Sanebimɔi Ni Biblia Lɛ Ehã Hetoo / Wala Kɛ Gbele / Namɛi Yaa Hɛl?

Hetoo ni Biblia lɛ kɛhãa

Hɛl (ni ji “Sheol” kɛ “Hades” yɛ Hebri kɛ Greek mli lɛ) ji gbonyobu kɛkɛ, jeee he ko ni akɛ la piŋɔ mɛi yɛ. Namɛi yaa hɛl? Mɛi kpakpai kɛ mɛi fɔji fɛɛ yaa hɛl. (Hiob 14:13; Lala 9:17) Biblia lɛ kɛɛ, adesai fɛɛ agbonyobu nɛɛ ji “shĩa ni hiɛkãalɔi fɛɛ baayakpe yɛ mli.”​—Hiob 30:23.

Yesu po, be ni egbo lɛ etee hɛl. Kɛ̃lɛ, “ashiii lɛ yɛ jɛmɛ,” ejaakɛ Nyɔŋmɔ tee lɛ shi.​—⁠Bɔfoi 2:31, 32, The Bible in Basic English.

Ani hɛl baahi shi kɛya naanɔ?

Mɛi fɛɛ ni yaa hɛl lɛ baaba ekoŋŋ, kɛtsɔ Nyɔŋmɔ hewalɛ nɔ lɛ, Yesu baahã amɛba wala mli ekoŋŋ. (Yohane 5:28, 29; Bɔfoi 24:15) Be ni gbalɛ ni yɔɔ Kpojiemɔ 20:13 lɛ wieɔ nakai gbohiiashitee ni baaba lɛ he lɛ, ekɛɛ akɛ, “gbele kɛ hɛl jie gbohii ni yɔɔ amɛmli lɛ amɛhã.” (King James Version) Kɛ́ ajie mɛi fɛɛ ni yɔɔ hɛl mli agbe naa lɛ, hɛl ehiŋ shi dɔŋŋ; mɔ ko mɔ ko eyaŋ jɛmɛ dɔŋŋ, ejaakɛ ‘gbele ehiŋ shi dɔŋŋ.’​—⁠Kpojiemɔ 21:3, 4; 20:14.

Shi jeee mɔ fɛɛ mɔ ni gboiɔ lɛ yaa hɛl. Biblia lɛ tsɔɔ akɛ mɛi komɛi kɛ amɛhe woɔ efɔŋfeemɔ mli vii aahu akɛ amɛnyɛɛɛ amɛtsake. (Hebribii 10:26, 27) Kɛ́ mɛi tamɔ nɛkɛ gbo lɛ, amɛyaaa hɛl, shi amɛyaa Gehena, ni ji okadi kɛhã naanɔ hiɛkpãtãmɔ. (Mateo 5:29, 30) Akɛ nɔkwɛmɔnɔ lɛ, Yesu tsɔɔ akɛ jamɔŋ hiɛnyiɛlɔi osatofoi ni hi shi yɛ egbii lɛ amli lɛ ekomɛi baaya Gehena.​—⁠Mateo 23:27-33.