɔ ko kpa shiɛmɔyaa loo nyɛsafoŋ kpeei baa hu? Ani nyɛbuɔ lɛ akɛ ekɛ nyɛsafo lɛ efo tako mli?

Dabi, wɔbuuu lɛ nakai. Esoro mɔ ni kɛ asafo lɛ efo tako mli lɛ yɛ mɔ ni hemɔkɛyeli he ejɔ he. Bei pii lɛ, kɛ́ mɔ ko kpa shiɛmɔyaa loo asafoŋ kpeei baa lɛ, no etsɔɔɔ akɛ ekɛ asafo lɛ efo tako mli, moŋ lɛ, etsɔɔ akɛ mɔ lɛ nijiaŋ eje wui. Nɔ najiaŋ ni wɔbaatse wɔhe kɛje mɛi ni tamɔ nɛkɛ lɛ ahe lɛ, wɔbɔɔ mɔdɛŋ ni wɔshɛje amɛmii ni wɔye wɔbua amɛ. (1 Tesalonikabii 5:​14; Yuda 22) Kɛ́ mɛi nɛɛ miisumɔ ni aye abua amɛ lɛ, asafoŋ onukpai lɛ baajɛ ŋmalɛi lɛ amli amɛye abua amɛ.​—Galatiabii 6:1; 1 Petro 5:​1-3.

Kɛ̃lɛ, ahãko asafoŋ onukpai lɛ hegbɛ ni amɛnyɛ mɔ ko nɔ ni eya nɔ ehi shi akɛ Yehowa Odasefonyo. Mɔ fɛɛ mɔ kpɛɔ eyiŋ yɛ jamɔ ni ebaasumɔ ni ehi mli lɛ he. (Yoshua 24:15) Wɔheɔ wɔyeɔ akɛ, esa akɛ mɔ fɛɛ mɔ ni jáa Nyɔŋmɔ lɛ ajɛ esuɔmɔ mli kɛ etsui mli efee nakai.​—Lala 110:3; Mateo 22:37.